Aliando jo si Botak : Piliah Kuciang Ayia atau Kuciang Oren

Aliando jo si Botak

Piliah Kuciang Ayia atau Kuciang Oren

tukang ota : Fendi Moentjak

Botak sadang takantuak-kantuak ayam duduk di lapau goreng Tek Minar. Hapenyo talatak dimeja sarato kopi sakarek nan lah mulai tadadak. Kain saruang talilik pulo dilihia. Samantaro kadai langang, nan Tek Minar punyo lapau pai pulang manjapuik Pisang ka digoreng

Pesek nan mulo baniyaik mambali goreng tabik iseng pulo nak mangarajoan Botak. Di dakek i nyo Botak lambek-lambek, diambiak hape sudah tu nyo bajalan ma andok-andok sambia manahan galak.

“Pesek !!! Latak an hape tu atau ka marangkak minta maaf ka deyen,” hariak Botak nan mambuek Pesek takajuik.

“Sangko wak takalok mak Botak tadi mah, kironyo tau juo hapenyo wak rasok,” jawek Pesek.

“Jan kan hape, takalok deyen disiko, ado nan mambuek heboh dalam pasa, bisa tau deyen mah, iko baru anak kalamari lah nak mauji¬† urang bagak nomor tigo di pasa ko lo,” kato Botak nan mambuek Pesek galak takekeh.

“Baa dek galak kau pesek ? Ado nan lawak, beko den jujuik hiduang pesek jd mancuang saroman Pinokio baru tau raso,” makin berang Botak dek ulah pesek.

“Baa ndak ka galak, sangko awak Mak Botak lah bagak nomor satu, kironyo nomor tigo,” kato Pesek

“Iyo, Deyen ko bagak nomor tigo. Nomor satu Tuhan Allah, nomor duo hukum, nan katigo baru Mamak gagah kau ko,” jawek sambia mahiruik dadak kopinyo.

“Baa dek babao lo namo Tuhan jo hukum bagai mak,” tanyo Pesek penasaran.

“Awak baliah pareman, indak takuik jo hantu apo lai manusia. Tapi sumbayang jan lupo, parintah Tuhan dipatuhi larangannyo dihantikan. Awak buliah tangka jo kareh tapi aturan dipatuhi nan hukum di tagakan,” ciloteh Botak ka Pesek.

“Baa dek surang je kau bali goreng, biasonyo alun tantu ka sanjo hari Sabtu lah raun naik honda jo paja nan abuaknyo ba cat sarupo kanai kuah miso tu,” Botak ma aliahkan pembicaraan.

“Ndak nio wak Paja Kuciang Ayia tu do mak, ka awak mangaku cinta, ko anak kuliah nyo bapole pulo, sudah tu tampak lo dek awak nyo anak sakola. Sado cewek digaduahnyo mak,” Pesek curhat ka Botak.

“Makonyo deyen kecek an nan dipaliharo tu Kuciang Oren indak Kuciang Ayia do. Kalau Kuciang Ayia awak tandeh hati sakik deknyo. Kalau Kuciang Oren kawan dapek awak tahibur,” Botak maraso manang.

“Jadi sia Kuciang Oren mak ?” Tanyo Pesek.

“Sia juo lai kok ndak mamak gagah kau ko, sahari indak ka balai, lah rusuah urang sa pasanyo mah,” Botak galak manih sambia mangipehan saruangnyo.

“Saruang angik bakipehan pulo, maagiah kabaji ka lapau Tek Minar ko mah,” Pesek manutuik hiduang.

“Haiyayai, Pesek indak tau, iko nan pamanih Botak mah. Dek kain saruang kiramaik ko indak ado hantu nan talok bakaliaran di pasa ko mah,” Botak indak amuah kalah.

“Babang Aliando maa nyo Mak, lah jarang nampak kini,” pesek Batanyo sambia malutok tahu isi.

“Jan digaduah pulo kawan¬† deyen tu lai, Pesek jadi korban Kuciang Ayia ka dibalehan ka kawan deyen, ndak masuak tu do. Jan mantang-mantang kami jomblo sejati, ka dijadikan persinggahan. Tidak lah yauu, emangnya kita halte,” Botak tak namuah kalah sambia makan Bakwan jo lado kutu.

“Indak Mak Bot, kangen lo wak jo galak manih sarato kaco mato itam babang tamvan Aliando,”

“Bro deyen tu sadang di Bandung kini,” jawek Botak singkek.

“Iyo lah mak, wak pai lai, Mak Bot berang-berang se, bayia an lanjo wak ka Tek Minar, salapan sadonyo,” Pesek tagak sambia manambah minum aia putiah.

“Oi Piak Banun, iko urang atau garumbuang ko, sabanta maota lalu goreng salapan deknyo. Iyo molah, cuma pasan deyen nan dipaliharo tu Kuciang Oren bukan Kuciang Aia”, tangango Botak mancaliak salero Pesek.***

 

Facebook Comments

loading...