Pancarian Padiah Kawan Manjauah, Ota Lapau di SuhaNews pengganti ciloteh Mak Pono. Insya Allah ciloteh dengan bahasa Minang yang ditulis Fendi Moentjak ini akan hadir tiap Minggu menyapa pembaca, dengan kritik sosial dan isu aktual ditengah masyarakat.
Mantari tatagun muncak nan sadang tamanuang di palanta bawah batang seri. Dipatuk-patuknyosabalun diajak maota, apo ko lah nan dipikian dek konsi sajak saisuak tu.
“Baa gak nyo Nsi, jauah pangana mah,” sapo Mantari sambia manyemba rokok Muncak.
“Mamikia an keadaan kini, sajak PPKM ko makin paik iduk taraso, babagai parasaian urang nan dicaliak,” jawek Muncak.
Muncak manjalehkan, karano PPKM ko lah balevel pulo sarupo Mie Padeh. Kok mie padeh mulai dari level minum aia putiah batambah teh es, diatehnyo, level mangalua an aie mato, tambah saketek mangalua an aie mato jo salemo, paliang puncak mancorek dibueknyo, kasudahan mancari pucuak daun jambu lipo.
Mandanga panjalsan Muncak takekeh galak mantari, takana dek inyo berita di tipi pagi tadi. Kalau PPKM ado levelbyo mulai dari level tigo, ampek sampai darurat.
Tapi nan den rusuahan ndak itu do Ntari, karano PPKM ko Pancarian Padiah Kawan Manjauah, katiko ado nan ka diarok, kawan mandakek, kok indak jan kan manyapo, mancaliak san lai tidak,” mandanga keterangan Muncak ko tatagun Mantari.
“Batoh mah Nsi, baru sakali patang indak den baleh chat konsi, alah baper san sakali, baru sabatang rokok den hisok lah bakecek an lo den datang katiko butuh san,” Mantari lansuang angek mandanganyo.
Mancaliak Mantari angek, Muncak galak takekeh.
“Dari pado siko maota kariang, lah ka lapau Tek Minar wak lah, ado juo kopi nan ka diraguak jo goreng panyampa muncuang,” ajak Mantari.
Sambia bajalan manuju lapau Tek Minar, Muncak jo Mantari mambahas, baa kok indak ado Ajo Tamar balapau lai. Dan sajak itu pulo Mak Pono nan buruak sarengeh lah ilang dari peredaran.
“Ajo Tamar tu korban PSBB diawal pandemi dulu mah Ncak,” kato Mantari nan mambuek Muncak tacangang.
Dicaritoan lah Mantari, katiko PSBB diterapkan, lapau One jadi langang, galeh Ajo dibalai baitu pulo. Akhianyo Ajo korban PSBB (Pitih sarik Bini Baulah).
“Sajak lapau langang, tambah lo manggalaeh di balai indak bajua bali, Ajo jo One acok basiarak, dan akhienyo Ajo kanai Skor,” kato Mantari manjalehkan.
“Kok si Pono baa lo caritonyo tu Mantari?,” takana lo Muncak jo Mak Pono nan lah lamo ilang.
“Kok konsi kito nan surang tu, sajak gagal mancalon Wali Nagari, indak lo dapek dukungan jadi Kapalo Jorong, lah kamari marabo san, ditambah pulo lapau One sebagai markas besarnyo tampek bakumoua jo ma ota alah batutuk, lah jarang nyo tampak kini,” Kato Mantari manjalehan.
Dek tasabuk namo Mak Pono, Mantari jo Muncak maulang nostalgia sajak samo sakola jo mak Pono sajak saisuak. Babagai kisah na tasabuk, mulai dari banyak aka, paleboy sampai buruak sarengehnyo.
Ota lamak duo konsi sajak kaciak to taranti dek dimuko lapau tek Minar batempel tulisan “Minum ditempat maksimal 20 menit, diutamakan dibungkus dan dibawa pulang”. Samantaro didalam lapau, palanta kayu panjang di tiok meja alah baganti jo bangku plastik hanyo ampek buah tiok meja.
“Baa Muncak jadi juo kito mangopi ?,” tanyo Mantari heran.
“Indak mangopi ndak anti, rakuang deyen lo nan ka cayia dek manduduk kooi angek tu, dimaa jo ota ka kalua dek lidah padiah dek kopi angek, ado-ado san Tek Minar gah” Muncak manggarutok sambia pai dari lapau. **
Baca Juga :
Facebook Comments