Ciloteh Mak Pono, Lapau Kalambu Tangah Malam

lapau

Lapau Kalambu Tangah Malam

Tukang tulih : Fendi Moentjak

Sajak PSBB di papanjang pamarintah, tugas Mak Pono makin barek. Indak siang sajo Mak Pono dapek giliran patroli mancari urang nan malangga aturan, tapi juo malam. Dari kapalo labuah, lapau, sampai tampek nan biaso urang banyak bakumpua didatangi Mak Pono.

Mak Pono samakin wibawa sajak pakai rompi warna kopi susu nan bamerek satuan tugas. Warna nan samulo coklat tarang, kini alah bahias jo coklat tuo karano bapakai taruh siang malam. Baitu juo aroma rompi ko, alah babeda dari biaso.

Alah duo hari ko Mak Pono pai patroli indak pakai kureta unto, agak manjo kini sajak bagabuang jo Satpol PP, Polisi sarato tentara pakai oto patroli Satpol PP. Satiok turun ka lapangan Mak Pono salalu dimuko indak amuah kalah jo apak-apak aparat ko. Mak Pono nan manunjuak an dimaa biasonyo urang acok bakumpua, atau lapau kopi maa nan indak patuah salam PSBB diterapkan.

“Hebat warga nagari Mak Pono yeah, buliah dikato indak ado palanggaran, tiok lapau nan didatangi alah sasuai aturan,” kato pak Polisi.

“Iyo pak, urang kampuang ambo patuah-patuah, tu contonyo lapau nan di simpang tu. Nan partamo menerapkan PSBB di nagari ko,” jawek mak Pono bangga.

“Baa dek baitu mak ?” tak pak tentara nan duduak disampiang Pak Polisi.

“Dek Ajo nan punyo lapau tu, PSBB aratinyo Pitih Sarik Bini Baulah, nan kini ajo ko social distancing alias manjago jarak, kalau bahaso ambo namonyo KALUA MAIN,” jawek Mak Pono dijawek galak urang diateh oto tu.

Dek nagari lai aman patroli malam kini balansuang capek, sudah manekan surek jalan di Kantua Wali, tim langsuang mambubarkan diri. Nan Mak Pono ba ambiak kureta unto bagageh pulang, takana kolak Kundua babyuko tadi.

Ciloteh Mak Pono : Pitih Sarik Bini Baulah

Sambia mangayuah kureta, takana Mak Pono jo Botak CS, antah dimaa lah mereka ko lah duo hari indak ado nampak. Biasonyo kalau indak batamu, bakaba di hape lai juo. Babelok Mak Pono ka pos rundo nan jadi pos satgas Covid-19 tingkek nagari, tapi Botak jo Karibo indak batamuo juo.

Pos rundo langang indak baurang, hanyo galon barisi aia pancuci tangan nan talatak dimuko pos rundo. Ditalepon dek Mak Pono,hapenyo mati kaduonyo. Ka hape si Pitok lai masuak tapi indak diangkek.

Dek hari lah nak tangah malam, Mak Pono ma ambiak jalan mamotong supayo capek sampai di rumah. Sabananyo Mak Pono agak ngari juo lalu ka parak Jua ko, karano salain indak ado lampu jalan juo agak angker. Apo lai lai dakek kincia tingga tu, tapi raso takuk mak Pono kalah dek keinginan makan kolak Kundua.

Katiko malinteh dimuko Kincia, tagak bulu kuduak Mak Pono. Sayuk-sayuk tadanga suaro urang mangecek. lah dibaco dek Mak Pono sagalo kaji nan dapek. Lah baparo hati Mak Pono nio babaliak, paruk batambah litak juo.

Takana kaji buya dek Mak pono, kalau bulan puaso ko sagalo setan dikabek. Walau manggaretek, mak Pono memantapkan hati untuak taruh mangayuah kureta unto.

Antara takuk jo curiga Mak Pono katiko lalu di dakek parak belok lapeh kincia tingga. Suaro urang mangecek sambia galak sasakali tadanga jaleh. Disandakan kureta angin di batang pisang, Mak Pono malangkah mandakek ka arah suaro, sarato cahayo na tarang-tarang galok tu.

Ilang takuk Mak Pono, katiko suaro galak tu lah hapa bana dek nyo. “iko galak si Botak,” gumam Mak pono.

“Oooo jadi iko setan nan lapeh kabek tu mah yo, urang baibadah dirumah, nan inyo lamak bakoa dalam parak,” kalua sarengeh Mak Pono bagitu mancaliak pareman ko main koa.

Lah basijadi Mak Pono mancaramahi Botak CS, dari ilmu agamo sampai aturan PSBB sadonyo disampikan dek Mak Pono. Babarapo kali ado juo nan manjawek. Samakin di jawek kato Mak Pono samakin buruak sarengeh nan kalua.

“Bulan puaso taun lalu, pitok ko kanai razia lapau kalambu tangah hari, manjua kopi saat urang puaso. Kini kanai razia lapau kalambu tangah malam, lah jaleh dilarang bakumpua, disruah jago jarak, basimada juo surang-surang,” hariak Mak Pono.

Ciloteh Mak Pono lainnya :

Facebook Comments

loading...