Ota Lapau, Mie Abuh 25 Ribu

tukang tulih : Fendi Montjak

“Makan mie Muncak Mah,” sapo Mantari katiko masuak lapau tek Minar basuo jo Muncak nan sadang maambuh mie angek-angek.

“Lai ndak duo puluah limo ribo lo harago mie abuh Tek Minar gah kini gah Ncak ?” tanyo Mantari nan manggarik jakun-jakunnyo mancaliak Muncak maambuh mie abuh angek.

“Buek an lah den mie abuh lamak du ciek Tek Minar, pakai talua Itiak, samparono aa masak taluanyo, kan lai ndak ado lo harago rayo deh ?,” Mantari basorak.

Madanga kandak Mantari gah tasambua galak Muncak deknyo, “Ingek pasan pak Menteri tu a, imek mamakai, gas, kalau samparono masak talua tu, labiah lamo lo mamsaknyo, labiah banyak mamakai gas, saparo masak san lah, bia hemat gas,”

“Kok ado lo tarif rayo lapau Tek Minar gah, bisuak indak disiko wak duduak lai,” Muncak mahambuh mie nan masih angek.

Muncak jo Mantari sadang basijadi maota sambia makan mie, kaduonyo mambahas berita nan viral di hape tentang harago Indomie Abuh nan sampai duo puluah limo ribu, nan dikaluahkan dek wisatawan salamo hari rayo.

“Kok di Padang, kabanya  ado himbauan Walikota kapado pelaku usaha di tampek usaha untuak indak mamakuak wisatawan jo harago indak masuak aka,” kato Mantari.

Tapi kok mancaliak postingan nan dibuek netizen di media sosial, indak cuma di ciek lokasi wisata, banyak lokasi wisata di babarapo daerah nan para pedaganganyo mambuek harago sakalamak paruknyo sajo, harago naiak duo kali lipek bahkan labiah. Indak cuma makanan, minuman kaleng atau minuman botol juo malonjak haragonyo.

Sadang kaduonyo mambahas harago mie abuh nan viral du, tibo Mak Pono jo muko masam, kaniang bakaruk.

“Dari Mak Pono tadi gah ? ka makan mie Mak Pono ndak ? sapo Muncak manyambuk gaek buruak sarengeh tu.

“Indak makan ndak anti,” singkek san jawek Mak Pono.

Mancaliak gaek ko sadang tasumbek, Muncak jo Mantari hanyo mancaliak jauah san. Mak Pono duduak tasanda di tampek biaso, sambia bakipeh topi tarabuh antah apo nan ado dipangananyo.

“Ndak cinan Mak Pono, saharum iko mie abuh a,” Tek Minar manyapo sambia malatak an mie pasanan Mantari.

“Ndak,” jawek Mak Pono singkek

Mantari jo Muncak taruh mandayo Mak Pono jo Mie Abuh, disabuk dek Muncak, dari sekian banyak makanan di lapau Tek Minar gah, mie abuh nan paliang manggoda, apolai baru masak, mambuek titiak salero.

“Gara-gara mie du tadi naiak tensi nah, tu kalian suruah lo makan mie baliak,” Mak Pono malunak.

“Baa kok bisa Mak, limo talua itiak bamasuak an ka mie du ?” takajuk Mantari mandanga jawek Mak Pono.

“Indak,” Mak Pono masih singkek.

“Kok takah iko modenyo, buek an lah Mak Pono aie angek ngilu kuku jo kacang padi indak bakuah gak sagaleh Tek Minar, nan netral gulo baliau,” Muncak sato pulo.

Sudah maelo angok panjang, baru Mak Pono bacarito, kalau kapatang inyo pai barayo jo urang rumah ka Singkarak sambia banostalgia mangasa maso mudo. Naiak honda baduo mangaliliang danau, sampai taraso litak baranti di lapau nan ado manjua Karambia Mudo jo mie.

“Den pasan Karambia Mudo pakai susu, nan etek kalian Karambia Mudo murni, sarato mie abuh ciek surang,” Mak Pono malulai otanyo.

“Tu lai basuok-suok an lo Mak Pono takah urang baru-baruan, atau minum Karambia Mudo ciek baduo sambia bapoto ?” Muncak manyorong ota Mak Pono.

“Oi lompong, danga an carito den lu, tadi kalian batanyo, lah den mulai biah manyorong pulo,” kalua sarengeh Mak Pono nan dijawek jo galak gadang dek Muncak jo Mantari.

Dilanjuk an dek Mak Pono, sambia manikmati pemadangan danau Singkarak, gaek laki bini ko juo menikmati mie abuh jo Karambie Mudo sampai lah masuak wakatu Asha dan pulang, Tapi gaek ko takajuk pas mambayia di kasir kanai sambilan puluah limo ribu.

“Lai baduo jo mintuo, ndak taraso bagai maha tu mak, kan dunia sadang milik baduo,” komentar Mantari.

“Atau urang lapau du, disamo an nyo Mak Pono jo anak mudo nan bapasang-pasangan du, tarifnyo babeda jo urang keluarga,” Muncak manyorong sambia galak cimeeh.

“Saumua iduk den, iko Karambie paliang maha nan den bali,” makin mangka Mak Pono mandanga komentar Muncak jo Mantari.

Baca Juga :

• Ota Lapau, Pulang Basamo Baliak Surang-Surang
• Ota Lapau, Lah Dulu DAMKAR Mangecek an
• Ota Lapau, Puaso jo Rayo Pakai Spasi
• Ota Lapau, Cadiak Tapi Bodoh
• Ota Lapau, Urang Mancaliak Bulan Inyo Mancaliak Kawan
• Sadakah Moribu Minta lo Kayo jo Parejo
• Ota Lapau, Ka Tuhan Minta Kayo ka Walinagari Minta Miskin
• Demi FB Pro, Bacaliak an Takuk ka Bini
• Bacarai Juo Nan Malakok Taruh Du