Ota Lapau, Puaso jo Rayo Pakai Spasi
tukang tulih : Fendi Moentjak
Mak Pono masuak lapau Tek Minar jo langkah layuah, buah baju tangga nan topi tarabuh lah teleng pulo. Panik candonyo, antah apo nan dipikia an gaek ko.
“Kamaa Mak Pono lah hilang san salamo puaso, diawal lai mancogok, sudah tu indak ado kamari lai,” sapo Tek Minar.
“Rancak den manyendiri di parak lai, panek karajo, mangayia di batang ayia, siko den duduak ado san nan ka mambuek den mareh, ado san nan ka den mangka an ka kalian,” jawek Mak Pono sambia manggatok kue rayo nan di adok an Tek Minar.
Sambia ma angkek kacang padi nan baru masak ka garobok, jo katan angek-angek, Tek Minar bacarito, indak taraso meriah dan seronyo rayo tahun kini dek babeda-beda, ado nan hari Jumat, ado nan hari Sabtu. Bahkan ado nan puaso hari Kamis tapi rayonyo hari Jumat, dan ado nan puaso hari Rabu tapi rayo hari Sabtu.
“Mancaracau san kau mah, indak ka minta maaf gai kau ka den, rayo hari ko mah, mantang-mantang den banyak salah acok mareh ka kau, kini rayo indak pulo kau minta maf ka den,” kato Mak Pono sambia maambiak kue bolu.
“Eh iyo yeah, lah lupo san dek mangokohan galeh, lupo basam rayo k Mak Pono,” Tek Minar ma ulua an tangan.
“Batoh kosong san mah Mak, indak ado THR pitih barunyo do mah,” sambuang Tek Minar sudah basalam jo Mak Pono.
“Oi lompong, jan dibiasoan jeh minta-minta taketu du, kini san bisa juo bahari rayo lah mujua mah, samo san jo paja kaciak, dak elok basalam minta pitih,” kalua sangik Mak Pono.
Baca Juga :
- Kampung Rambutan Diujung Ramadan
- Senja Terakhir 2025 di Jam Gadang
- Dua Pusara Merindu Diujung September
- Kabar Tengah Malam, Air Mata Mak Adang dari Perantauan
- Ratok Rukayah, Rindu Tergadai di Bilik Rantau
- Ratok Rukayah, Lebaran Ini Ia Tak Pulang
- Kupiah Usang, Cita Terbengkalai Karena Cinta
Kalua caramah Mak Pono, cubo lah caliak kini baraa banyak urang indak bisa marayokan Idul Fitri sarupo nan taralah dek ekonomi sulik, pitih sarik. Nan urang manggalah baitu juo, nan biaso jua bali maningkek bakali lipek manjalang rayo, kini biaso-biaso san indak baraa beda jo hari biaso. Jan kan mambagi THR, di rumah antah laai bakue rayo antah indak.
“Nak manuka pitih baru san antah lo sariknyo yo mak, mandaftar lo di hape lu, alun tantu lo dapek, kok dapek bana terbatas lo, pado hal dulu bajojoan pitih baru du pakai oto dari bank tagak dimuko pasa,” sambong Tek Minar.
“Lai mah tau kau,” singkek san jawek Mak Pono dek masih mangka.
Tek Minar maaliahan ota mananyo Muncak jo Mantari nan alun mancogok, biasonyo kalau libur takah kini katigo pelanggan tetap lapau Tek Minar alah absen sajak pagi, iko lah manjalang tangah hari alun ado nan tibo, cuma Mak Pono nandatang.
Mak Pono malakek an kaco mato, mulai maresek hape mamantau situasi hari rayo. Mulai dari macet sampai kejadian-kejadian salamo rayo, tamasuak babagai kejadian viral, ado induak-induak main karumeh jo jujuk-jujuk an kain di tampek sumbayang rayo, sampai ado apak-apak nan bacakak sudah sumbayang, namun itu kejadian di lua Sumatera Barat.
“Assalamualaikum mak, Maaf lahir bathin,” Muncak mancogok lansong maadok tangan basalam jo Mak Pono.
“Samo-samo, kok ado kato nan talonsong, ariak nan talabiah jo sarengeh nan takareh jo barila jo maafkan nah Ncak,” jawek Mak Pono.
“Lah makan katan Mak Pono gah ?” Muncak batanyo mancaliak dimuko Mak Pono hanyo kue bolu sarato babarapo macam kue rayo.
“Minar du nan salah nah, mangaa kue rayo nan diadok an, tantu iyo nan perai ko nan den semba dulu,” Mak Pono membela diri.
Mandanga jawek Mak Pono, Tek Minar indak namuah jalah, dikatoannyo, kalau tak di adok an kue rayo beko dikecek an lo kasek baso, rayo hari indak ndak mambasoan kue rayo. Pitih san nan bacari, nan dibaleh Mak Pono jo galak takekeh. Sadang mambahas balanjo kue rayo nan perai tibo Mantari jo penampilan barunyo langkok jo kaco mato hitam.
“Coga bana Mantari mah, kamaa pai rayo tadi gah, lakek sagalo baru yeah,” Muncak manyambuk Mantari jo penampilan rayonyo.
“Tadi nak mambao anak-anak pai barayo bukik tinggi, tapi di sapanjang Singkarak san lah macet, akhienyo bakodak-kodak di tapi danau jo makan mie tu baliak pulang lai,” Mantari manarangan pajalanannyo.
Tek Minar lah sibuk malayani urang mambali, ado nan minta bungkuhan Kacang Padi Katan, ado nan minta Katan Goreng, ado lo nan mamasan Kampiun. Katupek sangajo tak dibuek, kareno masih suasana rayo bioasonyo katupek agak lambek laku, nan laris tu kampiun. Mak Pono, Muncak jo Mantari mambahas tentang Rayo, mulai dari Sumbayang Ied nan batikai hari sampai masalah Tahanan KPK si Yaqut nan dapek cuti manjadi tahanan rumah di hari rayo nan caritonyo viral di media sosial.
“Jadi Mak Pono bilo rayo ?” tanyo Muncak.
“Den rayo hari Sabtu, ikuik Pamarintah, den Waulil Amri Minkum,” jawek Mak Pono padek. puaso puaso puaso puaso puaso
“Tapi nampak dek awak, pulang sumbayang Jumat Mak Pono lah minum cindua dimuko masajik,” Mantari sato pulo.
“Baa lai, kok puaso juo den hari Jumat tu, lah 31 puaso den jadinyo,” malunak Mak Pono nan dibaleh jo galak takekeh Mantari.
“Barati pakai spasi antaro jo puaso du mak? tanyo Muncak heran.
“Kok a namonyo lah, nan jaleh puaso den panuah tigo puluh dan den sato lo sumbayang rayo, jan kalian cikaroi juo lai,” Mak Pono manyangik.
Baca Juga :
- Ota Lapau, Cadiak Tapi Bodoh
- Ota Lapau, Urang Mancaliak Bulan Inyo Mancaliak Kawan
- Sadakah Moribu Minta lo Kayo jo Parejo
- Ota Lapau, Ka Tuhan Minta Kayo ka Walinagari Minta Miskin
- Demi FB Pro, Bacaliak an Takuk ka Bini
- Bacarai Juo Nan Malakok Taruh Du
- Ota Lapau, Cik Ayam Bubar Tapi Baunnyo Tak Hilang
- Tenggen Dek Ulah Cik Ayam
- Mati Tak Makan Dek Indak Ado Ayang
Facebook Comments