Ota Lapau, Sadakah Moribu Minta lo Kayo jo Parejo

tukang tulih : Fendi Moentjak

“Dimaa sumbayang Jumaik tadi Ncak ?” sapo Mak Pono katiko Muncak baru masuk lapau Tek Minar masih jo kupiah dan kain saruang.

“Di masajik raya,” jawek Muncak singkek dan kaniang bakaruk.

“A isi katubah katik tadi, kok taketu bana rono Muncak?” Mak Pono prihatin mancaliak Muncak.

Ditarangan lah dek Muncak, kalau Katik dari Bukiktinggi tu manjalehan tentang Keikhlasan diri sebagai Hamba Allah, tamasuak ikhlas manjalankan ibadah Ramadhan, ikhlas manyambuk bulan Ramadhan, indak menanggapnyo sebagai beban, baik beban diri nan harus menjalankan ibadah puaso sampai beban ekonomi nan maanggap bulan puaso batambah gadang pitih balanjo.

“Samo nah, den di masajik mudiak tadi, Katiknyo mambahas tentang puaso lo, amalan sunat nan nilai pahalonyo gadang salamao bulan Ramadhan. Den raso hampia saluruh katubah hari tadi mambahas tentang Ramadhan san isinyo, itu tando puaso lah dakek Ramadhan ka tibo lai nah,” Mak Pono baciloteh sambia manyuok nasi jo gulai cancang.

“Tu baa kok barek muko, taraso bana kaji katik tadi dek Muncak ? kok lai taraso tando lai bariman Muncak nah, tapi alun panuah lai, kalau urang batua-batua bariman sanang hatinyo Ramadhan datang, gembiranyo manyambuk bulan puaso, kasampatan nan diagiah Tuhan untuak memperbaiki diri nan datang hanyo sakali satahun, tapi jan laruk bana lo, duo kali jo kini dapek makan disiko pulang Jumaik lai nyo, jumaik katigo lah puaso nah, bako tarangan-angan dendeng Batokok lapau Minar gah amuah bata pahalo puaso dek nyo nah, rancak diagiah kini lu” Mak Pono taruh baciloteh.

Muncak mahelo angok, dijaweknyo kecek Mak Pono, bahsonyo kalau nyo lai gembira manyambuk Ramadhan tibo, tapi ado nan mambuek rusuah pulang sumbayang tadi.

Baru Muncak mulai bacarito, tibo Mantari basorak masuak lapau jo kupiah lagak pakiah teleang, kain sarong balilik an dilihia takah urang baliak rundo.

Baca Juga :

• Senja Terakhir 2025 di Jam Gadang
• Dua Pusara Merindu Diujung September
• Kabar Tengah Malam, Air Mata Mak Adang dari Perantauan
• Ratok Rukayah, Rindu Tergadai di Bilik Rantau
• Ratok Rukayah, Lebaran Ini Ia Tak Pulang
• Kupiah Usang, Cita Terbengkalai Karena Cinta

“Nasi ampera ciek Tek, pakai gulai cancang, ampiang kuah sapiriang, teh es tapi sakatiak san esnyo,” sorak Mantari nan duduak dimuko Mak Pono nan sadang manyuok.

“Bahagia Mantari baliak sumbayang mah, apo kaji Katik tadi ?” tanyo Mak Pono.

“Den tadi sumbayang di masajik Subarang, katiknyo manyampaian katubah tentang sedekah dibulan Ramadhan nan pahalonyo sangaik gadang dan Allah manjanjikan akan mengabulkan doa dibaliak keikhlasan sadakah nan tu,” Mantari manjawek sambia manjangkau aia kabasuah.

“Baa gak Nsi, kuyu san mah, ndak samolero atau baa, ndak cik inan mancaliak suok Mak Pono, nan capaknyo sampai tadanga ka tigo propinsi,” Mantari mancuwia Muncak nan masih tamanong.

Mancaliak Muncak lunak garik, indak Mak Pono jo Mantari sajo nan prihatin, Tek Minar nan sadang malayani urang balanjo turuk prihati.

“Den sadang ma amakan kaji katik tadi,” jawek Muncak lunak.

“Kok den alun bisa ma amakan kaji katik tadi lai, karano katonyo keikhlasan sadakah di bulan puaso,” Mantari mamotong kecek Muncak.

“Tu kaji apo nan ba amakan, sampai taketu bana lo manong Muncak, kok puaso alun lai, tadi pagi samo mangopi juo kito disiko, atau baraja ma amakan latiah jo litak bulan puaso, batahan salero mancaliak urang makan,” Mak Pono sato mananyo sambai mambasuah tangan.

“Tarompa den hilang di masajik, walau sakik hati den sadang mancubo ikhlas,” jawek Muncak data nan dijawek jo galak gadang dek Mantari jo Mak Pono.

“Nan hilang Tarompa japang, tapi rusuahnyo takah urang kahilangan tarompa Indian atau carvil, rilakan sajo lah lai, ibarat urang sakola, jikok Ramadhan adolah Ebtanas mako kejadian kini adolah pra Ebta,” Mak Pono mananangan Muncak.

“Maa jeh ado urang ebtanas dek Mak Pono kini lai gah, jan disamoan jeh zaman remedi gah jo zaman ebta sangkek saisuak,” Mantari manyanggah Mak Pono.

“Yo nah, latihan lu Ncak, nak jan Remedi lah bako,” Tek Minar lah manyorong lo.

“Nan ilang lai tarompa japang, tapi baru den bali pas ka pai ka masajik tadi, cacah malakok di tapak den lu, lah pai san nyo jo urang,” Muncak baibo-ibo nan Mantari Galak Gadang.

“Kok den bulan puaso nanti, den pabayak sadakah dan badoa ka Tuhan,” jawek Mantari nan makan sambia mancimeehan Muncak. sadakah sadakah sadakah sadakah

“Apo doa Mantari tu, lah barencanakan ban dari kini ?” Mak Pono mangatangahi perdebatan Muncak jo Mantari.

“Den minta keselamatan dunia akhirat, minta katanangan hiduk, minta rasaki nan banyak indak taputuh, minta rasaki batuka lah kijang patah kaki den tu jo pajero, kok tarompa du bak tu tako lah, lah katabao sarato den kalau pitih lah ado nanti nah,” Mantari manarangan rencana doanyo bulan puaso nanti.

“Haiyayai, sadakah limoribu nyeh, kandak banyak lo, mintak kayo jo pajero lo,” kalua sangik Mak Pono.

Baca Juga :

• Ota Lapau, Ka Tuhan Minta Kayo ka Walinagari Minta Miskin
• Demi FB Pro, Bacaliak an Takuk ka Bini
• Bacarai Juo Nan Malakok Taruh Du
• Ota Lapau, Cik Ayam Bubar Tapi Baunnyo Tak Hilang
• Tenggen Dek Ulah Cik Ayam
• Mati Tak Makan Dek Indak Ado Ayang
• Mak Pono Candu Pai Sakola, Kironyooo………
• Ota Lapau, Tu Harus Den Lapor ka Kang Dedi