Ota Lapau, Mati Tak Makan Dek Indak Ado Ayang

Ota Lapau, Mati Tak Makan Dek Indak Ado Ayang

Ota Lapau, Mati Tak Makan Dek Indak Ado Ayang

tukang Ota : Fendi Moentjak

Botak duduak tamanuang di suduk lapau Tek Minar, kopi lah dingin di galeh, nasi jo goreng ayam angek nan di mintaknyo tadi indak usak. Tak kumuah pinggan dek makan, tak ado rimah bakeh manyuok. Antah apo lah nan jadi pikirannyo hinggo nasi ndak tamakan, aia ndak taraguak.

Tek Minar nan lah tigo kali kalua masuak lapau ma anta teh es ka anak mudo nan mambuka posko bantuan untuak korban gampo heran mancaliak Botak.

Baa gak nyeh Tak, indak tasuok nasi, indak lalu kopi, sakik ko atau ado pikiran ?” tanyo Tek Minar malatak an goreng ubi angek disampiang kopi Botak.

“Patah salero wak Tek…,” jawek Botak singkek.

“Ko goreng ubi perai mah, samo jo goreng untuak anak-anak nan minta sumbangan di jalan tu, jan ragu lo lai, kudok lah,” kato Tek Minar.

Mandanga “perai” nan disabuk Tek Minar, dikicok juo goreng tu dek Botak, namun apo sabab nan mambuek salero patah alun juo di caritoan sampai Muncak tibo.

“Batoh Botak, patah salero mah, nasi tak abih, kopi ndak usak, goreng ubi sakapiang ;lo taloknyo,” sapo Muncak duduak di meja suabarang duduak Botak.

“Jan dipagarahan juo inyo, antah sadang indak lamak badan, antah sadang ndak lamak hati,” sorak Tek Minar.

Mandanga kato Tek Minar, Muncak galak takekeh. “Tek Minar, indak tau, ubek dari sagalo sakik dan sagalo rusuah Botak ko, adolah Rang Dusi,”

Ditarangan dek Muncak, katiko ado nan mamparatian, ado nan mananyo, mako damam-damam saketek bisa ilang, salero patah bisa babaliak dek karano ado “Ayang” nan batanyo.

BACA JUGA  Sanggar Seni MAN 2 Solok Meriahkan Sertijab Camat X Koto Singkarak

“Alah nak mak, jan di taruhan jeh lai, tambah patah salero wak ha,” Botak mangka mandanga cimeeh Muncak.

Tanpa dimintak, Botak mancaration apo nan dirasokannyo. Sajak sapakan terakhir ko kawan-kawannyo pamer “kemesraan” jo pasangan masing-masing. Balomba-lomba ma upload berbagai momen dengan caption “ayang”. Mulai dari ma ingek an makan, ma ngana an mandi, manjagoan lalok sampai ma ingek jan talambek pai karajo atau pai kuliah.

“Sampai malarang batanggang jo bakumpua tangah malam, beko damam, beko masuak angin lo, beko sato lo pai ba honda ngebut-ngebut tangah malam, ditangkok dek polisi, Ayang juo baru nan manalepon atau ma WA,” Botak mulai curhat.

“Jan sado diambiak asi jeh Tak, beko alun gaek lah babagai lo panyakik nan inggok, nan ado san lah nan ka dipikia an. Alun tantu sado nan punyo ayang tu peduli lai tu, caliak lah Mak Pono, lah sakian puluah tahun punyo Ayang kini marando jeh nyeh dek karno Ayang nyo pai ka Jawa,” Muncak mambari samangaik nan mabuek galak Tek Minar tasambua.

Sadang Tek Minar galak jo Muncak ma agiah samangaik ka Botak, Mak Pono mancogok masuak lapau. “Mangaa namo deyen di sabuk tadi, ado ko deyen bahutang jo Muncak?”, baru masuak Mak Pono lah manyarengeh.

Nak jan Mak Pono marabo karano tadi lah masuak dalam pembahasan, Tek Minar bagageh malatak an kopi satangah langkok jo aia angek ngilu kuku sagaleh. Ditarangannyo lah apo nan dirasoan Botak, sambia ma ambiak contoh ka Mak Pono.

“Iyo batua mah kecek Minar tu, pikia an nan patuk dipikian bia panyakikik indak timbua, karajoan apo nan patuk di karajoan bia masalah indak datang, usah iri mancaliak urang, karaso satiok kito punyo suratan, tapi nan paralu digaris bawahi, adolah wajib ba usaho baa supayo kito bisa lo sarupo urang,” Mak Pono lah mulai bacaramah.

BACA JUGA  Diyakini Sebagai Kerabat, Buaya Dibungkus Kafan dan Disambut Upacara Adat

“Kok iyo lai ndak Mak Pono pikia an, mangaa murah jeh naik tensi katiko Etek ndak disiko, mangaa Mak Pono tambah panyarengeh sajak Etek pai,” Botak manjawek.

“Haiyayai, di aja awak pulo nan disabuknyo,” Mak Pono mandanga jawaban Botak, sambia manampa meja Mak Pono kalua lapau maninggakan Botak jo Muncak.

Ota lapau lainnyo :

 

Facebook Comments

loading...
Artikulli paraprakPeringatan Isra’ Mikraj SMPN 3 Bukit Sundi, Grup Nasyid Terima Penghargaan
Artikulli tjetërBupati Eka Putra Tinjau Potensi di Nagari Parambahan Lima Kaum