Ota Lapau, Kalah Sarengeh Mak Pono dek Sangik Etek tu

Ota Lapau, Kalah Sarengeh Mak Pono dek Sangik Etek tu

Ota Lapau, Kalah Sarengeh Mak Pono dek Sangik Etek tu

tukang tulih : Fendi Moentjak

Mandanga galak Muncak jo MantariĀ  manonton tipi, mancogok Tek Minar dari dapua. Herannyo mancaliak urang nan baduo ko, nan batonton berita, tapi galak-galak saroman manonton lawak. Tek Minar nan sadang di dapua kalua dek sayuk-sayuk tadangan namo Mak Pono nan buruak sarengeh kanai sabuk.

“Berita apo tu ? ado lo namo Mak Pono babaco tadi, masuak tipi lo gaek tu ?,” tanyo Tek Minar dari baliak garobok.

Dijawek lah dek Muncak, kalau nan digalak an Mak Pono etek pejabat tu ha. Indak Mak Pono nan masuak berita, tapi panyarengeh etek ko labiah lo dari Mak Pono.

“Caliak lah dek Tek Minar, indak manyarengeh jo mahariak sajo, tapi dituruknyo urang nan disangiknyo tu, bahkan sampai ditunjuak-tunjuaknyo muko apak tu,” Muncak manjalehan.

Mantari sato pulo manyolo, jikok Mak Pono kareh suaro, buruak sarengeh namun alun ado tadanga manampa atau mamacik lihia baju urang.

“Jan kan mamacik lihia baju urang, tagak san dari tampek duduak alun pernah kalau Mak Pono manyarengeh,” kato Mantari.

Mandanga itu Muncak galak takekeh, disambuangnyo pulo, Mak Pono kalau ka Botak jo Pitok bantuak Harimau ka Kambiang, di lapau bagak nomor satu, indak ado tandingan, baraso ka kalah, suaro manenggi sakali.

“Tapi…………………,” Muncak manggantuang kalimatnyo, diraguaknyo kopi nan talatak dimukonyo.

“Tapi apo Ncak,” Mantari penasaran.

Kok dirumah, peringkat Mak Pono ka jatuah ka nomor tigo, indak ta tantang mantagi Tek Ijuih dek mamak Mantari tu do, jan kan manyarengeh, mangareh san indak talok dek mamak Mantari tu do,” jawek Muncak nan mambuek Mantari galak basikakeh.

“Baa dek nomor limo Ncak? jauah bana turunnyo mah,” tanyo Tek Minar sambia manjarangan goreng di dapaua.

BACA JUGA  Bantu 20 Sak Semen, Wabup Tanah Datar Goro Bangun Tempat Wudhu

Dijawek Muncak, kalau nan bagak nomor satu adolah Tek Juih, nomor duo, cucuk Mak Pono anak Imun nan lahia saat pandemi, nan katigo baru Mak Pono.

Sadang lamak mambahas sarengeh Mak Pono, tadanga batuaknyo nan lah tacogok dipintu lauapu Tek Minar.

“Mangaa deyen, baa kok kalian pagunjiangan, lai tau kalian hukum manyabuk urang tu, lai ka talok dek kalian manahan angeknyo api narako,” Mak Pono langsuang mancaca Muncak jo Mantari.

Mantari manjalehan tentang etek pejabat nan panyangik tu, itu bukan sakali duo kali inyo manyangik, maharik anak buah bahkan masyarakat dimuko kamera sahinggo masuak tipi.

“Tabayang dek kami jikok Mak Pono nan jadi wali nagari, tantu lah ka cok itu pulo, mahariak tiok cacah, kapalo jorong jo perangkat nagari lah masak kanai sarengeh san tiok hari,” jawaban Muncak ko mambuek Mak Pono tagalak.

“Kalian sangko deyen ko indak baliang hiduang, mahariak tiok cacah, manyangik ka anak buah,” tibo elok Mak Pono, biasonyo kalau mode iko langsuang naiak rpm gaek ko.

Katigonyo lah basijadi maota mambahas tentang etek pejabat nan panyangik tu. Baragam pandapek nan kalua dari katigonyo, di caliak dari babagi sisi, sikap etek dan panyangik ko ado kalabiahan dan kakurangannyo sebagai pejabat.

Namun ujuang-ujuangnyo, bola ko baliak juo ka Mak Pono. Muncak jo Mantari basijadi mambahas tentang sarengeh Mak Pono nan acok kalua, baiak di lapau, di rumah rundo apo lai kalau lah rapek di kantua wali.

Walau bukan anggota dewan perwakilan nagari, Mak Pono jo suaro karehnya selalu manyampaikan aspirasi membela rakyat nagari.

“Jadi untuak kalian ketahui, deyen nan kalian cap buruak sarengeh ko, pado hakikatnyo adolah sosok penyayang dan penuh perhatian, dek takuk nan deyen sayang taniayo apo lai cilako, makonyo jo kareh deyen tagah,” Mak Pono taruh maota.

BACA JUGA  Ota Lapau, Gadang Gaji Etek Kiroo Yeah

“Kok itu picayo bana kami nah mak, buktinyo raso sayang Mak Pono tu lunak dek galak manih Tek Juih,” Muncak manjawek penjelasan Mak Pono.

“Oi lompong, lah kamaaa san painyo dek kalian mah, alah nah deyen ka mangayia la lubuak,” Mak Pono bagageh kalua lapau.

Ota Lapau lainnya :

Facebook Comments

loading...
Artikel sebelumyaTBM Kelok Kreatif, Sulap Poskamling jadi TBM
Artikel berikutnyaSertifikasi Tanah Wakaf Banyak Kendala, Kemenag Sumbar Gelar FGD