Ota Lapau, Politik Panjek Pinang

Ota Lapau, Politik Panjek Pinang

Ota Lapau, Politik Panjek Pinang

tukang tulih : Fendi Moentjak

Mantari, sadang manyemir tali Anjiang di palanta bawah batang seri di suduk laman, Muncak tibo sambia maracak kureta angin, pulang olah raga.

“Dari maa Ncak, angik baun mah,” sapo Mantari.

“Batoh mah Ntari basamoan deyen jo baun jajak di Rimbo,” kalua sarengeh Muncak.

“Nan deyen katoan baun paluah Muncak angik, kok lai tantu juo basok samo jo baun jajak di rimbo, tando lai sehat juo Muncak mah, isok lah rokok satang lu,” kato Mantari Takekeh.

“Tantu lah iyo nyeh, baa ndak ka segeh, tiok hari maracak kureta ba olah raga maningkek an Imun, bia sehat dan panciuman tajam,” kato Muncak sambia bakipeh jo handuak kaciak nan tadi disandangnyo.

“Imun jeh lu, kalamari kito bahas Imun, baulang lo baliak, beko tadango dek Mak Pono kanai hariak kanai sarengeh kito,” kato Mantari dan mambuek kaduonyo galak takekeh.

Mantari mangatoan, walau indak sato olahraga maracak kureta angin tiok hari, nan hiking sakali sapakan ka rimbo kan lai olah raga juo, salain mangalua an paluah juo untuak mauji panciuman lai masih bafungsi atau indak.

“Sajak bilo lo ado baliho gadang bawarna sirah di kapalo labuah tu Mantari,” tanyo Muncak sambia manyasok kopi Mantari.

“Antah lah, patang sanjo deyen pulang dari pasa jo amak paja alun ado lai. Tapi di jalan gadang arah ka ilia ado lo gadang mambalintang jalan, gambar apak-apak bawarna kuniang,” Mantari takajuk lo, alun lamo nagari barasiah dek gambar kandidat pilkada kini lah ado lo gambar tokoh politik gadang-gadang tu baliak.

BACA JUGA  DR.Helmi; Keikhlasan Guru Sumber Keberhasilan Bangsa

Muncak jo Mantari badebat tentang gambar-gambar nan banyak di jalan. Walau indak disabuk an di baliho tu, alah bisa ditakok gambar-gambar tokoh politik tu untuak membangun citra manjalang pemilu 2024.

“Baraa lah pokok ciek gambar tu Mantari, bisa dibuek salimuk oto puso dek gadangnyo, maa nan maha pokoknyo jo Lupak punyo Mantari nan batabuh dari Jawa du,” Muncak lah mahisok rokok Mantari pulo.

“Haiyayai, angku maota, kopi deyen, rokok deyen basosoh san,” Mantari manyangik.

“Ndeeh.. baru kopi jo rokok lah manyangik lo, ndak takana wak saperjuangan sangkek di Padang Panjang sari lai,” Muncak mangalua an password nan mambuek Mantari takekeh.

Duo bakonsi sajak kaciak ko, kanti arek dari saisuak. Kadang bantuak ka bacakak, ariak mahariak, kadang takah urang ka batenju kareh mangareh kok mangecek. Tapi kok lah tasabuk parasaian sangkek sakola saisuak, kaduonyo lah galak pulo baliak.

“Baliak carito ka gambar tadi, Muncak tagak dimaa, ado nan sirah, ado nan kuniang, ado nan sanan, nan kubalu asok indak jaleh ado pulo,” Mantari mampelok an duduaknyo sambie bakipeh topi tarabuh nan lah puda.

“Iko malah nan angik, bakipehan pulo, lari salero deyen den baun nyo,” sangik Muncak sambia mamakok hiduang.

“Haiyayai, bakecek an lari salero, lah tadadk kopi deyen dek basosoh mah. Lah den kecek an iko sakalian untuak man tes panciuman, dari pado mambayia pulo di rumah sakik sakaruang bareh. Lai segeh juo Muncak mah, lai tantu juo jo baun,” Mantari indak namuah kalah.

Sudah basitangka dek baun kupiah Mantari nan angik, kaduonyo mambahas tokoh-tokoh nan tapajang di baliho gadang tu. Mulai dari partainyo, sepak terjang tokoh nan tu di kancah politik, sampai ka beberapa kasus gadang nan manyeret namo mereka, walau akhirnyo mereka bebas dengan dalil tanpa bukti.

BACA JUGA  Lebih Dekat dengan Dr. Ramadhani Kirana Putra, S.E., MM., Calon Wawako Solok

“Kok ota iko, yo jo mak Pono nan ka sero mah Ncak, sacerek kopi indak sadang dek liau kalau lah maota politik gah. Apo lai kok tabaco bulo namo tokoh jagoan baliau,” kato Mantari.

“Kok deyen indak taragak deh, Mak Pono kalau lah manyabuk politik, mudah emosi, nak manyarengeh taruh san, lah sajaleh itu jagoannyo kalah, jagoannyo salah, ditagak an juo banang basahnyo nah, kok samo gadang mungkin diajak batenju wak gaek tu,” jawek Muncak sambia mambaco parangai Mak Pono.

“Tapi wak lah samo tau jeh pakobeh Mak Pono gah,”

“Iyo, tapi deyen ndak katuju, Mak Pono gah acok mamakai Politik Panjek Pinang, mulai dari Pemilu, Pilkada sampai ka pamilihan wali, mujua san gaek ko ndak lulus tes mangaji, kok indak lah cok apo nagari awak dek nyo,” Muncak mauraikan parangai Mak Pono.

“Hobi gaek tu duo san nyeh, partamo Mareh nan kaduo Manyarengeh, jadi baa lo politik panjek pinang nan Muncak mukasuk deh ?” sambuang Mantari nan mambuek kaduonyo takekeh.

“Co lah caliak urang panjek pinang dek Mantari, demi ambisi untuak sampai ka puncak, kawan marasai kanai pijak. walu kawan ko pasrah, tapi deyen yakin ado nan indak rela. Karano pinggang sakik, pungguang marasai, kok bahu jan disabuk lai. Nan malangnya, demi mancapai ambisi ka puncak, bapijak an saku sarawa kawan. lah taroroh sarawa kawan, baa ka mamelok an nyo, awak manahan baban pulo. Kasudahannyo batahan malu demi kawan sampai kateh. Tibo diateh kawan ko bagadang hati, bajoget ma ambiak hadiah. Kawan-kawan nan manolong tadi lah taparangah san,” Muncak mauraikan nan dimukasuk jo politik panjek pinang nan nyo mukasuk.

Ota Lapau Lainnyo :

Facebook Comments

loading...
Artikel sebelumyaCovid-19 Kabupaten Solok: Bertambah 44 Sembuh, 6 Terkonfirmasi
Artikel berikutnyaKetua TP PKK Kabupaten Solok Bantu Korban Kebakaran di Sulit Air