Ota Lapau, Katiyak Samo Tasapik, Baunnyo Babeda

Ota Lapau, Katiyak Samo Tasapik, Baunnyo Babeda

Ota Lapau, Katiyak Samo Tasapik, Baunnyo Babeda

tukang tulih : Fendi Moentjak

Tatagun Mantari di pintu lapau, mancaliak Muncak galak-galak surang sambia mancaliak hape. “Dek a Muncak, lai aman ko, lah galak-galak surang san mancaliak hape.”

“Ko ha, manggalak an nan indak lawak, yo sabana lucu netizen ko kok bakomentar,” jawek Muncak

Mantari pindah duduak ka dakek Muncak, sato pulo inyo mancaliak ka hape. Kironyo Muncak sadang mambukak pesbuk nan salah satu postingannyo berita anak petani lulus Akpol, padusi pulo, dan inyo tamatan sakola paporit di Sumbar.

“Caliak lah dek Mantari komen urang ko, katonyo indak paralu diberitakan karano siapo sajo bisa ditarimo di Akpol asa utak jo fisik lai manunjang. Mangaa lo petani nyo tu ka dikamuko an bana lah biaso sajo zaman kini, dan petani bukanlah karajo derjat paliang randah atau berasal dari kumpulam kasta terbawa,” kato Muncak.

Muncak manjalehan, sabananya tulisan ko indak ado marandahan petani, tapi justru manjadi motivasi bagi para petani. Untuak mandidik jo manyakola an anaknyo samo jo anak-anak apak pejabat atau apak-apak nan hebat sakola tenggih tu.

“Kok dek deyen, iko jadi motivasi mah, bia lah apaknyo ka sawah, tapi kalau anaknyo sungguah-sungguah baraja, apo sajo cito-cito bisa tacapai,” kironyo Mantari sa pandapaek jo Muncak.

Mandanga kato Mantari ko makin basamangaik Muncak. Di katokannyo, kalau tulisan ko nampak di beberapa grup dan mandapek respon positif, mulai dari love sampai komentar dengan ucapan selamat disertai doa sukses.

“Hanyo apak-apak baduo ko nan komennyo aneh nyo Ntari, mungkin dek baliau-baliau ko sakola tenggih lo dari anak nan baru lulus ko mah,” jawek Muncak.

BACA JUGA  4120 Dosis Vaksin Covid Tiba di Solok Selatan

“Sia surang lai deh Ncak ?” penasaran lo Mantari dek nyo.

Muncak maresek hapenyo baliak, dibukanyo profil pesbuk urang nan komen tadi.

“Ooo.. apak ko, nyo yo hebat nah, kalau deyen ndak salah apak ko pernah lo jadi pejabat di kantua Pati ntah kantua walikota, pokoknyo hebat, kalau deyen ndak salah apak ko lah doktor nah,” bibia Mantari lah sarupo potok Itiak manyudu dadak.

Mandanga jawek Mantari, Muncak makin manenggi suaronyo. “Harusnyo, apak ko nan man support bia bisa lo rakyat badarai ko sakola tenggi cok inyo, bisa lo jadi pejabat di negara ko.”

Takekeh Mantari mancaliak Muncak mulai naiak lo tensinyo dek ota mambahas komentar netizen ko

Mantari bacarito, kalau inyo pernah lo badebat jo apak tu disalah satu grup pesbuk, juo karano berita media online ko.

“Katiko tu hari rayo, media ko manulis berita, pasa Solok rami bagadincik, parkir payah, jalan macet. Di komen dek apak nan kalau ndak salah juo pernah jadi pekerja media, kalau berita tu basi, indak menarik. Urang ka tau juo pasa rami manjalang rayo, harusnyo media mancari berita nan lain, misalnyo pasa langang atau apo lah. Namun setelah deyen caliak berita tu banyak pambaco dan ado iklan pulo tando lai banyak pengunjungnyo,” Mantari manarangan.

“Baa kok betu komennyo Ntari, kan wajar berita di media itu, dan rato2 isi media sarupo sampai berita di tipi itu juo,” Muncak Heran.

“Itu nan deyen ndak mangarati, padohal media memberitakan kondisi terkini, sekaligus ma agiah informasi ka masyarakat kok ka pasa hati-hati, rawan keamanan, baitu juo nan bakendaraan, macet dan parkir payah, harusnya sebagai urang pemerintah apak tu manyikapi dengan arif, kok diusulkan jalan dipaleba, atau lahan parkir ditambah, bukan mangomentari berita dengan sinis dan meremehkan tulisan urang,” Mantari makin dapek angin.

BACA JUGA  Ota Lapau, Politik Panjek Pinang

“Kadang itu lah Ncak, ndak mangarati lo wak jo urang gah deh. Tenggih sakola jo pangkeknyo, nan kondisi jo rakyat badari gah lah raso ka manggaduah inyo san, lah raso ka jadi baban san dek nyo,” Muncak maibo.

“Dari tadi maota san mah, kok abu rokok ungguaknyo lah satenggih kasiak dibongka tiper, balanjo indak, panek san si Minar manyapu,” Mak Pono nan baru mancogok lansuag manyarengeh.

“Batoh mak, baru masuak manyerengeh, salam gai lah dibaco, agiah lah conto ka nan mudo-mudo,” jawek Muncak ka Mak Pono.

“Deyen tadi indak ka singgah, tapi mandanga kalian badebat, apo lai manyabuk apak-apak nan hebat, den belok an langkah ka mari lai,” Mak Pono ma ambiak rokok dimuko Mantari.

“Kecek an san lah nak manempe jo rokok awak, banyak na alasan  jo baso basi Mak Pono mah, itu gaya zaman orde baru jeh nan babao an lai nah,” Mantari manjawek alasan Mak Pono.

Katigonyo galak takekeh, Mantari manarangkan nan dibahasnyo dan didanga Mak Pono sambia mangulek goreng ubi nan talatak di meja.

“Biasa san nyeh tu, namoo san netizen, nyo ka lamak dek inyo san bakomentar. Ibarat pituah, Katiak samo tasapik baunnyo babeda-beda,” Mak Pono manjawek sambia maambiak goreng nan katigo.

“Batoh mak, lah batuka san pituah mah, bukannya kapalo samo itam, pandapek balain-lain,” sanggah Mantari.

“Indak, barati kalian indak update. Kini indak sado kapalo itam, tapi cubolah kalian cari, lai ado katiak nan indak tasapik ?” Mak Pono maraso Manang.

Jawaban Mak Pono mambuek Muncak jo Mantari tacangang. Dijalehan lah dek Mak Pono, netizen di media sosial samo jo pitua kapalo samo itam tadi. Beragam kondisi kapalo manusia, muali dari nan abuaknyo pirang, abuaknyo jarang, abuaknyo tagak-tagak sampai abuak babigen.

BACA JUGA  Covid-19 Kab Solok: Terkonfirmasi bertambah 29 Orang, 3 Meninggal Dunia

“Iyo juo nah mak, contonyo kito batigo nan di lapau kini, tigo lo mode kapalonyo,” Mantari samangaik manjawek.

“Tigo pulo baun katiaknyo,” Muncak sato lo manyolo.

“Nan paliang parah yo Mak Pono, sudah lah abuak jarang, uban lah tumbuah pulo, kok ka dibigen raso ka piral pulo,” sambuang Mantari.

“Haiyayai tabayia maha juo deyen rokok sabatang jo goreng tigo buah mah, reputasi abuak deyen lo nan dibahasnyo,” mambirunguk Mak Pono kalua lapau.

Ota Lapau Lainnya :

Facebook Comments

loading...
Artikel sebelumyaWebinar Universitas Paramadina; Dampak Pandemi COVID-19 terhadap Fondasi Ekonomi & Agenda Pembangunan di Indonesia
Artikel berikutnyaKamabicab Pramuka Kota Pariaman Genius Umar Lantik Pengurus Kwarcab