Ota Lapau, Bangkak Dek Ulah Minyak Goreng

Ota Lapau, Bangkak Dek Ulah Minyak Goreng

Ota Lapau, Bangkak Dek Ulah Minyak Goreng

tukang ota : Fendi Moentjak

Takajuk Tek Minar mancaliak Muncak masuk lapau jo muko sambok, kaniang bangkak, hiduang nan pesek-pesek tanggung jadi ilang-ilang timbua dek karano pipi nan indak samo suok jo kida.
“Dek a muncak, kaniang bangkak, pipi sambok, bausai sarang labah atau bagaluk jo panyangek,” tanyo Tek Minar.

Muncak tak banyak kecek, nyo duduak di meja dakek jendela nan jadi posisi paporitnyo di lapau Tek Minar. “Jan banyak jeh carito Tek, paruk den litak, parasaian cok iko lo, ambiak an nasi jo goreng ayam kampuang angek,” kato Muncak singkek

“Ndak ado goreng ayam deh, nan lain sen lah,” Tek Minar manjawek sambia mamatuk kaniang jo pipi Muncak nan bangkak.

“Ndak ado ayam, jo Nila goreng gai lah,” kato Muncak

“Sakalian nan bagoreng indak ado, kok lai nio tu ikan baka, ayam baka, gulai cancang, gulai gajeboh, gulai paruk jo tambusu, a nan nio dek Muncak,” Tek Minar manunjuak ka garoboknyo.

“Wak taragak nan bagoreng-goreng, angek-angek, ndak nio nan bauah-kuah tu do,” makin maibo wajah Muncak.

“Haiyayai ndak tantu minyak sarik dek Muncak gah, sudah lah maha payah lo mancarinyo, beko den naiak an harago samba heboh lo, bakecek an lo lapau deyen palakak,” naiak lo tensi Tek Minar mancaliak Muncak.

“Batoh angek lo Tek Minar mah, lah takah Mak Pono lo mah, alun lai lah tenggih amper paneh tu, minyak manih nan sarik tensi Tek Minar nan tenggih,” Muncak dapek kesempatan mambaleh kato-kato Tek Minar.

Tek Minar makin naiak tensi, dikato an nyo, lah paradan kaki dek tagak antri mambali minyak indak lo buliah labiah dari 2 bungkuh. Salain itu banyak lo saratnyo. “Sudah lah dapek saketek, hari habih, aturan bisa wak bakureh atau karajo lain lah tingga dek antri mambali minyak,” Tek Minar bakacak pinggang manjawek kecek Muncak.

BACA JUGA  Meriahkan HUT RI ke-75, SMPN 1 Lembah Gumanti Gelar Lomba Cipta Puisi dan Disain Poster

“Lai tau etek ndak, kaniang wak bangkak jo pipi sambok gah gara-gara minyak lo mah,” jawaban Muncak mambuek Tek Minar takajuk.

“Ha ??? baa betu ? ” Tek Minar duduak di meja sabarang Muncak dek nak tau penyebab muko Muncak sambok.

Muncak mancaritoan kisahnyo, kapatang amak paja pai mambali minyak jo nak gadih nan gadang, lah bahonda baduo baranak. Lah antri, tibo di rumah manjalang masuak waktu ashar. Lah salamo itu dek pai cuma dapek minyak 2 bungkuh, itu pun lah sato antri kaduonyo amak jo anak.

“Di lokasi amak jo anak ko cak-icak ndak kenal san, pas tibo giliran masing-masing dibatasi minyak hanyo buliah sabungkuh surang,” carito Muncak.

“Tu a lo masalahnyo jo muko Muncak,” Tek Minar penasaran.

“Dek karano cuma dapek jatah duo bungkuh, hari habih sahari batapiak, tu awak cameehan. Sanjo nyo wak pai ka mini market di kapalo labuah tu ha, pulangnyo tabao minyak ampek bungkuh, indak habih wakatu sahari,” Muncak mulai bacarito.

“Kan lai rancak deh, lah tabao minyak dek laki, hari tak lo habih, baa kok marabo lo ibu negara tu ? lai ndak minyak bacilok nan Muncak bao pulang ?” kanai caca Muncak dek tanyo Tek Minar.

“Haiyayai, minyak bacilok baa lo dek Tek Minar gah,” mangka Muncak mandanga kato-kato Tek Minar.

Ditangan dek Muncak, bahaso nan punyo minimarket tu pole sangkek sakola dulu. Pas lalu dimuko kadai tu Muncak mancaliak urang rami antri minyak. Ditamui lah Piak Banun tu, diota saketek sambia mangana maso lalu, dapek lah Muncak bakandak minyak ampek bungkuh.

“Tibo dirumah, diagiahan minyak ko sambia mancaritoan kronologisnyo, langsung dilakaknyo muko awak jo baskom kanso nan sadang dipaciknyo. Sudahlah bunyinyo balangkang tibo di kaniang nan pipi lah sambok, kaniang lah bangkak,” carito Muncak mambuek Tek Minar kakah dek galak.

“Alah nan Tek, jan kan ibo lai, basijadi nyo manggalak an awak, sudah lah saku bangka dek harago minyak kini muko lah bangkak lo dek perjuangan mandapek an minyak,” Muncak manggarutok kalua lapau.

BACA JUGA  Batele Plus dari Solok Masuk Finalis Youtube NextUp Indonesia Tahun 2021

Ota Lapau lainnya :

bangkak  

Facebook Comments

loading...
Artikulli paraprakBupati Agam Lepas Peserta Pawai Ta’aruf Khatam Qur’an
Artikulli tjetërWujudkan Pengamalan Dasa Darma, Pramuka SMPN 2 Danau Kembar Gelar Aksi Bersih Gunung Talang