Ota Lapau, Gadang Gaji Etek Kiroo Yeah
tukang tulih : Fendi Moentjak
Botak basorak minta kopi sakarek katiko masuk ka lapau Tek Minar. Sambia manyeka kapalo licin nan basah dek hujan disaponya Muncak jo Mantari nan lah dulu duduk dalam lapau.
“Baa dek capek pulang dari pasa Tak ?” tanyo Muncak
“Langang mak, hari hujan indak ba urang pasa do,” jawek Botak sambia mandinginkan kopinyo ka tadah.
“Kan lah dapek bareh satanak, bisa lo pambali ameh, balabiah pulo untuak cicilan Mio. Ndak baa tu do, pulang lah lai, elok di rumah lai dari pado badingin-dingin di pasa,” Mantari sato lo manyolo nan mambuek Muncak galak takekeh.
Dikatokan dek Muncak, kalau Botak indak usah bapupuah bana karajo, karano nan dikurehan alun ado.”Dapek bali rokok, bisa bali cip, balabiah untuak ka kolam panciang alah tu mah,” cimeeh Muncak nan dijawek Botak jo galak masam.
“Tapi walau awak tukang parkir, awak bangga mak, karano awak maraso labiah kayo dari Etek nan sadang viral dek gaji gadang tu ha,” Botak manjawek sambia manggatok goreng ka kawan minum kopi.
Maraso dapek angin, Botak mancaritoan kalau manjadi tukang parkir tu adolah salah satu anugrah dalam hiduknyo. Karano banyak urang nan mampicayokan haratonyo ka Botak, mulai dari roda duo sampai roda ampek, dari nan kredit sampai nan alah cash, dari nan baru sampai nan lah guyah.
“Gadang gaji Awak ba iriangan jo etek nan piral tu mah Mak, dari soal pendapatan. Wak punyo gaji, dapek tunjangan, ado uang makan, ado uang kunjungan dan lain sabagainyo,” Botak mulai bacarito nan mambuek Muncak jo Mantari takajuk, karano ndak manyangko.
Dicaritokan dek Botak inyo dibari kepercayaan dek induak samang mengelola parkir, dan digaji tiok pakan. Soal makan, Botak punyo rekening khusus di lapau nasi sapuluah ribu di suduk pasa, Seluruh anak parkir makan siang disitu, bos nan mambayia.
“Soal dana kunjungan, Botak ado pulo, karano inyo dipicayo mamonitor apek petak lokasi parkir punyo bos, satiok mamonitor ka masing-masing lokasi selalu jatah minimal rokok sabungkuh,walau indak sagadang dana kunjungan Etek tu yang penting ado” Botak basumangaik manjalehan.
Ditambahkan dek Botak, kalau pasa sadang rami tautamo hari balai, Botak jo anak parkir lainnyo dapek bonus dari bos
“Yo santiang Botak kiroo yeah, lah salevel jo etek du. Cuma ado bedanyeh stek, etek du lah nan kaduo mangacak dunie nan Botak alun sakali alah jeh lai,” Muncak manyolo ota Botak
“Haiyayai, lah kamaa san pai carito Mak Muncak gah, tapi gaji gadang nan dibahas tadi,” Botak bagageh mahabihan kopi dan kalua lapau.
Ota Lapau Lainnya :
- Tangga Sarawa Dek Ulah Kakek Merah
- Abih Main Dek Ulah Surek
- Politik Panjek Pinang
- Katiyak Samo Tasapik, Baunnyo Babeda
- Lah Marasai Imun dek PSBB jo PPKM
- Pancarian Padiah Kawan Manjauah
- Ciloteh Mak Pono, Pitih Sarik Bini Baulah
- Ciloteh Mak Pono, Urang Nan Mancalon, Mangaa Awak Tabao Gil
- Lapau Kalambu Tangah Malam
- Pitih Sarik Bini Baulah
Facebook Comments