Ota Lapau, Abih Main Dek Ulah Surek

Ota Lapau, Abih Main Dek Ulah Surek

Ota Lapau, Abih Main dek ulah Surek

tukang tulih : Fendi Moentjak

Mantari sadang maresek-resek layar hape di palanta lapau mambaco berita tentang surek nan viral, katiko Muncak masuak. Sadang serius bana, sahinggo inyo indak tau kalau Muncak lah duduak disabalahnyo.

“Apo nan bacaliak tu Mantari, serius bana, ado lo kelapa muda baru ciek lai,” sapo Muncak.

“Kok kelapa muda, indak buliah siko bukak doh, maagiah kabaji ka lapau mah, bagai san Muncak mah. Ko ha, berita angek tentang surek. co lah Baco baco dek Muncak,” Mantrari ma agiahan hape nan sadang dipaciknyo.

Sudah mambaco berita tu, takekeh Muncak dek galak. Dicaliaknyo beberapa berita dari media online nan babeda, kironyo banyak banyak berita terkait nan mambahas tentang surek nan diomukasuik Mantario tadi.

“Baa dek galak Muncak ?” tanyo Mantari.

“Dek mambaco berita surek ko manjadi viral karanio surekj rahasia ko menjadi konsumsi publik. Kini nan punyo surek malu dan manjadi sensitif. Sahinggo indak buliah ditanyo, indak buliah mandakek kok ka mambahas surek ko juo. Takana dek deyen katiko kito di Gantiang dulu Mantari,” jawek Muncak.

Tamanuang Mantari mandanga jawek Muncak, apo pulo hubungan surek kini jo carito sangkek sakola dulu. Iko nan dibaco berita politik bukan carito anak sakola, tapi dek Muncak nan takana kajadian tigo puluah tahun silam.

“Nan maa du Ncak, ragu deyen ha. Apo pulo hubungan carito politik ko jo kisah sangkek sakola dulu,” Mantari masih ragu.

“Lai takana dek Mantari, katiko Mantari manyalek an surek cinta dalam catatan nan bapinjam. Kironyo buku ko di kumpu an dek guru, dan surek ba karateh bungo tu dapek di guru, sampai Mantari jadi perbincangan hangat lo tiko itu hinggo mandapek julukan playboy cap kapak,” jawek Muncak nan mambuek kaduonyo galak takekeh.

BACA JUGA  Ota Lapau, Politik Panjek Pinang

Kaduonyo maulang carito parangai di sangkek sakola. Sudah mambuek PR, kaduonyo mambuek surek jo karateh bungo nan dibali di poto kopi dakek sakola. Nan marangkai kato-kato di karateh harum tu Muncak, baragam kato puitis penuh sanjungan tatulih rapi dalam paragraf demi paragraf, indak lupo ditutuk jo pantun.

Mantari nan namonyo tatulih di ujuang surek manekan jo pena hero. Pena maha dan istimewa sangkek itu.

Bukan hanyo sapucuak surek, tapi ado tigo pucuak surek dengan isi yang samo namun tujuannyo babeda. Sahinggo karateh bungo nan di bali sabungkuih, abih di tulih malam itu juo.

Sudah ditulih dan dimasuak an ka dalam amplop, bia harumnyo indak hilang, bamasuak an ka dalam plastik, kamudian dilatak an diateh kapalo dipan. Pagi sabalum barangkek sakola baru surek-surek ko di masuak an ka buku urang nan dituju dek surek.

Paginyo barangkek sakola sangaik basumangaik karano ado harapan baru di dalam tas, yakni surek jo karateh bungo. Indak tapikia dek Mantari jo Muncak katiko itu, andai sajo urang-urang nan dituju dalam surek tu manjawek sasuai harapan.

Tibo di sakola, Muncak nan tukang tulih surek juo mandapek tugas manyarahan surek jo buku catatan. Tiko itu juo sdang tenar lagu Iwan Fals nan bajudul Buku Ini Aku Pinjam.

Malang ka disabuk, dek nan punyo buku ko langsuang di sarahan ka guru nan maminta tugas. Surek di dalamnyo indak di ambiak, walau alah dibisiak an dek Muncak, ado titipan dari Mantari didalamnyo.

Surek kaduo, banasib sarupo. Amplop bungo bawarna biru mudo tu tajatuah katiko nan punyo buku bagaluik jo kawan sabangku. Akibatnyo surek itu di parabuik an dan dibaco kawan sekelas. Abih main Mantari tiko itu.

BACA JUGA  Kerumunan di Kawasan Mandeh dan Carocok Painan Dibubarkan Tim Terpadu

Indak di kelas, indak di kantin, apo lai dilapangan katiko babarih pagi. Surek nan tajatuh tu jadi bahan olok-olok, sampai kanai panggia Mantari dek guru katiko itu.

Alun salasai masalah surek jatuah, panggilan berikutnyo dari guru Fisika nan dapek surek Mantari dalam buku tugas anak padusi. Batambah tenar Mantari, karano guru-guru di kantua juo mambahas surek itu.

Mujua surek ka tiko lai salamaik sampai ka urang nan dituju, namun malang, Mantari ditulak mantah-mantah sekaligus diagiah julukan Playboy cap Kapak.

“Lah masiak tunggua gigi dek galak mah, indak ka mamasan kopi bagai,” kato Tek Minar sambia manuka cerek dimuko Muncak

“Batoh mah, kasa rang lapau mah,” jawek Mantari sambia maminta kopi sakarek.

“Sajak bilo Mantari paraso, sadangkan lai kareh, balimpik juo bon di buku,” Jawek Minar.

Ota Lapau Lainnyo :

Facebook Comments

loading...