Ota Lapau, Takuk Kanai Suntik, Abih Kiramaik Mak Pono dek Buk Bidan

Ota Lapau, Takuk Kanai Suntik, Abih Kiramaik Mak Pono dek Buk Bidan

Ota Lapau, Takuk Kanai Suntik, Abih Kiramaik Mak Pono dek Buk Bidan

tukang ota : Fendi Moentjak

“Baa kok di lua Mak Pono duduk, indak bukak lapau Tek Minar,” sapo Muncak mancaliak Mak Pono duduak di palanta bawah batang seri dilaman lapau.
“Cah lai, Minar pai ka mahkola ma urus anaknyo nan ka disuntik caca,” jawek Mak Pono nan bakipeh jo topi tarabuh usang.

“Tanyo ciek Ncak, kini anak sakola kok ka dicaca, mesti pai lo urang gaeknyo dulu, buek surek pernyataan lo lu, tanda tangani lo lu, iyo betu ?” Mak Pono manyalai rokok nan di latak an Muncak.

Mandanga ocehan Mak Pono nan manyabuk suntik caca takekeh galak Muncak, karano suntik caca ko istilah zaman saisuak untuk anak SD tarutama kelas atau kelas duo nan di imunisasi dek pemerintah melalui petugas Puskemas nan datang ka sakola-sakola.

Tabayang dek Muncak, sangkek nyo sakola dulu, satiok mancaliak ado petugas dari Puskesmas atau Bidan nan datang ka sakola, suasana sakola barubah mencekam. Ado nan pucek, ado nan takuk bahkan ado nan manangih dan kabur dari sakola.

“Kini urang ndak basuntik caca do mak, tapi vaksinasi covid-19 nan gunonyo untuk memperkuat dayatahan tubuh dari serangan virus corona. Kapatangko masyarakat nan divaksin kini anak-anak usia sakola 6-11 tahun,” Muncak manjalehan ka Mak Pono.

“Kok apo lah namonyo, kok ka paksin, kok ka caca nan jaleh basuntik,” jawek Mak Pono.

“Tu mak Pono lah sudah ba paksin du ?” tanyo Muncak.

“Alun, deyen takuk basuntik,” kato Mak Pono singkek.

“Kalumbahari nampak dek awak ado polisi datang batigo jo pak Jorong ka rumah Mak Pono mangaa deh, ndak manjapuk Mak Pono pai paksin ka kantua wali ?” Muncak penasaran.

BACA JUGA  Ota Lapau, Tangga Sarawa Dek Ulah Kakek Merah

Ditarangan lah dek Mak Pono, katiko tau ado Polisi datang ka rumah mangajak pai paksin ka kantua wali nagari, Mak Pono manyuruak ka ateh pagu. Dek mamanjek bagageh, lah rawih siku kanai sandiang tonggak nan kaniang lah luko kanai paku atok nan tasumbua dari kasau.

“Iyo deyen takuk, deyen pai manyuruak ka ateh pagu, untuang polisi jo pak jorong lai singgo laman san. Urang rumah jo minantu nan pai ka kantua wali, baliak dari basuntik du dapek minyak sakilo surang, talua salapiak,” jawek Mak Pono.

“Kan lai sato Mak Pono makan talua nan dapek dari paksin du?”

“Lai, rugi lah kok indak, lah tailak lo balanjo sakali masak nah,” jawek Mak Pono mambuek Muncak galak takekeh.

“Basuntik tak amuah, diagiah talua kancang, dapek minyak manih galak,” badarai Galak Muncak.

“Nan jaleh talua jo minyak du lai ndak raso paksin,” jawek mak Pono mangka.

Mancaliak Mak Pono mulai mangka, Muncak makin bajadi mampatelean. “Mak Pono ndak amuah pai paksin karano nan manjapuk Polisi, kok bidan nan gadih-gadih kamek du nan pai manjapuk baa gak ati?”.

“Hai ya yai jeh, sadangkan nan basanjato san deyen tak amuah apo lai indak,” mulai kalua sarengeh Mak Pono.

“Tapi wak ndak yakin, cubo lah kalau bidan atau petugas medis nan kamek-kamek nan tibo yakin wak, guyah iman Mak Pono nah,” Muncak taruh manyasak an Mak Pono.

Kato-kato Muncak mambuek Mak Pono paneh, dicaritoan lah sangkek sakola dulu kalau lah nampak ado Bidan tibo, Mak Pono langsuang cabut dari sakola karano takuk kanai suntik caca. Ado sakali, Bidan ko datang indak jam kalua main, tapi katiko urang sadang baraja, dan sangajo lo indak pakai baju putiah, termos vaksin nan dibaok indak lo sarupo nan taralah, lah tacogok san dimuko pintu jo kapalo sakola dikawal pulo dek panjago sakola nan lansong manyaok jo mangunci pintu.

BACA JUGA  Mak Pono, Jangan Salah Menilai

“Tiko tu yo abih karamaik deyen, sambia mamakiak den pabiyaan lagan ko dicucuk jarum suntik buk bidan tu,” Mak Pono mangana sejarah suntik caca nan pernah dialaminyo.

“Jadi Mak Pono nan buruak sarengeh, indak takuk jo ladiang, bagak dalam nagari, indak pamiliah lawan bacakak, ternyata takuk jo jarum suntuk buk bidan,” Kato Muncak sambia galak bakuai nan mambuek Mak Pono tambah paneh.

Ota Lapau lainnya :

Facebook Comments

loading...
Artikulli paraprakIstri Camat Palembayan Meninggal Dunia, Mobil Dinas Tabrakan dengan Truk Tangki
Artikulli tjetërPDAM Tirta Langkisau Gratiskan 500 Sambungan Air Bersih