Ota Lapau, Mangaa Digoreng Juo Abuh San Lah

Ota Lapau, Mangaa Digoreng Juo Abuh San Lah

Ota Lapau, Abuh San Lauak Tu Mangaa Digoreng Juo

tukang ota : Fendi Moentjak

“A tu Tek Minar, mambirunguk juo, lah basirabuk ocehan etek jo dasia lauak masuak minyak mah,” sorak Muncak masuak ka dalam lapau.
“Baa ka indak dek Muncak, minyak maha nan harago samba tak naiak doh, bilo lo wak ka kayo,” Tek Minar manjawek dari dapua.
“Lauak mati nan bajua, maha pulo, tantu iyo ndak amuah urang,” Muncak manjawek sambia duduak di suduk lapau meja paporitnyo.

“Lai namuah Muncak makan lauak iduk, deyen latak an di pinggan ka makan Muncak du lauak mangalepa kalua dari ayia tu, yo lai ka takao!,” Tek Minar mancogok sambia bakacak pinggang.

Dalam Tek Minar jo Muncak bakareh arang, Mantari tibo nan hondanyo barisi karambia sakaruang ditagak an dimuko lapau.

“Apo tu bakaruak arang jeh baduo, latak an lah kopi lai, lah gak kabua pancaliak an ha,” sorak Mantari malarai Tek Minar jo Muncak.

“Ko konsi Mantari, mambuek naiak gulo deyen san, lah cok itu urang heboh minyak goreng naiak, nyo mangaleke jeh, kok ka mainta minta goreng lauak atau goreng ayam angek-angek, tibo harago minyak naiak, cak icak indak tau, di naiak an harago, dikatokan pulo urang lapau palakak,” Tek Minar makin manjadi.

Sambia mambuek kopi, Tek Minar indak baranti mangoceh, nan Mantari jo Muncak lah maota lo sambia manonton berita di tipi.

“Keceknyo di tipi minyak lah turun, lah ampek baleh ribu, kenyataannyo alun juo lai,” oceh Tek Minar sambia malatakan kopi untuk Muncak jo Mantari.

“Itu kan di pasar ritel, atau mini market tertentu nan indak ado di nagari kito, salah Tek Minar mangaa mini market tu ndak baagaih izin ba operasi disiko,” jawek Muncak.

BACA JUGA  Ota Lapau, Pak Pati nak Ba Bini Ciek Lai

Mandanga jawaban Muncak makin manggalagak Tek Minar. “Ooo jadi angku labiah cenderung jo mini market nan bamerek du, ndak ibo angku jo anak kamanakan angku nan balapau nan bausao manggaleh untuak tambahan bali bareh, nan ka mati lapaunyio dek kalah bersaing jo mini market du,”

“Bako lah basiarak tu Tek, tu lauak di kuali lah anguh tu ha,” salo Mantari.

“Alah deyen mati an, ayam tadi tu mah ndak lauak tu doh, danga an lah ota deyen lu,” Mantari satio kanai gas pulo dek Tek Minar.

Tek Minar mancaritoan, sajak harago minyak goreng naiak, induak-induak paliang marasokan dampaknyo. Baiak untuk kebutuhan rumah tangga, apo lai untuak pelaku usaha kecil sarupo nan manggaleh goreng sampai nan balapau nasi.

“Tu karambia sakaruang diateh Honda ka Mantari pangaa kan tu,” Muncak ma alihan carito.

“Lah panik lo Mantari, ado lo nampak nan ka digelek ? tanyo lah ka induak bareh du, lai sadang balanjo nan baagiah, dek bali minyak sajo lah tekor nyio mah,” alun sempat Mantari manjawek kato-kato Muncak disalo langsuang dek Tek Minar.

“Batoh mah Tek, awak lo nan kanai, tadi etek angek ka Muncak, baa kok awak lo nan kanai gas,” Mantari mambela diri.

“hahahaha,.,, baa lai Mantari, kalau minyak angek gah lah kamari pai san angek jo singaga nyo mah,” Tek Minar galak takekeh.

“Gara-gara harago minyak naiak, lah mamindah sarengeh Mak Pono ka Tek Minar,” Muncak dapek angin, babaliak manggalak an Tek Minar.

Sadang katigonyo galak-galak mambahas dampoak harago minyak goreng naiak tibo Mak Pono nan disabuk Muncak tadi.

BACA JUGA  Urang Bapolitik tu Saroman Urang Bapole

“Mangaa namo deyen disabuk-sabuk?” tanyio Mak Pono singkek baru masuak lapau.

Ditarangan lah dek Muncak, Tek Minar sajak tadi bakatai-katai manggarutiok haragio minyak goreng naiak nan mambuek galehnyo rugi.

Mak Pono nan duduak disabalah Mantari, langsuang ma ambiak tadah, diparonyo kopi nan masih barasok tu. “Batoh mak, main karek san mah,” sapo Mantari.

“Deyen tagageh, kok dimintak kopi sakarak bako lamo lu duduak, lamak lo ota, cah lai wakatu luhua masuak,” jawek Mak Pono mahiruk kopi di tadah.

Ditarangan dek Mak Pono, sabananyo kalau tingga di kampuang ko tak do nan sulik. Kalau minyak maha takah kini, kan bisa mambuek minyak tanah dari karambia. Mangaa harus mambali minyak dilapau.

“Ko indak, karambia bajua, minyak babali, kok iyo lai pitih manjua karambia tu nan babalikan ka minyak indak baa doh, tajua karambia duo tandan aturan dapek minyak limo kilo, tapi nan sampai ka induka bareh cuma sakilo, banyak bana patahnyo,” Mak Pono lah mulai lo bakatubah.

“Tu ka sia Mak Pono madok kini tu ?” tanyo Muncak.

“Batoh mak, kopi baparo, tapi sindiran mak masuak juo,” Mantari sato pulo.

“Sorry Mantari, lupo deyen, ado karambia diateh Honda Mantari, lai ndak ka bagelek lo karambia tu Ntari ? saran deyen, dari pado bakaruak arang indak bakasudahan dek harago minyak maha, rancak Abuh san samba tu lai, mangaa di goreng juo, sudah lah maha, kolesterol naiak pulo deknyo,” Mak Pono malakek an kupiahnyo sambia kalua maninggakan Muncak jo Mantari.

Ota Lapau lainnya :

Facebook Comments

loading...
Artikulli paraprakMinyak Goreng Satu Harga, Pemkab Solok Laksanakan Rapat Evaluasi
Artikulli tjetërDi Tanah Datar, 4 Pustu dan 20 Polindes Belum Miliki Nakes