Ota Lapau, Tangga Tingkuluak dek Konde

tukang tulih : Fendi Moentjak

Hampia tagolek Mak Pono dimuko Lapau One dek turun dari kureta angin bagageh dek emosi. Antah apo nan mambuek gaek ko naiak darah, muko sirah saroman udang diabuh. Nan buah baju tangga duo subalah kateh, kaki sarawa nan sabalah taguluang cando rajuk barsisi saparo.

Tak ado nan manyapo, karanio lah tahu kurenah Mak Pono, kalau sadang emosi rancak dicaliak san, kalau disapo, bisa-bisa nan manyapo kanai sarengeh atau kanai hariak dek Mak Pono malapehan emosinyo. Muncak jo Mantari nan sajak tadi basijadi mambahas parang Iran, tabaok anok pulo sambi mancaliak Mak Pono masuak lapau duduak dimpalanta suduk dakek jendela.

Nan Tek Minar baitu pulo, mancaliak jauah saji dari balakang garobok, manunggu garik Mak Pono, kok maimbau. Kok indak nyo anok sajo.

“Ndak ba urang di lapau gah,anok san sadonyo mah, kuciang san masuak ado juo nan manyapo,” kalua suaro Mak Pono sambia tatapannyo baputa ka sasisi lapau.

“Dek Mak Pono sadang naik tensi, takuk kami manyapo,” jawek Tek Minar sambia malatak an aia putiah ngilu kuku.

“Mak Pono masuak anok lo, indak mambaco salam, Ayam san naik tadanga juo suaronyo,” Muncak sato lo manjawek.

“Tu bakecek an den samo atau kurang lo dari Ayam ?” tadanga parau suaro Mak Pono dek manahan emosi.

“Ndak amuah gah Tek, buek an lah jus Timun sakatiak san gulo jo esnyo, ibo wak, tenggih bana tensi Mamak wak nampaknyo mah” Mantari sato pulo.

“Ndak nio den jus tu deh, cancang san Timun du, agiah gulo salayang,” lah mulai malunak Mak Pono.

Manunggu Tek Minar mambuek cancang Timun, lapau lah anok pulo baliak. Muncak jo Mantari asik maresek hape, nan Mak Pono lah tasanda san duduak sambia maela angok bakipeh jo topi tarabuh usang. tangga tangga tangga tangga tangga tangga 

“Lai manih mak ?” tanyo Muncak, mancaliak Mak Pono batali san manyendok cancang Timun nan dibuek an Tek Minar.

“Dimaa lo nyo ka manih, den mintak gulonyo sakatiak san, pi ka ubek,” walau manyangik, suaro Mak Pono indak sakareh tadi.

Indak lamo dek Mak Pono mahabihan cancang Timun sagaleh tangkai, lah disambuang lo jo aia putiah ngilu kuku sagaleh. “Kalian mambao kasiak san kamari, Minar nyo manggaleh mah,” suaro Mak Pono sambia manyeka muncuangnyo.

Mancaliak Mak Pono lah gak dingin, Muncak maajak gaek buruak sarengeh tu maota. Dubuka jo ta parang Iran nan balanjut sampai kenaikan harago BBM non Subsidi nan malonjak tajam, sampai ka pernyataan Bahlil kalau BBM Subsidi indak ka naiak haragonyo sampai akhir tahun.

“Jadi a nan mambuek teni Mak Pono naiak tadi du ?” tanyo Muncak.

Dicaritoan lah dek Mak Pono, tadi pagi baliak dari batang aia tibo di rumah disambuk dek cucu ka pai sakola pakai baju kebaya jo sanggua gadang, indak pakai baju kuruang jo jilbab sarupo nan taralah. Kutiko ditanyo alasannyo, disuruah guru karano kini hari Kartini, jadi seluruh anak sakola nan padusi pakai kebaya jo sanggua ala Kartini.

“Co lah kalian pikia, baa den dak ka tarabo, tangga jilbab paja dek mamaki sanggua ala Kartini du. Takuk lo ka parintah guru dari pado parintah Tuhan nan manutuk aurat,” manggalagak pulo tensi Mak Pono mancaritoan baliak.

“Tapi nyo kan lai masih SD mah mak, kan dek a lo nyo ndak bajilbab, masih anak-anak baru,” Mantari mancubo mananangkan Mak Pono.

“Justru dek anak-anak tu lah dibiaso an sajak kaciak manutuk aurat, kalian kecek an gampang dulu pamarintah maubah aturan pai sakola pakai busana muslim, lai takana dek kalian baa dulu PERDA wajib babusana muslim ko dibuek, kini dek memperingati hari sahari, tangga saok kapalo dek nak mamakai konde du,” makin angek Mak Pono.

Alun habuh emosi Mak Pono, disabuknyo lah namo-namo Pahlawan Padusi dari Ranah Minang, sudah indak terkenal, jarang pulo tasabuk dalam palajaran sakola sarato di berbagai media.

“Cubolah buek pulo peringatan hari lahir Rahmah el Yunusiah, Rohana Kudus atau Rasuna Said dan mungkin disatiok daerah banyak pulo pahlawan padusi nan indak populer tapi bjaso ka negara atau saindak-indaknyo ka nagari masiang-masiang.” lah sirah pulo muko Mak Pono baliak.

Baca Juga :

• Ota Lapau, Mie Abuh 25 Ribu
• Ota Lapau, Pulang Basamo Baliak Surang-Surang
• Ota Lapau, Lah Dulu DAMKAR Mangecek an
• Ota Lapau, Puaso jo Rayo Pakai Spasi
• Ota Lapau, Cadiak Tapi Bodoh
• Ota Lapau, Urang Mancaliak Bulan Inyo Mancaliak Kawan
• Sadakah Moribu Minta lo Kayo jo Parejo
• Ota Lapau, Ka Tuhan Minta Kayo ka Walinagari Minta Miskin
• Demi FB Pro, Bacaliak an Takuk ka Bini