Ota Lapau, Tangga Sarawa Dek Ulah Kakek Merah

Ota Lapau, Tangga Sarawa Dek Ulah Kakek Merah

Ota Lapau, Tangga Dek Ulah Kakek Merah

tukang tulih : Fendi Moentjak

Mak Pono tagageh manyandakan kureta anginnyo ka batang seri di muko lauapu Tek Minar. Mukonyo makin sirah mancaliak Muncak jo Mantari duduak sambia mamacik hape.

“Ko ciek lai, indak nan gaek indak nan kaciak, abih hari dek hape, kadang galak-galak surang kadang manyaringik, amuah lo bahampehan hape du bagai. Lah pado tea, amuah tangga sarawa karano kakek merah,” Mak Pono manyarengeh ka Muncak nan mancaliak ka Mak Pono duduak di meja sabarang.

“Batoh Mak, baru tibo lah marabo, mareh-mareh indak tantu san. Kanai sangik dek mintuo di rumah jan ka kami lo dihampehan,” Jawek Muncak.

“Tek Minar, buek an kopi paik sagaleh gadang untuk Mak Pono. Kok lai ado mantimun, buek an cancang skali, bia nak turun tensi baliau,” Mantari sato pulo manyolo.

Sambia bakipeh jo topi tarabuh nan lah pirang, Mak Pono mancaritoan, kalau inyo naiak tensi dek karano cucu nan gadang lah pandai lo manggelek karambia. Tadi katiko pai ka parak, kadapatan cucunyo tu sadang ma ambiak karambia jo kawannyo baduo urang.

“Patuiklah karambia di parak, indak elok gaek lah hilang sajo, alun talakik dek awak mancari Baruak, lah sudah dek inyo ma ambiak,” curito Mak Pono.

“Rancak lah nyo tu, barati cucu Mak Pono labiah santiang dari Baruak, dan mamak indak susah pulo mancari nan ka ma ambiak jo mambao ka balai,” Muncak manyolo sambia galak.

“Oi lompong, danga an lah carito deyen lu, jan manyolo juo,” kalua sarengeh Mak Pono.

“Hahaha.. kan san mak, nan nyo lakukan dek cucu kini, kan lai ndak parangai Mak Pono sangkek mudo dulu.” Mantari takekeh dek galak mancaliak Mak Pono angek.

BACA JUGA  Bukittinggi Raih Penghargaan Eliminasi Filariasis dari Menkes RI

Dicaritokan lah dek Mak Pono, kalau karambia itu di jua dek cucunyo tapi pitih indak disetor. Hasia manjua karambia digunokanĀ untuak pambali cip main game online. Siang malam, dimaa duduak, habih hari dek main hape, indak tantu sakola, indak tantu kakok manolong rang gaek.

Tibo deyen di lapau, kalian sibuk lo main hape, sato lo kalian mambali jo main kakek merah du ?” alun juo abih sarengeh Mak Pono.

“Makonyo Mak Pono jan langsung manyarengeh san, caliak dulu, tanyo dulu, apo nan urang caliak di hape, indak sado urang mamacik hape ko main kakek merah nan mamak sabuk tu, kami mambaco berita urang maliang kotak amal masajik pakai kolor sajo,” Mantari manjalehan ka Mak Pono.

“Apo ? mancilok di musajik hanyo pakai kolor ?, kanai pasal berlapis nyo tu mah,” takajuk Mak Pono mandanga jawek Mantari.

“Tu makonyo Mak, guno an hape tu ka nan bamanfaat, caliak berita, bia update informasi, ko dek Mak Pono abih paket dek manonton, sajak VPN kanai blokir Mak Pono lah maleh san mancaliak hape,” sindia Muncak.

“Baa lo carito mancilok di musajik pakai kolor tu, biaso nan tadanga kolor ijau nan mamanjek jendela manggaduah induak-induak jo anak gadih,” tanyo Mak Pono penasaran.

Dicaritokan lah dek Mantari, bahso pelakunyo adolah paja-paja jolong gadang. Masuak ka masajik hanyo pakai kolor. Jo batilanjang tu lah mereka manggasak kotak amal dalam masajik. Namun mereka indak sadar kalau aksinyo terekam cctv masajik. Kasus ko lah dalam penanganan polisi dan paja-paja pelaku ko alah ditangkok.

Muncak sato lo manyolo, di daerah lain, ado nan sampai mambunuah, marampok dek gara-gara untuk pambali cip atau kakek merah. Samantaro pitih indak ado, maminta ka urang gaek indak dapek karano indak ado nan ka di agiah. Akianyo sasek langkah.

BACA JUGA  9 Daerah di Sumbar Berpotensi Hujan Lebat dan Angin Kencang

“Nan miris bana, indak sajo marampok, tapi nan dibunuahnyo urang gaeknyo karano indak namuah maagiah pitih pambali paket jo pambali cip,” kato Muncak nan mabuek Mak Pono Tangango.

Mak Pono prihatin, makin rusak generasi dek salah mampagunokan teknologi sahinggo kecanduannyo ba akibat fatal ka mental jo moral anak-anak mudo.

Ado lo ciek lai mak, antah maa nan sadis pulo, masih akibat dampak kakek-kakek di teknologi internet ko,” Muncak manjawek sambia manyali rokok.

“Apo lo du?” mak Pono penasaran.

“Kakek Sugiono,” jawek Muncak singkek namun mambuek Mantari galak gadang, nan Mak Pono lah sirah mukonyo.

“Alah nah Ncak, jan ditaruhan jeh lai, marabo Mak Pono lai gah,” kato Mantari sambia bakameh kalua lapau.

Ota Lapau Lainnya :

Facebook Comments

loading...
Artikel sebelumyaBupati Agam Bantu Siswa SMAN 1 Tilatang Kamang Satu Unit Sepeda Motor
Artikel berikutnyaKunjungi Kota Solok, Rezita Meylani Bupati Perempuan Berusia 27 Tahun