Ota Lapau, Pak Pati nak Ba Bini Ciek Lai

Ota Lapau, Pak Pati nak Ba Bini Ciek Lai

Ota Lapau, Pak Pati nak Ba Bini Ciek Lai

tukang tulih : Fendi Moentjak

Muncak mahariak Botak nan lalu dimuko lapau Tek Minar sambia manyandang panciang langkok jo tas barisi umpan dan perlengkapan lainnyo. “Apo Mak ? samangaik bana mak Muncak maimbau awak mah, lai ko ado kopi perai kini,” Botak duduak dakek Muncak.

Lah baco berita Botak, ado wakia bupati di Sumbar nan minta izin batambuah bini ciek lai,” Muncak mancaliak an hapenyo ka Botak nan baru masuak lapau

“Owaaaiii iko yo padiah berita mah, amuah heboh nagari beko, sabana indak manenggang pak pati ko doh, agak lo lah kami nan alun mancubo ko lai,” basumangaik Botak mambaco beritanyo.

Baulang botak mambaco berita ko, mamastian sia bana wakia bupati nan nio manambah bini. “Batoh indak di kecek an dimaa tugasnyo mak, sia urangnya,” tanyo Botak.

Muncak manjawek sambia galak, mangatokan kalau itu adolah rahasia negara melalui Mahkamah Agung. Satiok urang nan talibat pakaro punyo hak untuak disembunyikan identitasnyo, tapi MA harus manyampaikan parkaro apo sajo nan sadang ditanganinyo.

“Tapi iko karajo babahayo ko mak, nan pak pati ko mahindari doso dan majauhi zina nan jadi alasannyo manambah bini. Tapi dek karano ado pemberitahuan dari MA ado pejabat nak kawin batambuah, samantaro identitas disembunyikan, akibatnyo masyarakat nan mambaco jadi manduga dan manuduah. Bahkan mambahasnyo cok kito kini. Mungkin sajo, iko lah tamasuak ghibah,” Botak manjawek sambia mangacau kopi nan dilatak an Tek Minar

Mantari nan tadi tagak dipintu mandanga Botak bacarito galak badarai. “Tibo di nan kalah takana kaji, taringek nan bana yeah, dapek bana pakobeh Mak Pono” kato Mantari manampa bahu Botak.

BACA JUGA  Ota Lapau, Kalah Sarengeh Mak Pono dek Sangik Etek tu

Dikatokan dek Mantari, ndak guno dicikaraui urusan itu, karano itu hak prerogatifnyo. Dalam hukum agamo manambah bini dibuliahkan sampai ampek sapanjang sanggup dan memenuhi persyaratan lainnyo. Kini pak pati tu lah manampuah pulo jalur hukum negara sebagai persyaratan.

“jadi ndak usah lo kito ba spekulasi mambahasnyo nan bisa manambah doso kito pulo,” Mantari mancaramahi Muncak jo Botak.

Mungkin dek bini jo anak apak ko indak baa Mak, tapi bagi kami kaum Jomblo terusik lo kesempatan dan masa depan kami dek nyo,” Botak mambela diri.

Mandanga jawek Botak, langsung di jawek Muncak, ndak paralu lo Botak dan kaum jomblo maraso tarusik, karano apak ko bukan level Botak.

Tapi jadikanlah motivasi baa supayo dapek lo Bini untuak Partamo kali, kok lai talok dan ado lo rasaki, batambuah pulo kok lai izin lo nan partamo,” Mantari mansehati Botak.

“Litak paruik wak mandanga caramah Mak Muncak jo Mak Mantari mah, Tek Minar buek mie abuh ciek,” sorak Botak.

Baru sajo Botak ka manyendok mie abuh angek nan dilatak an Tek Minar, datang Mak Pono jo muko masam, langsuang duduak maunjua di palanta ujuang bawah tipi.

Mancaliak lagak Mak Pono baru masuak, indak ado nan talok manyapo, karano kalau sadang cok iko, Mak Pono agak sensitif, murah naiak amper panehnyo. Salah kecek, bisa kanai sarengeh. Katigonyo malanjuk an ota tantang wakia bupati ka manambah bini tadi.

“Hoi apo nan kalian bahas tu, sia nan ka manambah bini,” hariak Mak Pono.

Mandanga suaro Mak Pono, bagageh Botak ma hanta kan hape Muncak ka tampek Mak Pono. Sambia manyendok mie, diparatiannyo reaksi gaek buruak sarengeh tu.

BACA JUGA  Ota Lapau, Lah Marasai Imun dek PSBB jo PPKM

Ngangak kalian surang-surang, indak pandai mambaco. Sajalah ko di berita tatulih wakia bupati kalian kecek an Bupati, indak babeda dek kalian, lai tamaik sakola surang-surang ndak, atau ndak sato mancucuak katiko Pilkada kalamari,” kalua juo sarengeh Mak Pono.

“Kan iyo Bupati juo tu mak, tapi nan nomor duonyo, sudah tu ado ado nomor tigo Sekda, nomor ampek asisten, nomor limo kapalo dinas dan bauurutan taruh ka bawah sasuai janjangnyo. Kalau Mak Pono dan picayo, tanyo lah ka Muncak nan acok manulih berita Bupati. Pejabat nan mewakili disabuk Bupati dulu, baru jabatannyo,” Botak mancubo mambela diri.

Engak !! babeda jo itu mah, kalau nan Botak baco itu dinas, iko urusan pribadi,” makin tinggi nan Mak Pono.

Walaupun Mak Pono lah tarabo, urang nan ado di lapau tatek galak, karano mereka lah tahu bana pakobeh gaek buruak sarengeh ko.

“Baa dek angek lo Mak Pono manyikapinyo berita ko, sadangkan Botak nan jauah kalahnyo dek apak tu santai sajo nyo,” Muncak manyalo ota Mak Pono.

Baa ka indak dek kalian, lah dua malam deyen lalok di pondok parak dek etek kalian lah tasumbek lo gara-gara pitih karambia deyen pakai pambali joran baru. Kini kalian angek lo deyen jo carito Pak Pati nak manambah bini, sadangkan deyen barangik lalok di parak, sabana indak manenggang,” Mak Pono manggarutok kalua lapau nan diiringi galak takekeh Mantari jo Muncak sarato Botak.

Ota Lapau Lainnya :

Facebook Comments

loading...
Artikel sebelumyaTPID Award 2021, Penghargaaan untuk Tanah Datar Bidang Ekonomi
Artikel berikutnyaIrigasi di Magek Rusak, Bupati Agam Diharapkan Memprogramkan Perbaikannya