Ota Lapau, Mak Pono Juga Butuh BPJS

Ota Lapau, Mak Pono Juga Butuh BPJS

Ota Lapau, Mak Pono Juga Butuh BPJS

tukang ota : Fendi Moentjak

Mantari sadang serius manonton berita tipi di lapau Tek Minar nan mangaba an paralu satiok masyarakat punyo kartu BPJS. Karano sagalo urusan akan dikaikan jo kartu sakti ko, mulai dari jua bali tanah sampai mandaftar haji kabanya bisuak harus melampirkan kartu ko pulo.

“Jadi kartu BPJS ko indak untuak barubek san kini lai deh Ncak ?” tanyo Mantari.

“Tu mah indak, sampai manjua jo mambali tanah harus punyo kartu ko pulo, kok indak akad jo aktanyo indak bisa di proses sampai mambuek parubahan sertifikat,” jaweb Muncak.

“Baa lo kok sampai betu bana deh Ncak ?”

“Karano dalam transaksi tanah acok salah satu pihak dilarian ka rumah sakik, contoh karano harago tinggi bana, sahinggo nan ka mambali kajang-kajang. Atau setelah harago cocok nan mambali mambayia saparampek sisonyo hutang lu, sahinggo nan manjua jadi naik tensi, urang nan dilarian dan dirawat dirumah sakik akibat transaksi tanah indak di tangguang negara” Muncak manjawek sambia mahisok.

Mandanga jawek Muncak mambuek Mantari mangka, karano nyo indak yakin itu alasan nan sabananyo. “Haiayayai… itu jawek anak sakola nah, ko jaleh aka Muncak san mangiro-ngiro jawek cok iko mah,” kato Mantari.

Alun putuh  bahasan tentang BPJS, berita di tipi lah batuka pulo tentang hebohnyo buruh dan masyarakat nan protes peraturan baru tentang jaminan hari tua (JHT) nan baru bisa dibayia an di umua limo anam.

“Limo anam ko sagaek sia kiro-kiro gah Ncak ?” Mantari batanyo sambia manuangkan kopi nan dilatak an Tek Minar ka tadah.

“Ambiek san pabandingan ka Mak Pono, labiah kurang sapangkek jo baliau nah,” Tek Minar sato lo manyolo.

“Ndak yakin wak deh, susah ma ambiak pabandingan ka gaek tu nah,” Muncak manggeleng.

BACA JUGA  Jamaah Tarekat Naqsabandiyah Padang Rayakan Idul Fitri 1441 Hari Ini

“Baa kok betu ?” Mantari penasaran.

Cok caliak ka abuak, mamak tu umuanyo lah labiah 70, danga lo otanyo umua gaek ko mungkin lah lah mandakek saratuh,” jawaban Muncak mambuek Mantari jo Tek Minar penasaran.

Ditarangan dek Muncak, co lah caliak abuak Mak Pono kalau lah indak pakai tarabuh pirang tu, sudah lah abuak jarang warnanyo lah putiah pulo. Samantaro kok didanga pulo otanyo, jo panjajahan Balando nyo basuo, zaman panduduakan Japang nyo marasai pulo, kok sangkek ijok jo peri-peri jan disabuk lai. Sato pulo Mak Pono ijok ka rimbo, makan nasi jo garam atau jo karambia kukua zaman bareh tujuah puluah nyo marasoan pulo.

Tek Minar nan sadang mamasak an mie pasanan Mantari, tasambua dek galak mandanga carito Muncak tentang sejarah Mak Pono.

“Takana lo dek deyen Ncak, kalau karajo di swasta banyak pensiun sabalun umua limo puluah limo, bahkan di sebagaian perusahaan ado aturan indak buliah karajo labiah duo puluah limo atau tigo puluah tahun. Harus pensiun, walau umua masih limo puluah atau kurang, tu baa caroo deh ?” tanyo Mantari.

Ditarangan dek Muncak, itu nan didemo urang kini karano alun ado penjelasan pamarintah labiah rinci tentang itu. “Etek tu indak manarangan sampai ka sinan, etek tu cuma mangecekan pitih JHT dibayia setelah umum 56,” jawek Muncak

“Kok mati sadang karajo atau sabalum umua 56 baa deh Ncak, manarimo tiko itu atau tatek manunggu maso umuanya sampai limo anam ?” Tek Minar sato lo manyolo sambia malatak an mie abuh.

“Kok nan mati di umua 48 atau limo duo, suruah hantunyo pai manjapuk ka kantua BPJS du tiko pitih JHT nyo bisa diambiak,” Mantari manjawek sambia mangipeh mie nan angek tadi.

BACA JUGA  Sejarah, 70 Tahun Lalu Nama Jakarta Pengganti Batavia

Katiko katigonyo manggalak an jawaban Mantari, Mak Pono masuak lapau jo kaniang bakaruk dan muko masam. Kalau lah cok iko ndak ado nan barani banyak tanyo, karano iko kode kalau Mak Pono sadang tasumbek indak bisa dipagarahan.

“Aia angek ngilu kuku sagaleh Nar,” Mak Pono bakandak sambia bakipeh topi tarabuh usang.

“Buek an dadar ciek, litak paruk deyen,” Kandak Mak Pono ka Tek Minar tiko malatak an aia.

“Baa dek Dadar Mak, biasonyo talua barendo kandak Mak Pono,” tanyo Mantari sambia makan mie.

“Nan Barendo sadang jauah, bia dadar san,” jawek Mak Pono singkek.

“Minar, kau kecek an paralon rakuang deyen, sa angek iko aia kau agiah. Ko aia angek panangga kuku namonyo mah, indak ayia angek ngilu kuku ko do,” Hariak mak pono katiko mamacik galeh nan dilatak an Tek Minar.

“Ndeeh Mak yo nak manyarengeh san, tambah lah jo aia dalam cerek du, agak takah aa angek nyo dek Mak Pono nio,” Tek Minar manjawek sambia manggoreng dadar pasanan Mak Pono.

“Lah jaleh deyen sadang BPJS kini, kalian indak mangarati, ko si Minar bapaulahan lo deyen, biasonyo lah tau agak aia nan deyen minum,” Mak Pono mambirunguk sambia manuangkan aia ka cerek.

Mandanga jawaban Mak Pono, takajuk Muncak jo Mantari, karano mereka baru sajo mambahas tentang BPJS ko. Muncak manyangko Mak Pono lah ka manjua tanah pulo, sadang Mantari lai bapandangan elok mungkin Mak Pono ka pai naiak haji.

“Ka mandaftar haji Mak Pono ?” Mantari hati-hati batanyo takuk kanai sarengeh.

“Indak !” jawek Mak Pono singkek

“Tu untuak aa kartu BPJS dek Mak Pono?” Muncak sato lo mananyo.

BACA JUGA  Wawako Hadiri Arisan Panggung Pidato Adat Se-Kota Solok

Ditarangan dek Mak Pono, Piak Ani deyen sadang ndak disiko, anak bungsu deyen si Pani malahia an di Jawa, kok inyo pulang payah banyak syarat untuk barangkek, pai lah amaknyo tigo hari nan lapeh ka sinan.

“Lah tigo hari pulo deyen BPJS,” sambuang Mak Pono

“Indak ko pakai kartu BPJS si Pani Mak, ndak di urus dek lakinyo mak Mak Pono lo nan mamikia annyo,” tanyo Mantari serius.

“Bukan masalah kartu BPJS si Pani, tapi deyen bana nan BPJS kn lai tantu dek kalian,” Mak Pono manjawek sambia manyuok nasi jo dadar dan dilatak an dek Tek Minar.

Nan duduak di lapau masih indak mangarti nan dimukasuk dek Mak Pono, namun indak ado nan barani bantanyo karano gaek ko sadang basijadi makan, lah duo pinggan tambuah dituangkannyo.

“Kok betu bana kalian mancaliak ka deyen, prihatin mancalik deyen kalaparan ? lai tantu dek kalian nan BPS tu,” pertanyaan Mak Pono dijawaik jo geleng kapalo dek nan duduak di lapau tu.

BPJS nan deyen mukasuk du, Butuh Perhatian Juga Sentuhan, alun jeh mangarati kalian surang-surang lai,” kato Mak Pono manyarengeh sambia manyeka muncuangnyo.

Ota Lapau Lainnya :

Facebook Comments

loading...
Artikulli paraprakMendag RI Tinjau Ketersediaan dan Harga Minyak di Pasar Raya Padang
Artikulli tjetërWali Kota Solok Lantik Pengurus FKWIYA Periode 2022-2027