Ota Lapau, Tadayo Godaan Mantan
Tukang Tulih : Fendi Moentjak
“Ondeeeh…………………………… limo satu, cabiak sayok garuda nyo lajang dek Kanguru,” Mak Pono manampa kaniang katiko wasit mambunyikan pluit panjang tando pertandingan alah sudah.
“Baa aka lai mak ?” lunak suaro Muncak mancaliak pemain Timnas Indonesia nan lah taduduk di lapangan sambia manutuk muko jo baju nan lah basah dek paluah.
Sudah mandabiak kaniang, Mak Pono lah tanana bantuak urang kanai sakil lalu. Muncak nan biaso kalau lah wakatu babuko mancaliak loji tiok cacah lah tamanong san takah urang kalah pakaro.
Tek Minar nan galehnyo lah habih, masuak lapau jo galak manih. “Ha baa gak nyeh alun bubar, ka babuko siko, ndeeh maeh dih Mak Pono, galeh habih sadonyo,”
“Ndak makan tak anti,” Mak Pono, hampia ndak kalua suaro Mak Pono.
“Baa kok betu, kalua main lo Mak Pono, dak nyo tanak an lo dek Mintuo, apo lo sabab Mak Pono Kanai skor, kok ka babuko siko wak kaja an batanak cah lu, tu gulai tunjang lai masih ado kuahnyo tingga ?” batubi tanyo nan disampaikan dek Tek Minar. godaan godaan godaan godaan
“Jan banyak carito kauu Minar, den sadang lameh mah,” jawek Mak Pono singkek.
“Muncak baa ? ka babuko siko lah ?” Tek Minatr maalaih tanyo ka Muncak.
“Dak talulua nasi dek kami kini, karo Garuda Kalah nyo lajang dek Kanguru,” Muncak baibo hati.
“Yo babayo lo nasiolisme Mak Pono jo Muncak yeah, kalah Timnas, salero makan tabao hilang pulo,” sambuang Tek Minar.
Mantari nan sajak tadi sibuk maresek hape lah galak-galak masam. Sajak gawang Timnas kebobolan nan katigo tadi, indak diacuahan siaran langsung di tipi. Inyo baindah ka hape, mancaliak komenter netizen. Bamacam nan tasuo, mulai dari nan mambuek status di media sosial, mambuek meme jo foto STY dalam berbagai ekspresi sampai jo mambuek meme manyindia ketua PSSI.
“Lah parah tigo sarangkai mah, nan duo lah nan nan ciek lai lah galak-galak surang,” Tek Minar mangoceh sambia pulang baliak dari laman ka dapua.
“Jan banyak carito kau Minar, jan dikandak-kandak an juo sarengeh den, dak tantu den puaso,” jawek Mak Pono sambia marunguk.
“Caliak lah iko Mak. baragam ekpresi STY nan dibuek urang di media sosial terkait hasil TImnas jo Australi gah a,” Mantari mancaliak an hapenyo ka Mak Pono.
“Alun tantu taketu perasaan STY du lai tu, indak sado mantan nan sanang hatinyo mancaliak jandonyo kecewa atau sadiah,” kato mak Pono Bijak
“Mak Pono kalau lah mandanga mantan ko tagak talingo mah, tensi sadang naik jadi stabil, emosi sadang tinggi bisa turun,” Muncak lah manyorong pulo.
Dek tadangan kata mantan tadi, Mak Pono mamuta carito dari Timnas nan kalah ka ota situasi politik di Sumbar setelah sabulan kapalo daerah nan baru mulai manjalankan tugas. Mak Pono mancaliak ado babarapo pasangan kapalo daerah nan lah mulai ranggang nan disebabkan babarapo hal. Mulai dari perbedaan pandangan pribadi ka pemerintahan, campur tangan tim sukses. Bahkan sampai mantan nan lah kalah pun mancuo marongrong pemerintahan nan baru jo menyusupkan urang-urangnyo dalam kabinet.
Dicaritokan lah dek Mak Pono, bahsonyo kini lah lah mulai tampak BA 1 ko bajalan surang tanpa baiyo jo BA 2, BA 1 labiah mandangakan kecek tim sukses dan partai pengusung dari pado BA 2 nan jadi partner mamimpin daerah.
“Nan tim sukses pun baitu, setelah jagoannyo ko duduak, kurenah jo garegaknyo labiah pulo dari kapalo daerah lai. Mulai dari caro jalan, caro mangecek, pergaulan, kasadonyo labiah dari pado kapalo daerah,” suaro Mak Pono mulai tenggih lo baliak.
Angok lah mulai sasak tapi Mak Pono bacarito juo, nan labiah parah bana pejabat nan duduak di kabinet kini adolah urang dari kapalo daerah nan dulu nan wakatu Pilkada kapatang ko mambulakang jo buang muko ka nan duduk kini.
“Tapi sajak sudah pelantikan nan mambulakang ko kini lah madok, bahkan labiah lo dari tim sukses nan salamo ko badarah-darah mampajuangkan untuak manang. Tapi dek karano baliau-baliau ko sadang manjabat mudah punyo akses ka komandan baru gah,” jaleh Mak Pono.
“Tu dimaa pulo salahnyo dek Mak Pono du, tando loyal ka induak samang iyo baitu, nyo sia nan lalok dalam biliak amak itu apak awak nah mak,” Muncak manyanggah kecek Mak Pono.
“Hai yayai, dek den alun takilek lah takalam mah Ncak. Kok sekedar loyal san rancak nah, tapi dek mancaliak ado nan mambo misi khusus. Partamo manyalamatkan jabatannyo nak jan tageser apolai non job, nan kaduo ado nan bausaho menyelundupkan program dari komandan lamonyo, bamacam caro inyo mayakinkan komandan baru gah untuak mamakain inyo, sacaro ndak langsung marongrong pemerintah nan baru ko,” Sasak angok Mak Pono.
Ditarangan bajaleh-jaleh dek Mak Pono, nan takah itu nan disabuk, Marapulai tadayo godaan mantan.
Baca juga :
Facebook Comments