Ota Lapau, Tenggen Dek Ulah Cik Ayam

ota

Ota Lapau, Tenggen Dek Ulah Cik Ayam

tukang ota : Fendi Moentjak

Muncak jo Mantari sadang basijadi maota di lapau Tek Minar, kaitko Mak Pono tibo jo muko sirah tando emosi sadang naiak. Indak baco salam, indak manyapo, nyo langsuang duduak maunjuak di palanta paliang ujuang suduk lapau.

“Aie ciek Minar,” katonyo singkek sambie bakipeh topi tarabuh.

“Batoh mah, mantang sayuk bulan lai bakepeang juo di saku deyen mah, ba umbuak jo aia putiah sen rakuang deyen,” sarengeh Mak Pono katiko Tek Minar malatak an galeh barisi aia angek ngilu kuku.

Ndak amuah kalah, Tek Minar manjawek kalau yang dimintak Mak Pono hanyo aia, indak ado mangecek kopi, teh atau teh talua.

“Biasonyo minuman paporit Mak Pono kan aia angek ngilu kuku, kecuali ado sponsor baru mintak kopi atau teh talua,” Tek Minar indak namuah kalah nan disambuang jo galak takekeh dek Muncak jo Mantari.

“Haiyalah.. tadi di kandang naiak tensi deyen gara-gara cik ayam, tibo siko naiak gulo deyen gara-gara aia putiah,” kato Mak Pono sambia manggatok kacang tujin.

“BPJS lai ndak manunggak mak ?” tanyo Muncak.

“Apo lo hubungan cik ayam jo BPJS,” Mak Pono baliak batanyo.

“Dek banyak bana panyakik Mak Pono, nan naiak tensi, naiak gulo, kalau BPJS manunggak tantu indak dilayani dek rumah sakik, pastikan bana lu mak,” jawek Muncak sambia galak.

Mantari nan ibo mancaliak Mak Pono sadang emosi, baraliah duduak ka dakek gaek ko. Sambia malatak an rokok di muko Mak Pono, ditanyo apo nan mambuek tensi gaek buruak sarengeh ko manggalagak.

BACA JUGA  Ota Lapau, Mangaa Digoreng Juo Abuh San Lah

Ditarangan dek Mak Pono, lah tigo hari nyo mangumpuan cik ayam di kandang, lah bamasuak an pulo ka dalam karuang. Dapek sabanyak lapan baleh karuang urea, lah disusun rancak-rancak, dipataduahan dirusuak kandang sabalah hilia bia ndak kanai hujan.

“Rencana deyen, kini ka dijua, ka minta tolong ka Mantari ma anta ka tampek urang manjua bungo. Tapi apo nan ka disabuk, tibo di kandang tadi pagi, tingga duo karuang sen lai,” Mak Pono bakisah nasibnyo hari iko.

“Ha???? baa gak nyeh mak, cik ayam amuah juo urang mancilok ?” takajuk Mantari mandanga ota Mak Pono

“Yo lah antah lai, cik Ayam dicilok juo, yo sabana pamaliang paja tu mah,” Muncak sato lo manyolo

“Pelaku nyo ndak urang lain, baa wak ka mangadukannyo ka polisi,” makin lunak suaro Mak Pono.

Mak Pono manjalehan kalau nan mancilok cik ayam dalam karuang tu cucunyo, baru sanjo kapatang diangkuknyo pakai honda jo kawannyo.

“Sajak candu main game online, habih hari jo chip sarato ma agah kakek merah, lah rusak paja nan surang tu. Dari bareh, karambie sampai ka cik ayam digeleknyo juo, baa lah ma aja nyo lai, kok tenggen beko ka sudahannyo,” maibo ota Mak Pono.

Mandanga Mak Pono manyabuk tenggen, Mantari mamuta carito ko jo berita nan sadang viral di Jakarta kini. Dari pemerintah, artis sampai anak mudo sibuk jo carito citayam.

“Di Jakarta urang heboh dek manggaya di Citayam, dari pejabat sampai ka anak mudo bahuru-huru batandiang lagak di disinan. Sado mode kalua, sado ragi ado, indak abuak sajo nan pirang jo gigi-gigi sampai pirang, kadang lah takah urang tenggen,” kato Mantari.

BACA JUGA  Pagadih Gelar Festival Budaya Tanam Padi, Wabup Agam: Pertahankan Tradisi Ini

Muncak galak takekeh-kekeh nan mambuek Mak Pono tambah mangka. Raso ka dibae Muncak jo asbak nan ado mukonyo, apo lai dikatokannyo Mak Pono lah cok urang tenggen dek gara-gara cik ayam.

“Lah jadi slebew cik Ayam lo Mak Pono, kalau di Jakarta urang abih gaya di Citayam, kalau Mak Pono abih main dek cik ayam, jan sampai tenggen lo gara-gara cik ayam Mak, ko Tarabuh lah teleng, buah baju senjuk lakeknyo nan sarawa sabalah baguluang singgo lutuk nan sabalah cabiak lo ujuangnyo” Muncak ndak bisa manahan galak mancaliak Mak Pono tambah sirah mukonyo.

“Manyasa den mancaritoan cik ayam ka kalian, sudah lah malang di kandang tibo di lapau kanai cimeeh pulo,” Mak Pono tagak kalua lapau nan rokok Mantari dimasuak an pulo ka saku.

Ota Lapau lainnya :

ota 

Facebook Comments

loading...
Artikulli paraprakGubernur dan PHRI Sumbar Gelar Coffee Morning
Artikulli tjetërAsah Kompetensi, 2 Tim Ponpes Al Kautsar Ikuti Lomba Cerdas Quran Padang TV