Ota Lapau, Kanai Kicuah Langkueh Disangko Dagiang
Tukang Ota : Fendi Montjak
Lapau Tek Minar sadang langang, hanyo Mak Pono nan duduak surang sambia manonton tipi. Sudah dilatak an kopi, nan punyo lapau baliak ka balakang manuruhan mamasak nan sadang tajaran. Lah takantuak Mak Pono basanda disuduk dakek jendela. Rokok di jari lah tapuntuang jadi abu.
“Batoh mak, bakicuak san Tek Minar jo urang pabrik rokok mah,” Muncak manyapo Mak Pono balambek-lambek nak jan kalua lo sarengah gaek ko.
“Bakicuah baa lo, bara balanjo lai den bayia nyo,” jawek Mak Pono singkek sambia manyek ujuang bibia.
“Ba ka indak dek Mak Pono lah, tu kopi lah dingin san tahidang indak baminum, ko rokok lah tapuntuang san di jari indak bahisok,” takekeh Muncak mancaliak Mak Pono dijagoan langsung manyeka bibia, Tek Minar nan mandanga Muncak datang sato lo galak takekeh.
Samantaro di tipi sadang tayang berita penangkapan pejabat PT. Pertamina Petraniaga oleh Kejaksaan Agung karano perbuatan mereka nan mambuek Pertamax tanyato Pertalite nan dituka warna. lapau lapau lapau
“Lah lakek rompi jambu aia, manih juo galak ang lai, dasar indak bautak, lamak dek ang mangicuah rakyat, lah sagadang itu gaji nan ang tarimo, mancilok jo mangicuah juo lai,” tarabo Mak Pono mancaliak para tersangka korupsi Pertamina ko.
“Yo barek kanai Mak Pono nah, padohal astrea bulan tu walau gaek minumnyo Pertamax, tau-tau kni kanai kicuah pulo,” Muncak sato pulo mamanehan Mak Pono.
Makin paneh Mak Pono mandanga ocehan Muncak, kalua samangaik ampek limo gaek ko, baragam nan disabuknyo mahujat pelaku korupsi ko.
“Jan dipanehan juo Mak Pono tu Ncak, liau sadang emosi basiram lo jo bensin tambah nyalo lah nyo,” Tek Minar manyolo dari balakang.
“Tuka istilah tu lai tek, indak manyiram jo bensin lai deh, manyiram jo Pertamax, karano itu nan paling gadang nyalonyo kini,” Muncak indak amuah kalah.
“O iyo yeah, istilah gah manyasuaian jo keadaan mah yeah, bensin yo indak lo ado kini lai,” Tek Minar takekeh.
“Menyala Mak Pono…. ambiak an aia putiah ngilu kuku lai Tek, mantimun ciek, naiak tensi Mamak kito mah,” Muncak basjijadi mangompori.
Tek Minar datang malatak an aia angek ngilu kuku miniman paporit Mak Pono nan lah sirah mukonyo tando sadang emosi. Nan berita di tipi alun juo habih, kini sadang dibahas pulo dampak dari Pertamax abal-abal ko terhadap kendaraan nan mamakainyo, sarato kerugian sacaro ekonomi, baiak oleh negara maupun masyarakat nan mamabali salamo satahun terakhir.
“tu paja pangicuah tu lalu ha, kok dakek den lambin jo tangan mah,” Mak Pono makin emosi katiko mancaliak pegawai SPBU malinteh di jalan muko lapau.
“Mangaaa lo ka inyo Mak Pono tarabo, inyo kan dak tau kalau nan dijuanyo tu minyak palsu indak sasuai nan sabananyo. jan kan inyo, induak samanngyo pun mungkin indak tau, tu takah ciliang luko namonyo nah.” Muncak mancubo mananangkan Mak Pono.
“Haiyayai bakecek an lo den takah ciliang.” tasambua sarengeh Mak Pono.
“Yo salut den raso cinta tanah air Mak Pono, padohal indak Mak Pono surang nan kanai alua dek pejabat pertamina tu, tapi emosinyo labiah dari kicuah tagak anak bujang ditingga nikah sadang sayang-sayang bana,” Muncak malunak an hati Mak Pono nan sadang paneh nan Tek Minar lah galak-galak masam mancaliak kaduonyo.
“Alun ka tantu dek kalian sakik nan den rasoan, cubo pulo lah dek kalian, takicuah makan randang, lah basijadi manggigik dagiang kironyo langkueh, sudahlah kareh padeh pulo, cok itu bana santinag urang marandang” Mak Pono manjwek jo muko jo udang disangai.
Baca Juga :
Facebook Comments