Ota Lapau, Tim Pakar dan Tim Pakak

Tukang Ota : Fendi Montjak

Muncak jo Mantari sadang manonton berita tipi nan manayankan kaba Mahkamah Konstitusi mamutuh pakaro sengketa gugatan hasil Pilkada nan hasilnyo manolak permohonan penggugat yang perolehan suaronyo kalah dek nan manang.

“Sasuai prediksi den ndak Ncak, ndak ka lalu gai gugatan tu deh,” Mantari mangomentari berita tipi sambia manyalai rokok.

“Namonyo san malapehan uweh-uweh, ditarimo atau indak, ndak dipikia an bana, nan jaleh jan nampak bana kalah dek urang, ibarat paja-paja bacakak mah, manyipak ndak talaok, garegak dikaluan juo,” Muncak manjawek

Sadang lamak Muncal jo Mantari maota, tibo lo Mak Pono nan langsuang duduak di suduk dakek jendela, tampek duduak paporitnyo. Alun talakik mambukak topi tarabuh usangnyo, Mak Pono mambukak ota keputusan Mahkamah Konstitusi tentang sengketa hasil Pilkada masuka tahapan demissal.

“Demissal gah a deh mak ?” tanyo Mantari.

Tak langsuang dijawek Mak Pono, gaek ko cak icak mampelok langan baju. Tapi nampak diwajahnyo sadang mamikia an jawaban tanyo Mantari.

“Nyo apo nah, tentang hasil pilkada mah, kan pasangan calon nan kalah du manggugat ka Mahkamah Konstitusi, sudah tu Mahmakah Konstitusi mamproses gugatan gah, sudah tu… ,” gak tagagok Mak Pono.

“Talembek info Mak Pono nah, ko kami sadang manonton berita tu di tipi, langkok keterangannyo,” kato Muncak

“Haiyayai, baa kok ndak bakecek an njak tadi, lah beloh den manarangan kalian anok san,” kalua sarengah Mak Pono.

Mancaliak Mak Pono manyarengeh, Muncak jo Mantari galak takekeh dek lah berhasil mamanciang emosi Mak Pono.

“Tek Minar adok an aia angek ngilu kuku ka Mak Pono lai,” sorak Mantari maimbau Tek Minar nan punyo lapau.

“Ndak ado nan agak ranum goreng pisang kau gah Minar,” Mak Pono ma aliahan ota.

“Baa kok nan ranum mak tanyo, urang taragak goreng tu nan masih mangka,” jawek Tek Minar sambia malatak an katan dimuko Mak Pono.

“Jan ditanyo juo tek, pahami se lah, baliau ndak bagaraman lai, kok lai pisang ranum kan tingga malulua san lai,” Mantari manyolo sambi galak.

“Kalian raso an pulo lah gaek bisuak,” sarengeh Mak Pono.

Sambia makan katan goreng Mak Pono mambuka carito tentang kondisi pasca Pilkada manjalang pelantikan. Baragam dinamika nan berkembang ditengah masyarakat, tamasuak setelah pelantikan kepala daerah nan manang diundur dari tanggal anam ka tanggal duo puluah.

Kato Mak Pono, kemenangan pasangan calon dalam Pilkada tak terlepas dari peran Tim Sukses dalam menggaet suaro rakyat dan meyakinkan massa. Baik secara personal melalui lobi-lobi, mamasang gambar sampai manjadi sponsor kegiatan.

“Bukan cuma itu dalam tim sukses biasonyo akan ado yang bereparn sebagai tim pakar,  tim massa, tim pemenangan sampai tim pengawalan suaro, nan satiok tim pu yo tugas da peran babeda namun satu tujuan yakni mamanangan paslon sampai disahkan oleh KPU kemudian dilantik,” Mak Pono manarangan bantuak dosen sadang maagiah kuliah.

“Tapi indak sakatiak pulo anggota tim ko nan main duo kaki mak, disiko pasang badan sebagai tim, dan di pasangan lain sato lo manyumbang sebagai donatur,” sanggah Muncak nan langsuang dijawek Mak Pono jo suaro tenggi.

“Itu nan mambuek cilako ka pasangan calon, urang nan bamuko duo atau nan main coki gah. Katiko lah manang, inyo maraso sabagai nan paliang dimuko nan bakontribusi gadang kapado paslon. Kalau paslon ko kalah, inyo pulo nan mandorong untuak manggugat ka Mahkamah Konstitusi, walau kemungkinan dimanangkan itu tipis,” jaleh Mak Pono.

Mak Pono manarangkan kalau tim pakar biasonyo manyusun visi misi calon, manyusun program berbasiskan data dan kondisi di lapangan sarato menyerap aspirasi masyarakat dari sagalo sisi nan kemudian dirumuskan manjadi program-program pasangan calon nan berkaitan jo visi misi. pakar pakar pakar pakar pakar pakar

“Kalau nan mahasuang calon untuak manggugat, samantaro data di KPU dan data lapangan, pasangan ko lah kalah telak, misal dari 300 TPS hanyo manang di 5 TPS tapi manggugat juo, itu tim maa nan karajo tu mak ? tanyo Mantari nan sajak tadi serius mandanga ota Mak Pono.

“Itu Tim PAKAK namonyo nah,” sarengeh Mak Pono sambia manyeka sunguk sudah makan katan.

Jan Lupo, Baco Ota lapau nan lainnyo :

• Cik Ayam Bubar Tapi Baunnyo Tak Hilang
• Tenggen Dek Ulah Cik Ayam
• Mati Tak Makan Dek Indak Ado Ayang
• Mak Pono Juga Butuh BPJS
• Awak Tibo Nyo Acuah San Nyeh
• Takuk Kanai Suntik, Abih Kiramaik Mak Pono dek Buk Bidan
• Mangaa Digoreng Juo Abuh San Lah
• Kalah Sarengeh Mak Pono dek Sangik Etek tu
• Pak Pati nak Ba Bini Ciek Lai
• Gadang Gaji Etek Kiroo Yeah
• Tangga Sarawa Dek Ulah Kakek Merah
• Abih Main Dek Ulah Surek
• Politik Panjek Pinang
• Katiyak Samo Tasapik, Baunnyo Babeda
• Lah Marasai Imun dek PSBB jo PPKM
• Ota Lapau, Pancarian Padiah Kawan Manjauah