Ota Lapau, Sambuk Lah Den atau Den Manggok

Tukang tulih : Fendi Moentjak

Tek Minar sadang malayani urang mambali pabukoan di meja di laman lapau, di dalam duduak Mantari, Muncak jo si Botak sambia maota kariang karano hari bulan puaso. Walau maota kariang mamatang hari, ota tak lapeh dari kondisi terkini.

Mak Pono datang jo kureta angin, baranti di bawah batang seri lah di sanda an kureta angin. Mancaliak ka dalam lapau, lai ado urang duduak tapi tek Minar sadang manggaleh pabukoan di laman lapau.

Batagak pinggang Mak Pono mancaliak sakaliliang, Tek Minar sibuk ma ambiak an urang balanjo, Ajo lah jadi kasir jo ma ambiak asoy palatak balanjo. Dari dalam lapau tadanga suaro Muncak maota jo Mantari. Tapi dak ado nan manyapo Mak Pono, Botak nan tadi mancaliak kalua hanyo diam manakua main hape.

Lah tigo kali Mak Pono mandaham indak ado juo nan ma engahannyo. Lah batuka daham jo batuak, indak juo ado nan maacuahan Mak Pono.

Mangka gaek ko, diambiak baliak kureta angin nan tasanda di batang seri tadi, ditundo ka tapi jalan. Tapi tatagun langkahnyo dek baun samba nan dijua Tek Minar, tambah pulo harum panggang ayam nan dikipeh Ajo mambuek salero manitiak.

“Tek, lai ndak lupo maasiangan gulai cancang jo panggang ayam,” sorak Muncak dari pintu lapau.

“Indak, ka pulang Muncak lai tu ?” jawek Tek Minar sambia ma ambiak balanjo nan lain.

“Beko san lah jalang babuko, jan etek jua lo ka nan lain,” Muncak babaliak ka dalam lapau.

“Yo lah antah sorang-sorang lai, di kecek an tonggak paga atau patuang ko lah awak tagak disiko, indak nan manyapo surang juo,” Mak Pono manggumam surang.

Raso nak pai Mak Pono dari lapau Tek Minar ko, tapi taragak pulo bakucindan mamatang hari jo Muncak sarato Mantari. “Mungkin iko salah satu godaan untuak urang bariman,” Mak Pono mambatin.

“Ka pai kamaa mak, kanai sarayo lo dek Mintuo mambali samba, indak ka duduak ma ota jo kami,” Botak nan kanai sarayo dek Muncak ma ambiak samba ke tampek Tek Minar manyapo Mak Pono.

Mandanga kato-kato Botak naik amper paneh Mak Pono, dituruknyo Botak ka dalam lapau.

“Kaciak kagadang-gadangan, angku kiro samo den Muncak, buliah pai ka lapau tapi pulang bao an samba, atau pintu indak dibukak an,” Mak Pono manampa meja tampek Botak duduak.

“Batoh mah mak, oto tagak ba antak san, Mak Pono kok marabo ka Botak, tampa inyo, jaan awak lo nan Mak Pono sewai,” Muncak baliak manyangik Mak Pono.

“Batoh mah, bulan puaso kini, mudah bana naiak amper paneh surang-surang,” Mantari mangatangahi.

Botak nan partamo mambangkik an emosi Mak Pono, cak icak ndak tahu san, nyo sibuk jo hapenyo antah apo nan direseknyo. Sambia sasakali digawiknyo kapalo licin nan tak barabuak tu.

“Baa tak ta naiak darah den, sajak tibo tadi indak ado nan manyapo, asik jo urusan surang-surang, kok Minar jadi lah, inyo manggaleh dilua tu, nan kalian, sajalah tu den tagak dimuko, sapo gai lah, ajak gai lah masuak, baok maota, ko indak !” sasak angok Mak Pono.

“Tu ka disambuk jo ari galombang lo Mak Pono tibo, takah urang ndak pernah kamari, takah tamu aguong bana lo Mak Pono deh ?” Muncak manjawek masih jo emosi.

“Mak Pono tamotivasi jo berita nan bahas tadi nah Ncak, samo lo Mak Pono jo kapalo daerah tetangga tu a, manggok dek tak disambuk, babaliak san jo muko masam,” Mantari sato pulo manyolo.

“Tapi beda jo Mak Pono ko Mantari, indak ado nan manyambuk, indak pulo masuak, indak pulo pai, tapi tagak san sambia maidu baun samda nan dijua Tek Minar, karano kanai pulang kanai skorsing dek Mintuo karano pulang indak mambao,” Muncak mambaleh ndak amuah kalah.

“Haiyayai….” hanyo itu jawek mak Pono jo muko sirah manahan emosi

Baca Juga :

• Ota Lapau, Kanai Kicuah Langkueh Disangko Dagiang
• Ota Lapau, Takah Rang Sumando Hilang Malam
• Ota Lapau, Tim Pakar dan Tim Pakak
• Cik Ayam Bubar Tapi Baunnyo Tak Hilang
• Tenggen Dek Ulah Cik Ayam
• Mati Tak Makan Dek Indak Ado Ayang
• Mak Pono Juga Butuh BPJS
• Awak Tibo Nyo Acuah San Nyeh
• Takuk Kanai Suntik, Abih Kiramaik Mak Pono dek Buk Bidan