Ota Lapau, Lah Marasai Imun dek PSBB jo PPKM
tukang tulih : Fendi Moentjak
“Tek Minar, kopi sakarek kurang gulo,” sorak Muncak baru masuk lapau Tek Minar.
Sambia mandinginkan kopi ka tadah, Muncak batanyo, ado ko Tek Minar nampak Mantari, karano sajak tadi pagi hapenyo mati indak bisa dihubungi.
“Tadi nampak nyo pai ma anta Imun anak Mak Pono pai mauruk cucu nan kaciak tu, lai singgah sabanta tadi ma ambiak rokok sabungkuh,” jawek Tek Minar.
“Ma ambiak rokok ?, ndak nyo bayia dek Mantari tu sakali, lah baraa halaman buku bon Tek Minar barisi dek namo tu tek ?, batungguan lo dibayia seo oto dek Mak Pono lu, siap-siap san lah Tek, samo jo mananti baniah barandam jadi padi masak nah,” kato Muncak.
“Tadi Mantari tu tagageh, anak Imun nan kaciak tu tajatuah dari dipan, dianta lah dek Mantari pai bauruk, karano si Pian laki Imun tu, lah sabulan labiah lo tak pulang, nan Mak Pono pai mamanciang ka tang aia, makonyo ka konsi Muncak tu minta tolong, dek nyo lai perai lo manambang tadi,” kato Tek Minar manjalehan.
Mandanga panjalasan Tek Minar, takana lo parasaian Imun ko dek Muncak. Dulu Imun dibao marantau ka Jawa dek Pian nan karajo di perusahaan asing, gajinyo gadang nan selalu dibanggakan dek Mak Pono. Hiduknyo lumayan untuak limo baranak.
Sajak pandemi, Pian mambao keluargnyo pindah ka kampuang, dan inyo tetap bakarajo online. Karano wakatu itu diterapkan lah PSBB dek pamarintah.
Sambia karajo online di rumah ko lah, balabo galeh Pian jo Imun, batambah kalene surang lai. Sahinggo Mak Pono manyabuk cucu nan surang ko labo PSBB (Pangana Sanang Bini Buntiang).
Satahun pandemi balalu, Pian kanai pengurangan karyawan dari tampeknyo karajo. Sajak itulah kondisi keluarga Pian ko kacau. Nan Mak Pono si buruak sarengeh, jan kan ibo mancaliak minantu manganggur, tambah parabo nan lai.
“Lah tapek kondisi kini dek Pian mah Tek, dulu PSBB (Pangana Sanang Bini Buntiang) maningkek anak Imun, kini PPKM (Pancariah Padiah Kepeang Manipih), sampai ka level darurat, Pian barangkek dari rumah, nan marasai Imun juo,” . tangango Tek Minar mandanga keterangan Muncak.
“Jadi PPKM dalam rumah tangga ko ado lo levelnyo ko Ncak?” Tek Minar masih penasaran jo Ota Muncak
“Danga dek etek dih ambo tarangkan,” kato Muncak sambia manyalai rokok.
Level tigo, basiarak laki bini, anak marasai kanai hariak, karano tiok cacah minta pitih bali paket dengan alasan untuak baraja daring. Nan bini lah mambirunguk tiok cacah, kasudahannyo laki indak buliah kalua malam, karano duduak dilapau tu pitih kalua juo baru.
Naiak ka level ampek, laki atau bini manggaleh barang bekas dan diberlakukan penyekatan.
Mandanga level ampek ko, penasaran Tek Minar, dipotongnya uraian Muncak. “Manggaleh barang bekas baa lo mukasuk Muncak ko ?”
Sambia takekeh, Muncak manarangkan, nan dimukasuk manggaleh barang bekas tu, manjua isi rumah satu per satu, mulai dari kulkas, tipi, masin jaik kok ado, atau apo sajo nan bisa dijadikan pitih untuk panambah bali bareh, balanjo dapua sarato balanjo anak.
“Penyekataan tu apo lu Ncak?” Tek Minar makin serius.
“Dek karano keuangan alah manipih, sahinggo apak paja ko indak buliah baragak lai, indak buliah kamaa-kamaa, kok kalua kanai tanyo dek induak bareh, pai kamaa, ado urusan apo sampai buek surek pernyataan, kok pulang mambao pitih,” makin padiah isok rokok Muncak.
“Haiyayai sangko wak apo pulo tadi tu, kok level darurat baa lo tu Ncak,” Tek Minar makin baiyo bana.
Level darurat ko mulai makan korban. Setelah laki bini sukses manjua barang bekas, kemudian beberapa barang nan tingga lah jadi senjata parang dalam rumah, salah satu pihak baralah.
“Itu nan tajadi kini, nan Imun Maningkek jumlah anaknyo, nan Pian lah darurat kondisinyo sahinggo baliak ka pangka,” kato Muncak sambie malatakan pitih duo ribu dimeja.
“Duo ribu baa lo ko Ncak, kurang mah,” hariak Tek Minar ka Muncak nan lah kalua dari lapau.
“Mambana lu Tek, PPKM kini mah, Pancarian Padiah Kepeang Manipih,” sorak Muncak sambia maengkol Astrea Bulannyo.
Ota Lapau lainnya :
Facebook Comments