Ota Lapau, Bacarai Juo Nan Malakok Taruh Du
Tukang Tulih : Fendi Montjak
“Tek Minar, njak tadi den duduak, indak babuek an kopi deh, mangango san mancaliak ka tipi du,” Muncak maimbau Tek Minar nan sadang manonton infotaiment.
“Eh iyo Ncak, jan lah mareh-mareh lo nak samo lo jo Mak Pono lai mah, ko lah asyik san manonton berita Ridwan Kamil bacarai jo ibuk cinta, indak manyangko wak deh, taketu lakoknyo salamo iko akhianyo di bacarai juo,” jawek Tek Minar.
“Padia san lah inyo nak bacarai eh, dek gara-gara inyo nan bacarai amuah lo lupo jo kandak urang mambali,” Muncak masih mangka.
“Jan sampai gara-gara urang bacarai, awak sampai bacarai pulo jo rasaki,” Mak Pono nan baru tibo sato lo manyangik nan mambuek Tek Minar bagageh tagak mambuek an minum untuak Muncak jo Mak Pono.
Sambia malatak an minum, Tek Minar bacarito, mancaliak hubungan salamo ko mantan gubernur du dak ka mungkin bapisah jo ibuk anggota DPR RI ko. Bahkan mancaliak mesra kaduonyo, manjadi pedoman dek anak-anak mudo.
“Mancaliak lakok jo pujian salamo ko, indak tabayang dek wak hubungan rumah tangga mereka akan berakhir takah iko. Dimaa ado pak RK selalu ado ibuk Cinta,takah aua jo tabiang, sanda manyanda kaduonyo,” Tek Minar taruh mancaracau mambahas perceraian mantan Walikota Bandung tu.
“Kini aua tu lah hanyuk tabiang lah runtuah, ka dipangaa an lai, apo na ka dikarehan” Mak Pono masih alun pueh juo dek Tek Minar masih mambahas tentang RK ko.
Tek Minar indak paduli jo Mak Pono nan alah mangka, nyo taruh bacarito tentang kemesraan Ridwan Kamil jo Athaliya salamo ko. Nan Muncak lah galak-galak sengeng san mancaliak kaduonyo badebat
“Dek nak maratukan bini, sahingga ba imbauan lah ibuk cinta sebagai simbol kasih sayang nan indak ka goyah atau ka tagantikan. Lupo bahasonyo ado Allah nan maha membolak balikan hati manusia. Cintai lah sewajarnya dan perlakukanlah dengan semestinya indak paralu sagalo bakalabihan dan musti dicaliak an ka urang banyak,” Mak Pono masih bacaramah.
Mak Pono manyampaian, in dak elok sagalo nan dipabuek jo pasangan tu di caliak an ka urang banyak, apo lai di media sosial nan atnah siapo-siapo nan mancaliak.
“Ko tiok cacah bamasuak an video sadang bagaluk, ba bimbiang, gitiak manggitiak, makan basuok an, indak paralu betu bana, kana lo lah perasaan urang nan marando, urang nan indak babini atau balaki,” Mak Pono alun juo baranti bacaramah walau angok lah mulaiu sasak dek mangecek tabao emosi.
“Cukuk awak sajo nan marasoan baa sayang bini yo mak, dan cukuk bini sajo nan marasoan baa caro laki mamanjoan yo mak, tamasuak puisi-puisi untuak laki dak paralu ditayangkan lo di media sosial ndak mak” Muncak sato lo manimpali.
Mandanga kecek Muncak makin panjang katubah Mak Pono tentang sikap barumah tangga, tentang manjago perasaan pasangan dan manjago perasaan urang banyak tamasuak mintuo jo ipa bisan.
“Lai takana jeh materi sangkek jadi pembantu angku kali dulu lai yo mak,” sambuang Muncak.
“Den ajari mancimeeh, dimaa ka masuak nan bana tu dek kalian, pi lah den kecek an indak aelok sagalo balabohan dan sagalo di banggakan ka urang banyak” kalua sarengeh Mak Pono.
“Mak Pono lai pernah takah pak RK jo ibuk Cinta tu lo mesranya ?” Tek Minar alun juo pueh dek ota Mak Pono lai. lapau lapau lapau
“Lai tapi indak pernah den publish di media sosial,” jawek mak Pono mantap.
“Walau kini lah gak acok sagalo surang,” Muncak manimpali nan disambuk galak takekeh Tek Minar nan mambuek muko Mak Pono sirah.
Baca Juga :
Facebook Comments