Ota Lapau, Gantuang Pariuak Dek Hemat Anggaran
Tukang Tulih : Fendi Moentjak
Mantari masuak lapau jo kaniang bakuruk dan tampang lusuah, kaki malangkah bantuak indak taangkek. Mak Pono nan sadang duduak sambia manontin tacangan mancaliak Mantari, indak biasonyo cok iko.
“Baa gaknyo Mantari ? indak samolero badan ?” tanyo Mak Pono.
“Sadonyo indak samolero kn mah mak, indak badan san nan kanai do,” Mantari duduak di meja sabarang Mak Pono.
“Apo nan taraso dek Mantari, alah baubek, elok lah ka dokter lu dari pado manjadi nyo nanti,” Tek Minar lah sato pulo sambia malatak an aia angek.
“Baa ndak mandingin badan dek Etek, tagantuang pariuak kini, nan anak minta balanjo juo, minta uang sakola, nan di dapua lah padoo kosong sadonyo, pangana sia nan ndak ka jauah,” lunak suaro Mantari.
Muncak nan baru masuak lapau lah tamanuang pulo mandanga carito jo mancaliak tampang Mantari nan lusuah. lapau lapau lapauÂ
“Baa kok betu, baru tanggal ampek kini, biasonyo bulan mudo gah, cok aia mancua baru diiduk an tenggih onjak Mantari mah,” Mak pono manimpali ota Mantari.
“Haiyayai… talambek info Mak Pono mah, caliak lha ko ha, di SuhaNews, lah tanggal limo pegawai Pemda Kabupaten Solok alun manarimo gaji nan biaso masuak tiok tanggal satu,” Muncak nan lah tau panyabab Mantari damam mancaliak hapenyo ka Mak Pono.
“Jadi hemat anggaran kecek presiden tu, pegawai ko ndak manarimo gaji Ncak, kok betu basyukur lah den nan manggaleh cok iko lai ndak tadampak hemat anggaran,” Tek Minar prihatin mancaliak Muncak.
“Jan mengacek indak tadampak kau lai Minar, cubo lah caliak buku hutang kauuu tu, sia nan paling banyak bahutang kok indak pagawai, haiyayai asa lai malambai san kau mah,” Mak Pono nan tabik tensi mandanga kato-kato Tek Minar.
“Jan betu-betu lai mak, kok dibukak buku tu dek Tek Minar kini, namo Mak Pono masuak tigo besar numah,” Mantari nan sajak tadi lunak garik, tenggi lo nadanyo dek ulah kecek Mak Pono.
Muncak nan arih dek ota mulai paneh, mangatangahi dengan maajak menelusuri penyebab pegawai ko indak manarimo gaji. Dari penelusuran di berita, penyebabnyo karano ado SKPD nan adun melakukan pemangkasan anggaran perjalanan dinas limo puluah persen sarupo keputusan presiden.
“Den raso iko ado samacam upaya untuak menodai saratuh hari Bupati baru mah Ncak, tapi nan jadi korban ribuan pegawai jo keluarganyo. Caliak lah berita berkembang di media, ado nan manuduah dewan nan indak amuah anggarannya di pangkas, ado nan mangecek an sekda nan lalai dalam menegaskan penerapan kepres ko,” Mak Pono maresek-resek layar hape mambaco berbagai berita tentang PNS di Kabupaten Solok alun manarimo gaji walau bulan alah tanggal limo.
“Tapi kok dibaco lo jawek Sekda ko, seolah-olah inyo ndak bersalah do Mak,” Muncak heran.
“Ka mangecek den baa lah, cubolah kalian kana-kana carito ka balakang, sajak mulai wacana pilkada ko bergulir, atau labiah jauah ka balakang periode kepimpinan kapalo daerah nan lah habih periode patang, baa sipak tajangnyo dalam mangaja dan mengamankan jabatannyo, silahkan kalian simpulkan surang-surang,” Mak Pono manjalehan.
“Ko ado lo isu nan labiah sero mak, caliak lah d grup fesbuk ko, apak ko ado lo isu salain masalah jabatan, isu rang dusi mak,” Muncak mancaliak an hapenyo ka Mak Pono.
“Rang dusi rang dusi juo kecek Muncak, ko nan di tanak bini den beko sanjo lah tak ado, balanjo sakola anak bisuak tak tampak, alun anak nan di Padang minta kiriman pitih lai.. hai yayai.. isu rang dusi lo nan kdibahasnyo,” agak sasak angok Mantari.
“Takuk Mantari mangomentari dan den raso Mantari lai tau isu ko mah,” Muncak mambela diri.
“Baa ka baa tantu dibelanyo induak samangnyo dek Mantari ko Ncak,” jawek Mak Pono.
“Tasarahlah, nan den pikia an kini dimaa anak bini nan kamakan, lah ampek hari pariuak tagantuang,” Mantari tagak kalua dari lapau.
Baca Juga :Â
Facebook Comments