Ota Lapau, Nan di Awak Ado Lo Nyeh

Tukang Tulih : Fendi Moentjak

Njak tadi Muncak jo Mantari duduak dalam lapau, tapi Tek Minar indak kalua mananyo apo nan ka dibuek an sarupo taralah. Tapi suaronyo lai tadanga dari balakang. Ndak lamo kalunyo baduo jo anak gadihnyo na lah pakai baju kabaya langkok jo sanggua di kapalo cok ban serap vespa.

“Gadih bana cucu Tek Minar mah, lah babadak babaju kebaya langkok jo sanggua bagai,” sapo Mantari mancaliak tek Minar kalua jo anaknyo.

“Yo gadih cucu Tek Minar yeah, tambah nampak gaek andong nyo kalau lah bagandiang jo gadih kamek ko a,” Muncak sato lo mangomentari. awak awak awak awak awak awak

“Jan banyak carito Ncak, jaleh iko anak den, bakacek an cucu, mantang-mantang Piak Banun ko buah salek,” sangik Tek Minar sambia mampelok an badak anaknyo.

Ota manjadi angek katiko Muncak mananyo acara apo di sakola sahingga pakai baju kebaya langkok jo sanggua, nan dijawek Tek Minar kalau kini hari Kartini makonyo anak sakola bapakaian ala pahlawan tu.

“Tu makonyo sakola diparatian guru manarangan palajarn indak maota san, ko sudah lah maota, cabut acok pulo, alun nan takantuak sadang baraja lai, maa nan ka tantu apo nan disampaian dek guru,” batubi-tubi Tek Minar manjawek kecek Muncak.

Dalam badebat sambia Tek Minar mangamehan anaknyo ka pai sakola, tibo lo Mak Pono nan lah coga pakai kemeja langan diguluang, langkok jo topi tarabuh sarato tarompa Indian.

“Pagi lah heboh, apo nan bapasiarakan tu,” Mak Pono langsuang duduak di meja suduk dakek jendela.

Tek Minar maulang jawek sarupo tadi tantang kegiatan anak Sakola nan memperingati Hari Kartini dengan bapakaian sarupo pahlawan dari Jepara tu.

“Bagai san anak sakola ko disuruah, buliah mangana sajarah untuak mangingek an generasi mudo tapi indak bakalabiah cok iko lo deh. Tiok hari pakai sakola pakai jilbab, tibo hari peringatan ko lapeh jilbab lakek sanggua sagadang katiding,” Mak Pono mangka mananggapi keterangan Tek Minar.

“Batoh naik sakali gulo Mak Pono gah, a nan baminum kalua rumah tadi, latak an lah aia angek ngilu kuku dul Tek, kurang rancak angin nampaknyo mah, rokok lah sabatang lu mak” Muncak malatak an rokok ka meja Mak Pono.

“Ba ka indak, kadang den heran mancaliak caro di sakola gah. Anak-anak ko di suruah maingek jo manyanjuang tokoh-tokoh dari daerah lain, tapi jo tokoh dari daerah sendiri lupo, mungkin indak tau atau hanya sekedar tau namo tapi ndak tau jo kisahnyo,” masih tenggih nan Mak Pono.

Co lah caliak, dalam buku anak-anak ko dikenalkan jo carito Kartini tentang perjuangannyo mengangkat derajat padusi bia samo jo laki-laki tarutamo dalam hak mandapek an pendidikan. Tapi indak banyak nan maungkik carito kalau di Minang ko juo banyak tokoh emansipasi wanita nan bajaso, baiak untuk kaum hawa maupun negara dan nagari ko.

“Kini den tanyo ka Muncak, sia tokoh padusi Minang nan namonyo lai satenar namo Kartini, nan kisah jo sejarahnyo di ingek an ka anak-anak mudo satiok tahun,” tanyo Mak Pono.

“Rasuna Said nan namonyo diabadikan jadi namo jalan di kawasan elit Jakarta,” Muncak manjawek singkek.

“Salain jadi namo jalan, lai tau Muncak jo sejarahnyo ?,” Mak Pono taruh mancaca Muncak.

“Dimaa lo ko tau nyo mak. sakola acok takantuak jo cabut, duduak di kelas paota jo panggaduah kawan pulo, pulang sakola lah tataruang pulo dek balari, maa nyo ka takana pelajaran tu lai” Tek Minar man manyolo tanyo Mak Pono.

“Den raso indak Muncak sajo nan dak tau, karano sejarah dan keterangan tentang baliau indak dibahas apolai diperingati satiok tahun baiak oleh pemerintah pusat maupun pemerintah daerah. Harusnyo pemerintah daerah lah nan mambuek muatan lokal baa caronyo anak-anak mudo ko tau lo jo sejarah pahlawan dari nagari kito ko,” makin tenggih nada Mak Pono bahkan manyingguang pemerintah bagai.

“Salain Rasuna Said, lai tantu dek Mak Pono pahlawan padusi nan lain,” Mantari lah manyorong pulo.

“Banyak, di Padang Panjang ado Rahmah el Yunusiah pendiri Diniyah Puteri nan juo pejuang pendidikan wanita, beliau nan partamo mendirikan pesanyren khusus padusi nan sampai kini lah berkembang menjadi perguruan tinggi. Ado Rohana Kudus, wartawan padusi partamo di Indonesia dari Koto Gadang. masih dari Agam ado Siti Mangopoh nan indak takuk jo Balando. Dari Tanah Datar ado Upiak Palatiang, pandeka padusi nan juo santiang manulih syair dendag jo randai,” itu baru nan takana di Den, kalau digali labiah dalam mungkin satiok daerah ko ado, cuma indak ta ekspos apolai sampai dinobatkan jadi pahlawan,” makin samangek Mak Pono kalau lah mambaco sejarah ko.

“Barati banyak juo padusi Minang ko nan hebat jo bagak yo mak,” Mantari takagum-kagum jo carito Mak Pono.

“Iyo lai ado nan diawak, nan diurang ba anjuangan, iu baru tokoh dizaman perjuangan kemerdekaan, alun tasabuk sangkek nambai dalam sejarah Minangkabau baa peran padusi, dek manyanjuang nan bakonde lupo jo nan batingkuluak” Mak Pono alun turun juo tensinyo.

“Barati indak santiang sajo padusi Minang yo mak tapi cadiak jo bagak, ko yo paralu di sokong mah mak, kironyo ado lo nan diawak,” Muncak lah manyorong pulo.

“A Mukasuk Muncak Gah ?” kalua sangik Mak Pono.

“Tadi Mak Pono manyabuk kalau diawak banyak lo padusi nan bagak mambuek Balando takuk, nan cadiak sahinggo jadi urang santiang,” Muncak mahiruk kopi sahinggo kalimatnyo taputuh mambuek Mak Pono tambah emosi.

“Tu a lo arati kalimat nan diawak ado lo ?” makin tenggih suaro Mak Pono.

“Dek Mak Pono tadi manyabuk padusi bagak mambuek Balando takuk, nan dek awak kan ado pulo tapi indak Mak Pono sabuk,” Muncak manjawek tapi Mak Pono makin paneh.

“Sampai-sampai lah Ncak !” Mak Pono lah sirah mukonyo.

“Kini kan masih ado, indak Balando nan takuk jo padusi, tapi Mak Pono, kalau babuni panggilan hape dari Mintuo tu, lah bantuak kuciang dibao an lidih lidih malucuh san pulang ka rumah, antah Mintuo nan labiah bagak dari Singo Batino Minang atau Mak Pono nan labiah panakuk dari Balando,” Muncak galak takekeh.

“Haiayayai, den lo nan dibaenyo,” sasak angok Mak Pono dek kecek Muncak

Berita Terkait :

• Den Paii jo Pitih Den
• Sarawa Tenggih Sabalah nan Tarompa Lah Balang Pulo
• Tadayo Godaan Mantan
• Pulang Basamo Baliak Surang-Surang
• Manggok dek Tibo Tak Disambuk
• Kanai Kicuah Langkueh Disangko Dagiang
• Takah Rang Sumando Hilang Malam
• Tim Pakar dan Tim Pakak
• Cik Ayam Bubar Tapi Baunnyo Tak Hilang
• Tenggen Dek Ulah Cik Ayam