Ota Lapau, Sarawa Tenggih Sabalah nan Tarompa Lah Balang Pulo
tukang tulih : Fendi Moentjak
Walau alun mulai bukak karano suasana rayo, lapau Tek Minar rami juo sahari sudah rayo salain pelanggan setia, nan masuak lapau di hari rayo juo tetangga sabalik jo anak-anak. Menunyo pun babeda. Mulai dari Lanag Tapai, Katan Sarikayo, Katupek gulai Rabuang sampai ka kue sapik, kue bawang jo arai pinang.
Tapi Mak Pono hanyo duduak tamanuang mancaliak urang siliah baganti ma ambiak lamang tapai jo katan sarikayo. Nan duduak maota asik pulo mangulek kacang tujin jo kue arai pinang.
“Maeh lahir batin mak, kok ado garah nan talongsong, kandak talambek dapek atau pesanan nan tak sasuai, yo babari maaf di hari rayo ko dih mak,” Tek Minar ma ulua an tangan.
“Samo-samo Nar, kok ado sarengeh nan talampau atau hariak nan tareh babari lo den maaf. Baitu pulo kok ado nan lupo mancatat an di buku atau sasek etong, yo barila an pulo nah,” jawek Mak Pono nan disambuk Tek Minar jo galak badarai.
“Baa dak sato Mak Pono mangicok kue rayo, itu ado kue bawang, kue sapik, kue arai pinang, nan bakuah ado lamang tapai atau katan sarikayo, kok katupek tingga kuah san lai, cancang jo cubadaknyo lah habih,” Tek Minar babaso.
“Ndak, den bialah aia angek ngilu kuku san,”singkek san jawek Mak Pono.
“Baa kok betu, tiko lai rayo gah, babeda isi lapau nyo mak, hari biaso maa lo ado nan badaruak-daruak tu, lai perai pulo nah samo jo aia angek ngilu kuku, manjo an pulo lah salero tu katiko rayo gah Mak,” Tek Minar mambujuak Mak Pono untuak makan kue rayo.
“Ndak tantu garaman den sakik di kauuu, nan kareh-kareh nan kauu adok an ka den,” kalua jo sarengeh Mak Pono nan disambuk galak badarai Tek Minar.
“Yo jan lah marabo lo Mak Pono, maa tau awak, kalau Mak Pono sakik garaman, dek dak ado tando-tandonyo, cubolah agiah merek di pipi du bantuak peringatan di jalan, ‘hati-hati, garaman berlobang, rawan yang keras-keras dan jaga jarak’ tau urang sadonyo kalau Mak Pono sadang sakik gigi,” Tek Minar tau Mak Pono sadang sakik gigi makin manjadi mampaolok an.
“Kok betu, lamang tapai atau katan sari kayo san lah, kan lai lunak du,” Tek Minar ma umbuak Mak Pono.
“Ndak den, gara-gara sipuluk du bangkik lah maag den bako,” Mak Pono masih mangka dek Tek Minar alun juo baranti galak.
“Ondeeeh.. yo lah malang Mak Pono lai, hari rayo salero batahan, pupuah san lah mak, indak panyakik nan ka mambunuah do,” kato-kato Tek Minar mambuek Mak Pono makin emosi.
Raso nak pai Mak Pono dari lapau tu, tapi ka maa ka madok. Pulang ka rumah tingga baduo san bini, indak lo tantu nan ka di ota an. Pai ka kolam panciang, indak baurang. Duduak di tapi tang aia, paja-paja asyik main badia-badia batuang nan kini lah batuka lo jo paralon.
Dalam Mak Pono bapikia apo padok nan kadipabuek, tibo Muncak di anta anak bujangnyo naiak honda. lapau lapau lapau
“Assalamualaikum Mak, tambah segeh Mak Pono rayo mah, urang susuk barek badan salamo puaso, nan Mak Pono tambah gapuak tambah barisi pipi, salam rayo lah ciek lu, Maaf Lahir Bathin,” Muncak ma ulua tangan.
“Minta maeh, tapi den bakatai juo, ndak tantu den sadang sakik gigi, bakecek an tambah gapuak,” mabirunguk Mak Pono manjawek salam Muncak.
“Maa wak tau kalau mak pono sadang sakik, dak ado tando atau mereknyo do,” Muncak tagalak mancaliak Mak Pono.
“Batua nah Muncak, tadi lah wak kecek an kalau sakik gigi tu agiah rambu-rambu di pipi atau dikaniang bia indak digaduang urang,” Tek Minar manyolo dari dapua.
“Haiyayai tadanga pulo dek inyo,” singkek san Mak Pono.
“Ko baa sarawa lah tenggih sabalah gah Ncak, kok panik bana rayo jan lah sampai sarawa senteng sabalah lo nan bapakai ka lapau,” Mak Pono mamatuk Muncak nan sadang manyanduak katan sarikayo.
“Ko dek pemangkasan anggaran mah mak, kalau samo tenggih tantu gadang lo anggarannyo,” Muncak manjawek sambia manyudu katan sarikayo.
“Sarawa ko balian pamarintah lo tu, dek kanai pemangkasan anggaran lo gai, makonyo lah digaji dek negara, jan sadonyo diharok an juo dari negara, jo sarawa anggaran negara juo nan bananti,”Mak Pono mulai mambaleh.
Dalam Mak Pono badebat jo Muncak soal pemangkasan anggaran, tibo pulo Mantari jo penampilan baru. Abuak rapi sudah bapangkeh, kemeja basandiang nan dari rononyo tampak masih baru, sarawa lepis baru sakali lakek.
Mancaliak Mantari masuak, Muncak lansuang tasambua galaknyo, dikabiknyo Tek Minar, lah sato pulo galak.
“Caliak lah Mak, ado pulo nan labiah parah dari sarawa awak lai, dek awak kaki sarawa baguluang, tibo di kawan tarompa indak samo,” kato-kato Muncak mambuek galak urang salapau.
“Lah samo san kaduonyo, pasti alasan Mantari ko pemangkasan anggaran lo, jatah balanjo dikurangi ibu negara, lai dibalian tarompa rayo sabalah sajo, kalau dibali sapasang maha,” kalua suaro kareh Mak Pono nan mabuek Mantari indak dapek jawek.
“Kecek an ka ibu negara kalian tu surang-surang, pemangkasan anggaran buliah, tapi jan sampai mambalian tarompa laki sabalah sajo, atau dek balanjo bakurang sabalun kalua rumah laki tu di patuk dulu, alah ko samparono lakek kain pakainnyo, ko indak sabalah sarawa baguluang nan sabalah licin,” Diateh kecek Mak Pono nan mambuek Muncak jo Mantari mati kutu.
Baca Juga :
Facebook Comments