Urang Nan Mancalon, Mangaa Awak Tabao Gilo

Tukang tulih : Fendi Moentjak

Mak Pono jalan madok ka hilia indak babaju, nan kain saruang takabek dipinggang cok saruang pandeka, sarawa galembong nan dipakai lah bapiyuah pisaknyo. Tak ado urang nan basalisiah jo Mak Pono sapanjang jalan.

Tibo di lapau One, Mak Pono duduk di palanta bawah batang Seri, sambia basanda, nan kaki lah ma unjua sapanjang palanta.

“Ne, kopi sakarek,” rabiak mak pono sambia mangipeh dado nan lah mulai karenyuk.

“Nan bamintak kopi sakareknyo, rabiaknyo tigo propinsi lo urang mandanga,” garutok One sambia malatak an kopi Mak Pono.

“Kan lah juo tu, dari pado mambao kasiak san deyen ka mari,” Mak Pono indak namuah kalah.

Sambia manunggu kopi elok diminum, Mak Pono takantuak-kantuak Ayam, sasakali tadanga karuah jo capak bibia Mak Pono manahan aia liyua. Mak Pono takajuk katiko Pitok datang jo honda pakai knalpot racing nan suaronya maimbau sumpah urang sa nagari.

Sambia manggusuak mato, Mak Pono tangango mancaliak gaya Pitok. Topi nan dipakainyo balang tigo ragi, baju hijau balampih pulo jo jaket kuniang sahinggo bantuak gulai pucuak ubi. Kok nan sarawa indak namuah tingga, walau indak cabiak tapi batumbok pulo ka jadi mode.

“Baa dek heran Mak Pono mancaliak gaya awak, keren kan mak?,” sapo Pitok sambia galak manih manyapo Mak Pono.

“Apo lo nan keren, saroman urang tenggen abih ubek nampak dek deyen,” jawek Mak Pono hamba.

Mandanga jawek Mak Pono, tapanciang darah mudo Pitok. Disabuiknyo bahso gaya nan dipakainyo dalam rangka manyukseskan demokrasi di negara ko. Iko sebagai bentuk dukungan pelaksanaan Pilkada Badunsanak nanti.

“Talonsong muncuang mah mak, lai tau mak ndak, iko gaya deyen ko gaya gambaran dari koalisi Pilkada nanti. Topi balang tigo ragi ko, koalisi calon Gubernur, baju sarato jaket ko koalisi calon Bupati,” agak tabao emosi Pitok manjalehan.

Mandanga jawek Pitok, Mak Pono galak takekeh, kopi nan sadang dihiruknyo hampia tasambua kalua dek galak.

“Nan biaso urang baganti gaya sakali satahun mangikuti mode nan sadang trendi di tahun itu. Tibo di angku sakali limo tahun satiok urang Pilkada,” jawaban Mak Pono tapek bana kanainyo ka Pitok.

“Ops.. jan mandakek jago jarak,” hariak Mak Pono katiko Pitok ka duduak disampiangnyo.

Mak Pono manjantiak tangan Pitok katiko manyalin galeh kopi ka tadah.

“Mada !!!! lah tiok cacah di ingek an, basuah tangan dulu !!!” kalua sarengeh Mak Pono.

Makin buruak sarengeh Mak Pono mancaliak kurenah Pitok nan indak patuah ka protokol kesehatan, sudahlah tak ba masker, maleh pulo mambasuah tangan dan duduak ka niak malakok pulo.

“Ang mintak san lah ka One tu kopi sakarek lai, zaman corona cok kini ko ndak usah lah minum ciek baduo,” mandanga kecek Mak Pono galak pitok, karano dapek kopi perai.

“Oi masker angku maa, ndak ado lo masker nan banyak ragi saroman partai koalisi ?” sarengeh Mak Pono.

“Alun ado nan maagiah lai mak,”

“Kini kalau kalua indak pakai masker, atau duduak bakurumun indak manjago jarak, siap-siap kanai dando atau kanai kuruang, itu alah ado peraturan daerahnyo, jadi jan kalamak dek awak sajo malangga protokol kesehatan, malala hilia mudiak, bahondoh-hondoh ndak bakatantuan, indak patuah protokol kesehatan, kanai tangkok baru tau,” Mak Pono taruh bacaramah nan mambuek Pitok tangango.

“Dimaa lo mak tau ado paraturan samacam itu, atau Mak Pono dek iri san mancaliak deyen banyak dakek co bakal calon peserta Pilkada gah,” Pitok mancubo mancari alasan.

Makin manggaritih Mak Pono mandanga jawek Pitok nan indak namuah diaja.

“Tu makonyo hape nan salaweh keramik wc tu angku pagunokan untuak mambaco berita, lah sapakan ko itu sajo isi berita, indak juo tau,” kalua sarengeh buruk Mak Pono.

Galek takekeh Pitok mancaliak Mak Pono emosi, dikatokannyo lah sebagai tim sukses hape ko gunyo untuk kampanye dan mendongkrak popularitas calon nan didukuangnyo.

“Tasarah di angku lah, indak namuah diaja, urang nan mancalon mangaa angku nan tabao gilo, tiok ragi lakek dibadan, tu tarompa baa kok tarompa japang san nan bapakai, tapi lai timses gubernur jo bupati, minta lah tarompa indian ka junjuangan angku tu,” jawek Mak Pono mangka.

“Tarompa ko dari calon wali nagari mah mak, cawana dukungan deyen gagal sabalun mandaftar, makonyo tarompa ko tarompa japang,” Pitok manjawek indak namuah kalah.

“hoi karambia topeang, bakirok lah ang lai, lameh deyen mah,” Sarengeh Mak Pono.

Ciloteh Mak Pono lainnya :

• Lapau Kalambu Tangah Malam
• Pitih Sarik Bini Baulah
• Baraja ka Urang Gilo
• Nan Dilarang tu Balimau, Bukan Mandi