Nan Dilarang tu Balimau, Bukan Mandi

Tukang tulih : Fendi Moentjak

Karibo duduak mambuduk dibawah batang seri dimuko lapau One nan indak buka, onda Mio nan nyo salang dari Pitok tagak jo duo buah helem tando lah siap ka pai bajalan.

“dek apo Krib ?, sapo Mak Pono nan heran mancaliak Karibo.

“Gagal rencana wak mak, gara-gara si Botak tu ha,” jawek Karibo mangka.

Karibo mancaritoan, bahso inyo lah bajanji jo ceweknyo siang ko ka pai Balimau ka Singkarak. Lah dijapuk cewek ko, baru ka manggarik basobok jo Botak di simpang. Botak mangatoan kalau kini urang razia, indak buliah kalua rumah, indak buliah naiak onda baduo, indak buliah pai balimau.

“paja Botak licin tu dek iri san ndah Mak, awak mambao cewek pai balimau nan inyo marando juo baru,” Karibo makin tabao emosi.

“Dikecekan an nyo pulo urang razia, beko kanai tangkok, takuk cewek wak deknyo, ndak jadi nyo amuah pai do. Mancaliak cewek wak manggok nan Botak licin tu kekeh dek galak,” manggaritih Karibo curhat ka Mak Pono.

“Kamu tu nan indak tau aturan, indak patuah ka Pamarintah, kamu bilang pula orang iri dek kamu membawa cewek. Makanya manyimak jangan manyamak. Lah cok itu pamarintah mahimbau, ijan kalua rumah kok indak paralu, ijan bakumpua juo, apo lai bakapik-kapik diateh onda cok kamu tadi,” kalua sarengah Mak Pono jo baso nan sakarek ula sakarek baluk.

Jo muko sirah dek emosi, Mak Pono mancaramahi Karibo kalau pengumuman tentang protokol pencegahan Covid-19 sampai PSBB lah manjadi berita semua media dan jadi pembicaraan masyarakat.

“Lah cok iko pandangaran indak juo sadar, lah batubi-tubi pamarintah ma atur supayo kito tahindar dari menyebarnyo virus corona, disuruah diam di rumah, indak usah pai ka nan rami, indak usah baduo-duo, basimada juo lai,” Mak Pono alun baranti manyarengeh.

“Tapi mak, awak ka pai balimau manyambuk Ramadhan,” Karibo masih mambela diri.

“Ooiii Tumbuang !!!!, sadangkan sumbayang bajamaah san lai disuruah ganti jo sumbayang surang-surang di rumah. jaleh itu urusan kewajiban ka Tuhan. Iko angku pai manambah doso jo momen bulan puaso maraso bana pulo,” makin kareh suaro mak Pono manyarengeh.

Dijalehan dek Mak Pono ka Karibo bahaso Balimau nan dilakukan urang kini indak ado dalam kaji agamo. Apolai nan mudo-mudo memanfaatkan momen balimau tu untuk pai baduo-duo, dan itu rentan dimasuki setan untuk babuek cilako.

Kalua kaji Mak Pono, ditarangan lah bahaso urang saisuak balimau aratinyo mambarasiahan diri manyambuk bulan suci Ramadhan. Karano saisuak rumah alun pakai kamar mandi, dan sebagain besar urang mandi ka batang ayia atau ka banda itu makonyo balimau manjadi rami di patang hari terakhir bulan Sya’ban. Balimau sendiri aratinyo mamandikan seluruh tubuah tamasuak malimau abuak di kapalo.

“jadi bukan bauru-uru ka Singkarak, kamudian mandi bacampua laki-laki jo padusi sambia bagaluk bagalak-galak, nan dimukasuk urang tu Kariboooo!!!!!! ” Manggaritih mak pono manasehati Karibo.

“Kok iyo nak manyucikan diri manyambuk Ramadhan, di rumah san lah mandi, mangaa harus ka Singkatak pulo. Nan paralu niat supayo kito kuaik baibadah bulan Puaso kini, dan diampuni doso nan lah balalu,” Mak Pono mulai malunak.

“Jadi baa du mak, indak buliah wak mandi Ramadhan masuak ko ?” Karibo batanyo ma mangisa-gisa abuaknyo.

“Ndeeeeh…baraa lah kapasitas memomry paj ko ha, mako salambek iko bana, nan dilarang du Balimau indak Mandi do,” kalua sarengah Mak Pono nan usali.

Ciloteh Mak Pono nan lain :

• Jangan Salah Menilai