Urang Bapolitik tu Saroman Urang Bapole

Urang Bapolitik tu Saroman Urang Bapole
Mak Pono, buruak sarengeh

Urang Bapolitik tu Saroman Urang Bapole, Kini Mesra Bisuak Saliang Mamburuak an

Fendi Moentjak

Lah coga lagak Mak Pono pagi ko, sarawa lepis jo tarompa indian lah lakek, diateh kemeja planel langkok jo topi tarabuh. Caliak dari jauah lagak Koboi lagak gaek ko.

Dipungguang basandang pulo tas nan ditapi rusletingnya manyumbua duo buah joran. Basijadi Mak Pono mangayuah kureta unto madok ka ilia. Singgah nyo ka lapau One nak mambali rokok.

“Lah kareh garegak baliak mak, lah jilah penampilan Mak Pono mah,” kato Ajo sambia maagiahan rokok Mak Pono.

“Awak indak buliah larut dalam kekalahan, pemilihan wali itu hanyo proses demokrasi. Setelah ado nan manang kito nan kalah ko jan sampai oposisi ndak bakatantu an pulo,” jawek Mak Pono mantap.

“Tu ado lo tim sukses nan marabo-rabo setelah jagoannyo kalah baa lo tu mak, main hariak jo main ancam sagalo macam,” tanyo Ajo.

“Itu nan disabuik angek lo tadah pado galeh, sadangkan sesamo calon urang ko duduak bagandiang jo maota, iko awak sasamo tim sukses amuah lo indak basapoan sampai kini lah nak duo bulan lo sudah pamilihan. Kao deyen itu TEA namonyo,” mulai kalua sarengeh Mak Pono.

Takekeh galak Ajo mandanga sangik Mak Pono. Nan Mak Pono tadi bagageh ka pai mamanciang dek raso kalamak ota politik jo Ajo dibaenye duduak dalam lapau sambia minta kopi sakarek.

“Beko lah pai mamanciang mak, padiah ota mah, ko goreng angek kawan minum kopi,” Akjo malatak an sapiriang goreng isang baru masak.

Mak Pono jo Ajo mambahas kurenah para calon Wali dan tim gaya tim suksesnyo. Mulai dari main garegak dan manjagokan calonnyo sampai jo nan basilunak datang ka rumah warga sambia mambaoan kartu namo.

BACA JUGA  Ciloteh Mak Pono, Urang Nan Mancalon, Mangaa Awak Tabao Gilo

“Nan padiah bana ado lo untuak barogen urang lo mamokok’i tenda basalangan lo, uang kabarasiahan tampek indak lo taagiah, mangaku lo calon nan layak dan berintegritas…. haiyayai,” tasambua sarengeh buruak Mak Pono.

Nak jan Mak Pono tabao emosi, Ajo mancaliak an berita di hape ka Mak Pono. Berita tu mangatoan kalau anak mudo nan aktivis politik tu lah kamari pindah demi mancalon jadi gubernur. Namun karano umua ketek alun bisa, kini nak mancalon lo jadi Bupati.

“Kalau deyen manilai ado duo, partamo positifnyo iko urang indak amuah diam, ambisius dan basumangaik. Kalau negatifnyo indak konsisten, inyak dikakok, iko di hao dan itan raso ka iyo lo. Tapi iko pandapek deyen pribadi,” kato Mak Pono.

Ajo makin basumangaik malawan ota Mak Pono, sasudah mambahas pemilihan Wali Nagari kini ota lah bakambang mambahas politik tingkek nasional. Tentang duo anggota dewan tingkek pusat saling serang di media, nan surang mangatoan diancam kanai tembak nan surang lai membela mangatoan itu bahaso urang badunsanak.

Walau berasal dari bendera nan babeda, dulunya kaduonyo bakongsi. Namun seteah kongsi pacah kini tagak surang-surang dan kadang ado upaya saliang manjatuahan.

“Lai jaleh dek Ajo, urang bapolitik ko cando anak mudo bapole mah Jo. Katiko sadang mesra sadonyo elok, tak ado nan lain jo baun kantuik polenyo harum. Tapi kok lah putuih bancinyo mintak ampun. Jan kan manyapo mantannya nyo tu, basobok jo taranak paliharo annyo namuah manyipak dek baji mah. Alah mah abih hari deyen maota dek Ajoi mah, deyen ka pai mamanciang lah tenggi matoari ha,” bagageh Mak Pono manyandang tasnyo.

Facebook Comments

loading...
Artikel sebelumyaJalan Terban, Akses Menuju Sawahlunto Terancam
Artikel berikutnyaAntisipasi Polres Padang Panjang Terhadap Macet Menuju Bukittinggi