Ciloteh Mak Pono : Takuik Kanai, Karibo ma Isolasi Diri
Tukang tulih : Fendi Moentjak
Tatagun langkah Mak Pono tibo dimuko lapau One, lah siang hari nan lapau indak juo bukak sarupo taralah. Garobok tampek biaso malatak samba jo gulai juo kosong. Dikaco garobok ado karateh batulih “Lapau tutup sementara waktu”.
Taparangah Mak Pono, harok kadapek kopi, kironyo lapau batutuik. Duduak se nyo di palanta dibawah batang seri sambia bakipeh topi tarabuih nan lah pirang. Dalam Mak Pono tamantuak-kantuak ayam, tibo Botak jo onda Mio barunyo.
“Selamat pagi manjalang siang Mak Bro,” sapo Botak nan indak turun dari ondanyo.
“Bataratik lah stek Botak, mamanggia Bro ka deyen, kok ka Karibo ndak ba do, basalam bagai lah jo mamak lu mangaa bapaneh-paneh diateh onda tu,” kalua sarengeh Mak Pono.
“Ndak tu ha, lah cok iko pandangaran Mak Pono panayiak tensi juo,” jawek Botak.
“Kamarilah duduak, mangaa bajamua jo paneh tu, batambah kalek beko,” Mak Pono mulai malunak.
Ditarangan lah dek Botak, bahso sasuai jo anjuran pamarintah indak buliah duduak dakek bajarak minimal satu satangah meter. Sudah tu bajamua jo cahayo matoari untuk manambah daya tahan imun tubuah.
“Tu samo indak nyo tu, duduak bapaneh, masker lakek, jaket indak babukak, dimaa lo badan tu ka kanai cahayo matoari,” jawek Mak Pono indak namuah kalah.
“kok dibukak lo baju jo sarawa, dibae bapaneh duduak diateh onda nan kapalo licin pulo, bantuak tuyul kasiangan lah wak dek nyo mak,” jawek Botak takekeh dek galak.
“Haiyayai, indak makan aja lo paja ko tampak ko do,” Mak Pono manyarengeh untuak kasakian kalinyo.
“Ka pai mamanciang juo Tak, yo lah mada yeah, disuruh sanang di rumah pai juo ka tan’g Ayia, bako manular virus corona dari lauak tu barubtau raso,” sambuang Mak Pono.
“Dimaa lo binatang ka kanai corona dek Mak Pono ko, jan maloge lo Mak Pono lai,” Botakindak namuah kalah.
Mandanga Botak mangareh pulo, tabik buransang Mak Pono, ditarangannyo lah bahso di Amerika Harimau sajo kanai corona, jadi bukan manusia sajo.
“Sadangkan Harimau sajo nan Rajo Hutan lai kanai, kunun pulo lauak Mansai nan di tang Ayia,” Mak Pono manyarengeh lo baliak.
“Awak mak Pono kecek an mada, indak patuah ka himbauan, Mak Pono baa kok baragak juo, sanang san lah bakipeh-kipeh dirumah du,” Botak indak namuah kalah.
“Haiyayai malawan nyo di kecek an, kalau Mamak ko batagak mangonrol sia nan indak patuah, sia nan baragak jo bakumpua juo katiko social distanding,” makin maninggi suaro Mak Pono.
“Karibo maa nyo, dek surang san bajalan?,” tanyo Mak Pono maaliahkan pembicaraan.
“Nyo sadang manjalani Isolasi diri mak,”
“Baa caritoonyo, kanai lo nyo dek Covid-19 atau ado urang dirumahnyo nan kanai ?” tanyo Mak Pono maibo.
“Indak Mak, Karibo ma isolasi diri dari bank ampek anam nan mancarinyo sajak kalamari, ” kato Botak.
“Oi tumbuang, sangko deyen lah kanai virus lo nyo, kiroo maisolasi diri dari kajaran hutang,” kalua sarengeh buruak mak Pono.
Ciloteh Mak Pono nan lain :
Facebook Comments