Ota Lapau, Takah Jando Patah Hati

Tukang Tulih : Fendi Montjak

Mak Pono manengkuk bajalan sudah managak an Onda dilaman lapau, sarawa baguluang sabalah, nampak kaki luko-luko di tulang karing sampai ka pungguang kaki. Mancaliak kateh nampak lo tangan luko sebagian bapaluk jo perban.

“Huuuuff… huuuualaaaah,” Mak Pono maelo angok sakatu duduak di palanta.

Tek Minar nan cameh mancaliak Mak Pono bagageh manyonsong sambia mambaoan galeh barisi aia putiah angek. jando jando jando jando jando

“Dek aa Mak, jatuah Mak Pono tadi, lai dak ado nan patah, lai dak bajaik, caliak lah ha, lah bakalukuran sadonyo ? ” Tek Minar mancaca Mak Pono jo tanyo.

“Ciek-ciek lah kau batanyo gah, ndak tantu den sakik, takah maloncek an bada ka kuali san nyo mananyo, indak baranti,” Mak Pono Manyarengeh sambia ma unjua kaki nan luko ka ateh palanta.

Sudah maelo angok sambia manahan sakik, Mak Pono mancaritoan kecelakaan nan dialaminyo di jalan rusak dakek simpang masajik. Honda nan diracak Mak Pono lago tigo jo honda nan dibao dek ras terkuat dimuko bumi sarato honda anak sakola. Katigonyo balago dek samao-samo mailak an lubang nan takah kubang kabau tu nan lawehnyo labiah laweh dari sumayan sapuluah sukek baniah.

“Urang tu baa mak ?” Tek Minar masih penasaran.

“Nan ibo den mancaliak anak sakola nan bonceng tigo du, sudah balantak, tagolek ka dalam kubangan jalan tu, lah bagalong katigonya, bagadiyak, lai ko lah dak basah lo hapenyo surang-surang ko lah, kok hondanyo tadi nyo nampak ado lo rusak dek den,” sasak angok Mak Pono manjalehan.

“Honda nan ciek du baa mak ?” Tek Minar antusias mananyo.

“Itu lah dek kauu, sudah den disenggolnyo, nan anak sakola gah diantaknyo, inyo masih malayok-layok sampai nariah tabang ka dalam lapau pak jorong, mujua ado palanta nan ma ambek nah,” Dalam Mak Pono manarangan tu, mancogok lo Muncak jo raso takajuk mancaliak kondisi Mak Pono.

Alun ilang sasak angok Mak Pono sudah manarangan ka Tek Minar, Muncak sato lo ma wawancara sarupo penyidik.

“Iko bukan kajadian partamo jalan rusak tu makan korban, hampia tiok hari ado urang jatuah disinan. Dan jalan rrusak parah bukan cuma dititik itu, sampai k Banda Rabuk sampai ka Guak Panjang banyak jalan rusak, mulai dari nan balubang sampai nan lah jadi kubang,” Muncak mananggapi kejadian nan dialami Mak Pono.

“Kalamari oto Naro mambao Padi dari Guak Dama ka Heler Gadang rusak lo tibo sinan nah, tahanyak tantang kubangan dimuko lapau Pak Jorong tu, nan anak sakola rami lo pulang, lah kalebuk jalan deknyo,” Tek Minar maagiah info pulo.

Dek Tek Minar mambaco itu, Mak Pono jo Muncak lah barabuk lo mancariton babagi kajadian sapanjang jalan rusak ko. Mulai dari nan jatuah surang, jatuah balangga dek samo-samo ma ilak an jalan buruak sampai nan mangangak baonda sambia main hape lah tarambau ka dalam kubangan jalan.

“Baa gak nyek Mak, dek urang tang kayu nan kasin bia bauek, dek Mak Pono baa kok siku,” Mantari nan baru tibo lah mancimeeh pulo.

“Jan mangaleke jeh Mantari, prihatin lah steh, lah cok itu parasaian Mak Pono,” Diimpoknyo Mantari jo kain lap dek Tek Minar.

“Baa kok sampai kanai Mak, tingga induak limau, lupo ka kaji sahinggo lalu dek lawan,” Mantari mananyo sambia mamparatian luko Mak Pono.

“Indak, kalau ka naiak kelas tantu harus melalui ujian,” Muncak manolong manjawek.

“Naiak kelas baa lo?” Mantari heran.

“Mak Pono ka naiek kelas dari pembalap kureta unto jadi pembalap motor matic, kiroonyo cidera pas melewati rintangan, nyo senggol dek Ras Terkuat di Bumi,” Muncak manjalehan ka Mantari nan disambuk go galak takekeh.

“Kamanakan kalera kalian surang-surang mah, den sakik, bukannyo prihatin, bagai san nan kalian sabuk,” Kalua sarengeh Mak Pono.

Dari ota Mak Pono jatuah dimuko lapau Pak Jorong, tabaco lah kalau jalan rusak indak cuma itu di nagari gah. Tapi banyak, bahkan jalan negara nan malinteh di Koto Baru sajo masuk kategori rusak parah. Mulai lapeh dari jambatan laweh sampai ka bakeh kantua bupati, balubang jo bagalombang.

“Indak jalan sajo mak, caliak lah itu GOR Batu Batupang, padohal salah satu maskot daerah tapi indak tarawat, mulai dari rumpuk lapangan nan lah satenggih induak kudo sampai bangunan nan lah rusak indak tarawat, tamasuak trotoar sudah dibangun rancak-rancak tapi bapadia an san balumuk jo barumpuk” Mantari manarangan kondisi terkini.

“Den mancaliak nagari awak gah takah Jando Patah Hati, indak peduli dan indak ado nan peduli,” Mak Pono manjaek singkek nan mam buek Muncak jo Mantari indak mangarati.

Ditarangan lah dek Mak Pono, duku sangkek jadi ibukota kabupaten, indak ado nan saparah iko, rusak sakatiak langsung dipelok an, iko dibuek, itu di parancak, tiok sabanta babadak, tapi sajak Ibukota pindah, sadonyo barubah” dibantangan dek Mak Pono jaleh-jaleh.

“Kok itu bukan JANDO PATAH HATI namonyo tu mak, tapi DUDA PATAH HATI,” jawek Muncak mangaleke.

“Tasarah dek kalian lah, kok a namonyo, nyo heboh badedat jando ju duda, nan sakik den kalian tak peduli,” Mak Pono manyarengeh sambia manengkak kalua lapau.

Baca Juga :

• Nan Diawak Ado lo Nyeh
• Den Paii jo Pitih Den
• Sarawa Tenggih Sabalah nan Tarompa Lah Balang Pulo
• Tadayo Godaan Mantan
• Pulang Basamo Baliak Surang-Surang
• Manggok dek Tibo Tak Disambuk
• Kanai Kicuah Langkueh Disangko Dagiang
• Takah Rang Sumando Hilang Malam
• Tim Pakar dan Tim Pakak
• Cik Ayam Bubar Tapi Baunnyo Tak Hilang
• Tenggen Dek Ulah Cik Ayam