Baraja ka Urang Gilo
Tukang tulih : Fendi Moentjak
Walaupun hari angek di bulan puaso, indak mangurangi sumangaik Mak Pono menjalan tugas sebagai anggota penanganan Covid-19 tingkek nagari. Tugas Mak Pono mancari urang nan malangga peratiran salamo PSBB diberlakukan, kalau kadapatan dinasehati, kok ndak talok diproses sacaro hukum.
Katiko lalu di jambatan, Mak Pono mancaliak ado asok dari bawah tembok dipangka titi. Asok ko indak banyak sarupo sarok tabaka. Mak Pono curiga, lai ndak ado lo pareman ndak ndak puaso nan manyuruak dibawah jambatan ko.
Hampia tarangkak Mak Pono dek bagageh turun daei kureta unto latiko mancaliak Pitok, Karibo jo Botak main remi di bawah jambatan.
“Hoi siampa !!! Apo karajo kalian, sudah tak puaso baampok pulo padok kalian, iko nan ka jadi karak narako bisuak mah,” hariak Mak Pono katiko mancaliak tigo sakawan ko.
Botak jo Karibo nan takajuk dek Mak Pono tibo lah tangango kanai sarengeh, sadangkan Pitok nan baniaik ka mambuang kopi ka tang ayia lah tagalincia, sahinggo barumban masuak tang ayia.
“Itu baru hukuman dunia, bisuak di akhirat antah cok apo nan ka kalian tarimo,” Mak Pono alun juo ilang berangnyo.
Di kaluakannyo hape dek Mak Pono, dipoto wajah masing-masing tamasuak Pitok nan lah basah Kuyuk sudah balambin tadi. “Iko akan jadi bukti deyen malaporkan kalian.”.
“Lah akur Mak Pono jo Pak Wali kini tu, sajak kalah wakatu tes mangaji dulu, baru kini Mak Pono lah dakek bana jo pak wali, lah cok kantuk jo aia liyua. Babuni kantuk nan aia liyua kalua sakali,” Botak nan lah tau bana pakobeh Mak Pono mancubo malunak’i gaek ko.
Bukannyo lunak, mandanga kato-kato Botak makin manggaritih Mak Pono dek mangka. “Tau kalian ndak, deyen diagiah amanat dek Pak Wali mancari urang nan malangga aturan PSBB nan marusak auasana Ramadhan di nagari ko.”
“Jan lah ganas-ganas bana Mak, awak samo awak. Nan maa aturan tu nan kami langga,” Karibo mancubo malunak ka Mak Pono.
Makin angek talingo Mak Pono mandanga Karibo, ditaranganlah nan partamo malangga himbauan indak kalua rumah, nan kaduo malangga himbauan untuak indak buliah bakumpua. Nan katigo hari bulan Ramadhan, sudahlah indak puaso, bahampok pulo.
“Lah jaleh dek kalian !! ” Mak Pono mangunci pasal nan dibacokannyo.
Makin tarabo Mak Pono, dibaconyo lah sado protokol Covid-19 dari nan pribadi sampai social distansing dan phisycal distansing.
Mancaliak Mak Pono makin tarabo, bukannyo takuk, Botak malah maajak Mak Pono baadu argumen.
“Cubo Mak danga pulo kisah urang gilo nan kebal corona ko dih, Urang gilo tu sosial distancing nyo lakukan. Ma’a ado urang gilo bergerombolan ataw bakumpua-kumpua di lapau sambia maota mahampeh domino gai, takah-takah urang nan indak gilo,” kato Botak mamulai caritonyo nan mambuek Mak Pono mambulancik an matonyo.
Botak malanjuik caritonyo, Urang gilo tu ndak punyo raso khawatir atau was-was, zaman kini yang mati dek korona 10 urang, nan mati ketakuik’an 100 urang.
Nan katigo, Urang gilo tu nyo bajalan taruh, jadi olah raga taruh manaruhnyo. Makonyo fisiknyo sehat. Ndak samo jo urang nan indak gilo doh, bajalan senek sasak angok mulai balasuh-lasuh bunyi e.
Nan ka ampek, Urang gilo tu ndak manaruah curiga ka urang gilo lainnyo doh, ndak bantuak urang nan sehat, sado kadicurigai.
Nan ka limo, Urang gilo tu nyo bapaneh paneh, ndak maandok-andok bantuak nan indak gilo doh, kanai paneh saketek mati katakuk an jangek kahitam.
Nan ka anam,Urang gilo ndak punyo fikiran kumuah busuak hati bantuak nan ndak gilo doh. Dan Urang gilo selalu optimis untuak hiduk dan indak pulo pernah mencurigai urang lain nan sasamo urang gilo.
“Tasarah kalian lah, baraja lah ka urang gilo, kok ka gilo kok ka masuak narako, indak namuah di aja surang-surang,” jo sarengah Mak Pono mamotong carito Botak.
Ciloteh Mak Pono lainnya :
Facebook Comments