Ota Lapau, Pulang Basamo Baliak Surang-Surang

Tukang Tulih : Fendi Montjak

“Aaauuuuuu kan, saratuh duo puluah oto nan ka pulang, cok a lah banyak nyo du, anggap san saoto gadang tu isinyo ampek puluah limo urang, kok ado lo nan mambao anak, takah aa lah raminyo du,” Mak Pono tangango mancaliak postingan hape tentang pulang basamo perantau Minang nan di sponsori Andre Rosiade jo Prabowo.

“A deh mak, taketu bana unjua bibia mancaliak hape,” tanyo Mantari nan baru mancogok di lapau Tek Minar.

Mak Pono mancaritoan tentang berita nan dicaliaknyo di hape, rombongan pulang basamo parantau Minang di Jabodetabek manuju Ranah Minang nan barangkek dari Senayan Jakarta hari Minggu tanggal anam baleh Maret duo ribu duo limo.

“Baa Mak Pono nan sabananyo gah, kecek mak barangkek hari Sanayan, tapi dari Jakarta hari Minggu tanggal anam baleh, hape Mak Pono nan salah setting atau Mak Pono nan salah baco,” Mantari mamastikan keterangan nan disampaikan.

“Danga jaleh-jaleh den mangecek, barangkek dari Senayan hari Minggu tanggal anam baleh. Senayan tu namo tampek di Jakarta bukan namo hari, tu makonyo manonton tipi jo main hape nan dicaliak jan berita artis san, Sanayan tu komplek permanen.” kalua sarengeh Mak Pono dek ulah tanyo mantari.

Mancaliak Mak Pono naiek tensi tasambua galak Mantari, Tek Minar nan hilia mudiak kalua lapau mambao pabukoan untuak digaleh sato galak pulo. Baitu pulo Muncak nan baru tibo nan tadanga Mak Pono manyarengeh bagageh masuak lapau dan galak pulo.

“Ko ciek lai, baru tibo sato lo galak bakuai,” makin angek Mak Ponoi dek sadonyo manggalak annyo.

“Nan awak galak an Mak Pono mangecek an komplek permanen tadi, barati Mak Pono acok mancaliak berita tapi dek sambia mangulek kurang pas tasimpan infornyo dek mamak,” Muncak bausaha baranti galak tapi alun bisa.

“Kan iyo deh, dimaa lo salah den, kantua DPR jo MPR du,” Mak Pono masih kareh angok.

“Tampeknyo iyo batua, tapi nan Mak Pono sabuk salah, indak komplek permanen do tapi komplek parlemen, tampek apak-apak anggota MPR dan DPR bakantua jo basidang, bahkan di tipi kan ado berita khusus nan namonyo kabar parlemen mah,” Muncak manarangan bajaleh-jaleh.

“Maklum san lah kalian, dek puaso nah, tambah lo Mantari ko batea sajalah tu den manyabuk dari Senayan di kecek an hari Sanayan,” Mak Pono tatek mambela diri.

Ota di lapau manjalan babuko masih angek mambahas tentang perantau pulang basamo nan didukung Andre Rosiade, Anggota DPR RI dari Sumatera Barat nan dikenal dakek jo presiden Prabowo.

Pualang Basamo ko ado duo gelombang, partamo barangkek hari Minggu tanggal anam baleh Maret banyaknyo saratuh duo puluah oto. Nan kaduo barangkek sapakan sudah itu, hari Minggu tanggal duo puluh tigo Maret. Kota nan dituju Padang jo Bukik Tinggi.

“Tu nan ka pai ka Pariaman, nan ka Pasisia, nan ka Lubuk Basuang atau Payokumbuah baa caroo tu?” tanyo Mak Pono.

“Beko dari kota nan duo tu, kan tingga manyambuang naiak oto ka tampek masiang-masiang lai, nan jaleh ongkos dari Jakarta ka Sumbar alah salamaik nah,” jaleh Mantari.

“Tapi den baco di SuhaNews, sampai saparo puaso panumpang bus dari Jakarta manuju Sumbar masih langang, masih antri bus-bus Sumbar manunggu trip tagak di terminal Kampung Rambutan, biasonyo saparo puaso ko lah mulai rami urang pulang kampuang mah.” sambuang mak Pono.

“Rasaki surang-surang kan lah sudah lah dek Mak Pono deh, mungkin kini alun rasaki para awak bus, tapi rasaki bagi perantau nan dapek mudik gratis. Tapi bisuak sudah rayo urang rantau ko baliak ka Jakarta akan mancari bus juo, namonyo iduk ado masonyo,” jawek Mantari.

“Muncak baa kok anok san ?” tanyo Tek Minar sambia mambao panci barisi gulai nan ka dijua.

“Ibo wak jo Mak Pono, lah sasak angok liau badebat jo Mantari, kok sato lo awak naiak tensi baliau bako, dikadu kan awak ka pak dewan di komplek permanen,” Muncak manjawek basilunak.

“Alah nah Ncak jan diulang jeh baliak, sasek den namonyo nah, lah jaleh urang puso, biaso san sasek nyeh du, jan sado ka jadi pakaro jeh,” baliak lo angek Mak Pono dek jawek Muncak nan disambuang jo galak dek Mantari

“Jadi urang pulang basamo gah, sudah rayo baliak ka rantau basamo lo baliak mak,” Muncak mancubo malunak mancaliak muko Mak Pono nan lah sirah.

“Pulang basamo, baliak surang-surang,” jawek Mak Pono singkek.

Baca juga :

• Ota Lapau, Manggok dek Tibo Tak Disambuk
• Ota Lapau, Kanai Kicuah Langkueh Disangko Dagiang
• Ota Lapau, Takah Rang Sumando Hilang Malam
• Ota Lapau, Tim Pakar dan Tim Pakak
• Cik Ayam Bubar Tapi Baunnyo Tak Hilang
• Tenggen Dek Ulah Cik Ayam
• Mati Tak Makan Dek Indak Ado Ayang
• Mak Pono Juga Butuh BPJS
• Awak Tibo Nyo Acuah San Nyeh
• Takuk Kanai Suntik, Abih Kiramaik Mak Pono dek Buk Bidan