Ota Lapau, Tu Harus Den Lapor ka Kang Dedi
Tukang Tulih : Fendi Moentjak
Mantari sibuk manarimo talepon, wajahnyo serius mangecek, sasakali kaniangnyo bakaruk. Duduak di suduk lapau, indak mancaliak ka Mak Pono jo Muncak nan lah labih dulu tibo dan maota sajak tadi.
“Baaa ? ndak amuah takah itu deh du, awak nan payah bajuang inyo lo nan ma atur, patang gah kamaa san inyo, sado urang tau kalau inyo dipihak sabalah, ndak masuak gaya paja tu do !” Tarabo Mantari bantuaknyo.
Bamacam nan disabuk dek Mantari, mulai dari perjuangan, pilkada, jabatan, pelantikan sampai BPK bagai nan tasabuk. Nan Mak Pono jo Muncak makin heran jo arah pembicaraan Mantari di talepon. Ndak lamo, Mantari tagak, bagageh kalua lapau, rokok nan disalai tadi lah tapuntuang di tangan.
“Barek masalah Mantari bantuaknyo mah Ncak,” kato Mak Pono mancaliak Mantari maracak Honda bagageh madok ka hilia.
“Den raso iko masalah rumor pelantikan mah, sajak sapakan gah urang tu itu san bahasannyo, sabek alun ado juo pelantikan lai, samantaro pejabat nan sadang duduak kini lah mulai lo ma atur strategi untuak mampatahankan jabatannya, mulai dari mandakek, manjilek, sampai mampataruahkan harago diri,” Muncak mambukak carito.
“Itu lah kaji nan biaso nah Ncak, sakali aia gadang, sakali tapian barubah, lah suasana rutin tiok sudah Pilkada nah. Pasti ado nan patang basorak paliang baji, paliang tahu keburukan calon, setelah tapiliah, inyo nan mangaku bajuang paliang dimuko, inyo nan manunjuak an jalan,” jawek Mak Pono.
Disampaikanlah dek Muncak, kalau kini kondisi labiah parah dari era sabalumnyo. Dulu setelah Pilkada, para pejuang dari pasangan terpilih langsung bergerak cepat, lagaknyo labiah dari Bupati. Nan pendukung pasangan kalah dianggap musuah besar dan disingkirkan.
“kini setelah jagoan mereka kalah, dek takuk tersingkir sarupo nan mereka lakukan, mereka berjemaah manjilek. Bukan cuma itu, malah mereka berupaya menyingkirkan tim-tim yang telah berjuang,” Muncak labiah emosi lo mangomentari ota Mak Pono.
Dalam kaduonyo angek membahas kondisi pemerintahan terkini, tibo Pitok jo Botak naiak becak dan ditagak an dimuko lapau.
“Dari maa ang Tak, kok takah dariang kariang di baju ang ?” tanyo Mak Pono mancaliak baju Botak badarah.
“Dari Puskesmas, ma anta an anak sakola jatuah jo Honda di jalan buruak muko lapau Pak Jorong,” jawek Botak sambia maamabiak rokok dimuko Mak Pono.
Pitok nan mangawanan Botak mancartoan, tadi manjalang Jumaik wakatu anak sakola rami pulang, ado nan balangga di jalan tu dek samo-samo mailak an jalan buruak.
“Tapi alah bapelok an, lah gotong royong pemuda manimbun mah,” tanyo Mak Pono heran.
Dijawek dek Muncak, takah a bana lah hasilnyo gotong royong dilakukan secara swadaya tanpa alat untuk mampadek an timbunan.
“Itupun kareke nan dibuek panimbun, adolah material jalan lintas nan dikikih dek masin untuak diganti jo aspal baru, ditimbun ka jalan balubang tanpa dipadek jo masin, satiok hari ratusan oto jo onda nan malinteh, kok hujan hari, dijamin indak sampai sapakan lah jadi kubangan lo baliak nah,” Muncak manarangan.
“Baa kok lambek bana dipelok an jalan tu Mak, padohal itu jalan rami, urang pai sakola, urang pai ka babagai komplek juo banyak malinteh situ,” Pitok sato pulo.
“Mak Pono sampaikanlah ka Pak Dewan atau Pak Pati atau sia lah nan bakompeten nan bisa marubah kondisi jalan tu manjadi labieh elok,” Botak manambahkan.
Tek Minar nan sajak tadi hanyo mandanga ota Mak Pono jo Muncak kini lah sato pulo mangompori agar Mak Pono sato manyuarokan kondisi jalan nan rusak parah nan lah banyak makan korban.
“Jan cuma sato mambahas, sia ka manjabat, sia nan ka di parantian, itu bukan kewenangan Mak Pono, tetapi sebagi tokoh nagari, Mak Pono angkek lah kondisi jalan tu agar capek diperbaiki,” Tek Minar lah sato pulo.
“Tu harus den malapor ka Kang Dedi, bia capek ditanggapi, ka den kalian madok sadonyo,” tabik suga Mak Pono. lapau lapau lapau
Baca Juga :
Facebook Comments