Jangan Salah Menilai jangan salah menilai

Tukang tulih : Fendi Moentjak

Mak Pono nan sadang takantuak-kantuak ayam di barando tagagau dikajuik an Botak nan tibo pakai jas hujan, langkok jo sapatu bot nan biaso dipakai pai mangayia malam sarato helem.

“Saripah !!!! capek lah bangkik kain hari hujan labek,” Mak Pono mahariak ma imbau cucunyo sambia mamelok an lakek saruang.

Mancaliak Mak Pono takajuk sambia manyuruah ambiak kain di jamuran, Botak galak gadang. “Dek aa mak, hari paneh garang kain di suruah bangkik, mimpi apo Mak Pono tadi ?”

“Haiyayai, mancaliak Botak pakai jas hujan, langkok jo bot sarato helem deyen sangko hujan labek tadi,” jawek mak Pono sambia manyeka aia barih dipipinyo, nan Botak alun juo baranti galak.

“Ndak pai ka kubua mak ?, dunsanak wak nan di Padang maningga dikubua an di Subarang,” Botak ma ajak Mak Pono badamai.

“Alun dapek kaba deyen lai, baa dek pakai jas hujan sarato bot jo helem bagai pai ka kubua Tak ?, Mak Pono masih heran mancaliak penamilan Botak.

“Nan maningga ko positif corona mak, jadi pai ka kubua harus jo pelindung diri lengkap, sasuai jo petunjuk dari pemerintah,” jaweb Botak.

“Apo dasar Botak mangecek an positif ?, alah jaleh almarhum ko positif corona, alah ko inyo diumumkan dek satgas sebagai pasien positif ?” suaro Mak Pono mulai maninggi.

“Ado urang mambuek dipesbuk mak, dek lah dikecek an positif di pesbuk makonyo wak pakai pakakeh cok iko,” Botak takuik mancaliak Mak Pono.

Mancaliak Botak mulai takuik, makin tinggi suaro Mak Pono manarangkan tentang pasien positif Covid-19 ko. Indak gampang dan indak mudah memastikan pasien ko positif. Ado beberapa tes nan dilakukan dek petugas rumah sakik sampai uji labor. Setelah dinyatakan positifpun indak sumbarang urang lo nan manyampaikan do, harus dari pihak rumah sakik atau badan resmi nan ditunjuak pamarintah.

Sudah manyangik jo mahariak Botak, Mak Pono manalepon Wali Nagari mananyokan berita pasti tentang warga nan maningga ko. Sajak kalah dalam pencalonan dulu, baru iko Mak Pono manalepon Wali Nagari.

“Hoi tumbuang, angku kecek an ka urang nan mambuek status pesbuk tu dari maa nyo tahu. Cacah gah den talepon wali nagari, alun tau hasilnyo lai. Sia bana paja nan santiang du nan mambuek status, tenggih lo ilemu dari dotor lai, santing lo dari urang rumah sakik mah yeah,” manggaritih Mak Pono mancaliak Botak.

Manggaretek tangan Botak mambuka pesbuk di hapenyo, mancaliak an status tu ka Mak Pono. Alun sampai hape tu di tangan Mak Pono, lah kalua lo sarengeh gaek ko mambuek Botak makin kuncun.

“Kecek an ka paja tu, nyo hapuih statusnyo tu atau deyen nan ka mahapuihnyo dari nagari ko,” sarengah Mak Pono nan usali kalua mambuek Botak manggaretek. Tanpa permisi bagageh Botak pai maninggakan Mak Pono.

Baru salasai Mak Pono maraguak aia putiah untuak manurunkan emosinyo tibo pulo Karibo, manyandang saruang bugih sarato kupiah nan ampang labuah.

“Indak ado urang nan sumbayang Jumaik do mak,” kato Karibo wakatu tibo di barando tampek Mak Pono sudah marabo ka Botak.

“Iko ciek lai, alun turun darah deyen dek nan Botak tibo lo nan Karibo, haiyayai,” Mak Pono manggawik kapalo mancaliak gaya Karibo.

“Angku ka pai kamaa manyandang kain saruang jo kupiah ?,” lah kanai sarengeh lo Karibo.

“Lah tigo musajik wak tampuah tadi mak, indak ciek juo nan maadokan sumbayang jumaik, cik inan lo sumbayang Jumaik mak,” jawek Karibo sambia bakipeh jo kupiahnyo.

“Katiko urang indak sumbayang bajamaah dek mencegah corona, angku cak icak sibuk mancari musajik. Katiko urang sumbayang jumaik, angku sibuk jo katrol di tang ayia. Antah indak manyimak antah sok siak,” kalua sarengah Mak Pono nan kaduo untuak Karibo.

Mandanga sarengeh Mak Pono, sambia galak karibo manyanyikan lagu Jangan Salah Menilai, langkok jo ekspresinyo nan mambuek Mak Pono tambah naiak tensi. ***

Ciloteh Mak Pono Lainnya :

• Ciloteh Mak Pono : Takuik Kanai, Karibo ma Isolasi Diri
• Mak Pono, Kaniang Disensor Muncuang Balampok
• Ciloteh Mak Pono : Abak jo Amak Basiarak, Mamak Sibuk jo Pusako
• Urang Bapolitik tu Saroman Urang Bapole

jangan jangan jangan jangan