Ota Lapau, Etek Manggok, Marapulai Tak Buliah Pai

Tukang Ota : Fendi Montjak

Jamaah lapau Tek Minar masih sibuk membahas kondisi sasudah pelantikan kapalo daerah, Presiden mamarintahkan seluruh Gubernur, Bupati dan Walikota untuak mengikuti kegiatan nan diadokan Kementerian Dalam Negeri di Akademi Militer.

“Hebat lo urang ko ndak, kompak dari Gubernur sampai seluruh Bupati dan Walikota naiak bus pai Ospek nan diadokan Menteri Dalam Negeri,” Muncak mananggapi foto Gubernur Mahyeldi diateh bus basamo-samo jo para Walikota dan Bupati pakai baju seragam militer.

“Ospek baa lo gah Ncak,  disangko para kepala daerah gah siswa baru masuak sakola ba ospek lo bagai ?” tanyo Mak Pono.

“Beko awak sabuk an lo bahaso tenggihnyo ndak lo kamangarati Mak Pono, samo lo jo istilah demisal kapatang, tabik lo gagok mancari aratinyo,” jawek Muncak.

“Kapatang du deyen alun manonton berita, lah kalian tanyo tantu iyo ndak tantu jawek den,” Mak Pono mambela diri.

Disampaikan dek Mak Pono, salah satu tujuan kegiatan pembekalan ko adalah agar kapalo daerah ko saling mengenal sahinggo mamudahkan komunikasi lintas daerah apolai jo Gubernur tamasuk jo Pemerintah Pusat salah satunya Kementerian Dalam Negeri, disampiang itu diagiah pulo pembekelan tentang regulasi dan aturan-aturan nan harus dipatuhi sarato dampak hukumnyo jikok dilanggar.

“Jadi kapalo daerah sato bekstret gah buliah nak akrab, nak jan maraso jadi rajo juo, tapi kapalo daerah adolah nan di duluan salangkah mamimpin rakyat dan indak buliah babuek sakandak hati, sado nan nio harus dapek, indak ado aturan nan dilangga indak ado undang nan dipatuhi dek maraso bakuaso” Mak Pono bacarito sarupo narasumber.

“Apo mak ? bekstret ?” Mantari nan sajak tadi hanyo diam kalua suaronyo mandanga kuliah Mak Pono.

“Iyo bekstret, kegiatan di Akmil tu namonyo bekstret, kalian sangko andia bana deyen indak tantu istilah kekinian,” kalua sangik Mak Pono nan Muncak jo Mantari takekeh galak.

“Bekstret tu Mak Pono tumah, sudah kalua main kanai skor dek rang rumah, tu baliak ka ibu negara ko baliak, tu yo bekstret namoonyo nah,” tasambua galak Muncak manjalehan dek Mak Pono bakareh jup dengan istilah nan disabuknyo.

Sirah muko Mak Pono dek digalak an Muncak, nan Mantari lah sato pulo manambahan, Mak Pono backsteet katiko mudo dek indak buliah dan indak direstui calon Mintuo. Disabuk pulo katiko itu Mak Pono manggok dulu makan dilapau, lalok di surau indak pulang ka rumah rang gaek tapi maintai padusi idola tetap lanjut.

Raso-raso nak manampa nak urang baduo tu mak Pono, tapi takana juo nan bana, kok kanai lo dek HAM bako, kanai pasal kekerasan, tabik pulo takuk.

“Jadi pernah lo Mak Pono ko bekstret Mantari ? sudah tu kan lai jadi liak ?” Tek Minar sato pulo manyolo dari baliak garobok.

“Lai Tek, sudah tu bekstret liak, dak talok maningga an dek taloroh cinta gah, tu mah kini lah baranam anak baliau sinan,” Mantari takekeh mancaliak ka Mak Pono nan muko sudahlah sirah kni lah masam pulo rawiknyo.

“Alah nah, tabik suga den dek kalian bako lai,” sangik Mak Pono.

“Iyo lah mak, awak luruhan stek, kegiatan ko namonyo retret aratinyo pembekelan bukan bekstret,”Mantari manjalehan

Dialiahan ota dek Mak Pono, dari sekian banyak kapalo daerah nan dilantik tanggal duo puluah tu, ado beberapa orang nan indak buliah sato pembekalan oleh Kemendagri di Akademi Militer dek Ketua Umum partai pengusungnyo. Padahal setelah terpilih kepala daerah milik rakyat bukan lagi milik partai.

Mak Pono mangaluaan hape nan mulai tingga mode, walau hampia sagadang batu bata, dengan percaya diri Mak Pono maresek layarnyo dimuko Muncak jo Mantari. Banyak berita tentang kapalo daerah nan indak buliah sato pembekalan ko. Indak saketek pulo pihak nan mananggapinyo. Namun sebagian besar indak satuju jo keputusan ketua partai dan menganggap kapalo daerah harus patuah ka presiden sebagai pimpinan negara.

“Dek tadi kalian manyabuk ado larangan mintuo, agak mirip jo kejadian kini ko mah,” kato Mak Pono nan mambuek Mantari jo Muncak tangango mandanga.

Kato Mak Pono, diduga etek ko Manggok indak mambuliahan kapalo daerah dari partainyo sato pembekalan karano kecewa, urang kepercayaannyo ditetapkan KPK jadi tersangka. Padahal inyo lah mati-matian membela nak jan sampai itu tajadi.

“Jadi kalau Etek lah manggok, indak pak etek sajo nan takuk yo mak, jo marapulai baru nan sudah baralek tabik gaca indak takao manantang etek, samo jo Mak Pono di rumah, kalau mancegek sambia mangipeh pakain etek, jan kan ka lapau, mandakek ka pintu san indak talok dek Mak Pono.” Muncak manjawek nan mambuek Mak Pono makin tarabo.

“Haiyayai, deyen lo nan dibaenyo,” Mak Pono manampa meja.

Baca juga :

• Ota Lapau, Takah Rang Sumando Hilang Malam
• Ota Lapau, Tim Pakar dan Tim Pakak
• Cik Ayam Bubar Tapi Baunnyo Tak Hilang
• Tenggen Dek Ulah Cik Ayam
• Mati Tak Makan Dek Indak Ado Ayang
• Mak Pono Juga Butuh BPJS
• Awak Tibo Nyo Acuah San Nyeh
• Takuk Kanai Suntik, Abih Kiramaik Mak Pono dek Buk Bidan
• Mangaa Digoreng Juo Abuh San Lah
• Kalah Sarengeh Mak Pono dek Sangik Etek tu