Ota Lapau, Lah Dulu DAMKAR Mangecek dari Apak tu Nah

tukang tulih : Fendi Moentjak

Mak Pono manggarutu masuak lapau Tek Minar, antah apo nan di runguk annyo, indak jaleh tadanga. Sambia bakipeh topi tarabuh usang nan lah oirang langsuang nyo duduak di suduk tampek duduak favoritnyo.

“A jeh nan di runguk an lai mak ?” tanyo Tek Minar sambia malatak an aia angeh ngilu kuku.

“Lai ado jus timun ?” tanyo Mak Pono singkek.

“Ndak ado do mak, nan ado wartel jo tomat lai, beko siang ka balanjo ka pasa rencana,” jawek Tek Minar.

“Lah jaleh tensi den sadang naiak, kau sorongan lo tomat jo waoterl, manggalagak lah ubun-ubun den deknyo, kajang lo den dalam lapau kauu ko beko,” kalua sarengah Mak Pono.

Dalam Mak Pono manyangik dan angok mulai sasak, tibo Mantari jo Muncak baduo naiak Honda.

“Ndak tantu minyak sarik, lamak jeh malala, imek lah minyak du,” Muncak jo Mantari nan baru tibo kanai sarengeh pulo.

Kaduonyo nan lah tau pakobeh Mak Pono, mamasanan kacang padi indak bakuah untuk Mak Pono, bia nak turun tensinyo, nak ilang sarengehnyo.

Katiko lah mulai tanang, Mak Pono mancaritoan nan mambuek tensinyo naiak, sajak kapatang cucunyo maragan minta hape. Karano ssakola akan daring lai, baraja tatap muko akan dikurangi dalam rangka mahemat BBM, kalau baraja di rumah, indak banyak kendaraan nan bajalan, sahinggo pemakaian BBM akan bakurang.

“Tu baa kok Mak Pono lo nan naiak tensi, kan ado apaknyo nan ka mambalian hape du,” jawek Muncak.

“Iyo, tapi dulu den bajanji kalau panuah puasinyo den balian hape baru, kini lansong ditagihnyo, ndak tanyu den den sadang kariang, iko gara-gara si Galia tu ha, den nan disasak an cucu,” alun habih rutok Mak Pono.

“Si Galia maa mak ?” tanyo Mantari.

Baca Juga :

• Kampung Rambutan Diujung Ramadan
• Senja Terakhir 2025 di Jam Gadang
• Dua Pusara Merindu Diujung September
• Kabar Tengah Malam, Air Mata Mak Adang dari Perantauan
• Ratok Rukayah, Rindu Tergadai di Bilik Rantau
• Ratok Rukayah, Lebaran Ini Ia Tak Pulang

Ditarangan dek Mak Pono, sajak jalang rayo berkembang wacana mangurangi aktivitas dilua rumah, mulai dari karajo sampai baraja di sakola. Tujuannyo untuak mengurangi pemakain BBM.

“Sadangkan lai madanga langsuang dalam kelas, lai indak juo tantu palajaran dek anak-anak. kunun pulo baraja di rumah, pakai hape pulo, nan baraja alun salasai nan hape lah tan deh untuak main, iko marubah kebiasaan dan ketergantungan jo hape efek baraja daring sangkek korona dulu alun bisa, lah ka baulang pulo baliak” manggalagak lo Mak Pono baliak.

“Ooo… itu masalahnyo, tapi nan mambuek manggalagak sabananyo indak itu, tapi dek kanai tagih balian hape baru hadiah puaso lai panuah,” Mantari mamotong carito Mak Pono.

Ditarangan lah dek Mantari, salah satu dasar dari alasan wacana baraja daring dan karajo dari rumah ko adolah, mengantisipasi manipihnyo cadangan energi tarutamo BBM. Iko sebagai dampak lansong dari parang Amerika jo Iran nan mahambek jalur perdagangan minyak dunia di selat hormuz.

“Jadi ndak usah mak Pono mareh ka cucu, harusnyo si tram du nan Mak Pono sangik ndak nyeh, bilo paralu ago bacakak di tanah lapang, kan lai takah dulu jeh salero Mak Pono lai ?” Muncak alun baranti ma angek Mak Pono.

“Stek-stek urang baparang du nan basalahan, naiak harago minyak, akibat parang, turun harago ameh, akibat parang, kasudahannyo, tutuk lapau Minar gah bako, parang juo nan basalahan,”makin mangka Mak Pono.

“Kabanyo, kok baraja daring bana Mak, nan MBG lai dapek juo, jadi sambia baraja di rumah dapek juo kulek-kulek nan bagizi,” Muncak indak namuah kalah.

“Iyo dapek, makan mangulek, bagolek, kasudahan lah bulek nan palajaran indak dapek,” Mak Pono manjawek singkek.

“Tapi ibo den mancaliak den mancaliak Mak Pono jo cucu mah, antah talambek dapek informasi antah kurang informasi kini gah,” Muncak mancubo mananangan Mak Pono.

“Apo mukasuk Muncak ?” bakaruk kaniang Mak Pono.

Muncak manjlehan, bahaso rencana baraja daring sebagai upaya mahemat BBM tu alah dibatalkan, anak sakola akan tetap baraja sarupo biaso, nan sadang dikaji kini wacana untuak karajo dari rumah atau dari mano sajo sapanjang karajo jo beban tugas bisa disalasaikan.

“Kini perintah apak tu lah batuka, dari sakola daring untuak mahemat gas, induak-induak nan lah sudah mamasak diminta apak tu jan lupo mamatian kompor,” Muncak manjawek tanang.

“Kok itu nan kadisabuk, DAMKAR lah dari dulu maingek an nah, indak paralu pejabat salevel inyo nan mangana an induak-induak untuk mamatian kompor du, ado san nan ka mambuek tensi den naiak,” Mak Pono kalua lapau maningga an Muncak jo Mantari.

Baca Juga :

• Ota Lapau, Puaso jo Rayo Pakai Spasi
• Ota Lapau, Cadiak Tapi Bodoh
• Ota Lapau, Urang Mancaliak Bulan Inyo Mancaliak Kawan
• Sadakah Moribu Minta lo Kayo jo Parejo
• Ota Lapau, Ka Tuhan Minta Kayo ka Walinagari Minta Miskin
• Demi FB Pro, Bacaliak an Takuk ka Bini
• Bacarai Juo Nan Malakok Taruh Du
• Ota Lapau, Cik Ayam Bubar Tapi Baunnyo Tak Hilang