Ota Lapau, Takah Rang Sumando Hilang Malam

Tukang Ota : Fendi Montjak

Lapau One sadang rami, di tipi berita menayangkan para kepala daerah se Indonesia nan sudah dilantik mengikuti kegiatan di Akademi Militer Magelang, sadangkan di palanta urang sibuk mambahas kondisi pasca pelantikan. lapau lapau lapau

Baragam buah kecek nan kalua, ado nan mambahas tentang passangan calon nan gugatannyo ditolak MK, ado nan mambaco kondisi di kantua pemerintah kini para pejabat sibuk mancario dekingan agar jabatannyo bertahan sarato ado pulo nan mambao kaba banyak tim sukses nan gayanya labiah lo dari Bupati padohal baru sahari nan Bupati sabananyo sudah dilantik.

“Ncak, caliak lah ko ha, taharu pulo wak mancaliak Pak Gubernur Bapaluak jo pak Audy, sampai detik terakhir maso jabatan kaduonyo tatek akrab, indak ado bakarusak an, bahkan katiko Gubernur mamutuskan untuak maju baliak tapi dengan pasangan yang babeda, pak Audy ko manarimo jo lapang dado dan tetap menjalankan tugas sacaro profesional,” si Maran mancaliak hapenyo ka Muncak nan sadang makan katan jo goreng.

“Indak jo gubernur sajo do, baliau mendatangi para pejabat Forkopim propinsi sampai ka bupati jo walikota dijalang untuak pamit mohon diri, baitu santun jo rilanya baliau maninggakan jabatan wakil gubernur,” Mantari nan tdi mancaliak Maran jio Muncak sato pulo mambuka hape dan mancaliak an postingan Audy Joinaldi di media sosial.

“Apo nan kalian caliak barami-rami tu, lah main spot judi online lo kalian, den kadu an ka polisi, masuak tansi kalian mah, lai ka takao lalok diateh tembok dan basalimuk dek kalian,” Mak Pono nan baru tibo di lapau Tek Minar langsuang manyarengeh mancaliak urang dilapau mancaliak hape barami-rami.

Bagageh Muncak manjalehan tentang apo nan dibahas, Mak Pono nan tadi manyarengeh sati lo mancaliak hape Mantari nan sadang mambuka media sosial mantan Wakil Gubernur Sumbar tu.

“Iko nan pemimpin an bajiwa pemimpin tu, ko indak ado lo nan pemimpin sabateh jabatan, tapi jiwa labiah dari ketua pareman, barajo di hati san, harusnyo biah maniru ka kamanakan den gah para pemimpin du handaknyeh nah,” Mak Pono mangipehan topi tarabuhnyo.

“Sia kamanakan Mak Pono gah ?” tanyo Muncak

“Itu nan kalian bahas cacah gah,” jawek mak Pono Singkek.

“Pak Wagub Audy gah ?” Muncak heran.

“Ho oh” Mak Pono maangguak.

“Dimaa lah lataknyo baliau kamanakan dek Mak Pono,” Mantari lansuang manyanggah.

“Lai bapaket hape kalian?” Mak Pono makin manenggih gayanyo.

“Lai” Muncak makin heran.

“Cubo pagadang fotonyo, dan kalian caliak lo mamak kalian gah” Mak Pono mamparatian urang dalam lapu nan mulai maresek hape.

“Lah Mak,” lapor Mantari mancaliak hapenyo.

“Cubo caliak bana rawik muko baliau, ndak mirip jo deyen, wakatu deyen mudo, Mamak gah wakatu mudo cok itu lo gagah nah. kini abuak lah mulai pirang jo gigi lah mulai jarang makonyo lah buruak dicaliak,” jawek Mak Pono ko mambuak isi lapau mangka.

Mancaliak Muncak manggaritih manahan mangka, Mak Poni galak takekeh. Nyo basorak minta aia angek ngilu kuku minuman paporitnyo.

“Lai Mak Pono ikuti kondisi Sumatera Barat pasca pelantikan kepala daerah nan baru gah ?” Mantari mambuka ota.

Dikatoan lah dek Mak Pono, kalau inyo mangikuti kondisi saak sudah pemilihan bulan November nan lalu. Ndak cuma di Sumatera Barat sampai ka kabupaten kota diikuti. Maa pasangan nan manarimo kekalahan secara sportif, maa nan manggugat walau indak yakin ka lalu, ado pulo nan manggugat dengan percaya diri akan ditarimo Mahkamah Konstitusi karano maraso bukti-bukti nan dimiliki kuaik namun akhianya tumbang juo.

“Tapi den akui, indak banyak nan sarupo wagub Audy ko kapalo daerah diakhir masa jabatannyo,” oceh Mak Pono.

Mak Pono manyabuk beberapa kepala daerah nan dilapeh jo aia mato dek bawahannnyo baik itu karano alah habih periode maupun kalah tapi tetap datang ka kantua manyalasaikan tugas sampai maso berakhir dan disarahkan ka nan baru, sarato ado pulo nan hilang san indak basuo lai.

“Hilang baa gah mak?” tanyo Muncak

“Takah Rang Sumando Hilang tangah malam, dak tahan dek sindia mintuo atau mamak rumah, atau dak ditarimo sapanuah hati dek bini, mako rang sumando gah malucuh tangah malam, ditunggu-tunggu indak kalua biliak, kironyo inyo lah hilang malam indak maninggakan pasan,” batanang Mak Pono manjalehan.

“Samo lo Mak Pono sangkek jadi Wali Jorong dulu deh?” tanyo Muncak

“Haiyayai, itu beda carito nah tumbin,” Mak Pono manyarengeh sambia tagak kalua lapau.

Baca Juga :

• Ota Lapau, Tim Pakar dan Tim Pakak
• Cik Ayam Bubar Tapi Baunnyo Tak Hilang
• Tenggen Dek Ulah Cik Ayam
• Mati Tak Makan Dek Indak Ado Ayang
• Mak Pono Juga Butuh BPJS
• Awak Tibo Nyo Acuah San Nyeh
• Takuk Kanai Suntik, Abih Kiramaik Mak Pono dek Buk Bidan
• Mangaa Digoreng Juo Abuh San Lah
• Kalah Sarengeh Mak Pono dek Sangik Etek tu
• Pak Pati nak Ba Bini Ciek Lai