Ota Lapau, Mak Pono Candu Pai Sakola

Tukang Tulih : Fendi Moentjak

Muncak duduak sambia main hape di palanta suduk nan jadi paporitnyo, alun ado nan talatak atau katan goreng sarupo biaso. Dari balakang tdangan Tek Minar sadang hebih jo anak bungsunyo manyabuk pakakeh sakola karano bisuak mulai baraja sarupo biaso.

“Baa kok surang san Ncak,” sapo Mantari nan baru datang.

“Ndak ado umek nan basuo sajak tadi, jo urang lapau indak mancogok, lah heboh mangamehan pakakeh sakola anak san dibalakang,” jawek Muncak.

“Mak Pono tadi maa ? ndak kamari baliau, sangko den kamari tadi dek lah coga gayanyo,” Mantari duduak di palanta muko Muncak.

“Keceknyo pai ka psa ma anta cucu mambali perlengkapan sakola, karano bisuak mulai baraja baliak,” jawaban Muncak ko mambuek Mantari heran karano salamo iko Mak Pono paliang maleh baurusan sakola ko.

Sajak zaman manyakola an anak sampai kini lah cucu pulo nan sakola esde, Mak Pono dapek dihituang jo jari nan amuah datang ka sakola. Mulai dari urusan mendampingi anak, rapek komite apolai ma ambiak rapor.

“Jadi lai pernah lo Mak Pono tapanggai ka sakola dek parangai gai Ncak ?” tanyo Mantari .

“Lai, tu anak bujang liau nan di Batam kini tu acok mambao surek undangan dari wali kelas dan guru BP dulu nah, tapi selalu Tek Ani nan pai. sajak sede sampai se te em, rutin Tek Ani kanai panggi nah, lah takah liau lo nan sakola,” Tek Minar mancogok sambia malatak an kopi untuk Muncak jo Mantari.

“Baa kok tau lo Tek Minar ?”salidik Muncak

Ditarangan lah dek Timar, kalau anaknyo nan nomor duo sapangkek dan samo sakola jo anak bungsu Mak Pono nan katiko sakola tasabuk parangainyo, mulai dari cabut, suko manggaduah kawan, pancimeeh dan banyak ulah nan lain nan mambuek namonyo banyak dalam lembaran catatan guru BP.

“Taketu pamareh Mak Pono, bisa jeh anaknyo tangka ?” Mantari heran.

“Kalau anak tangka ndak talok dek pamareh do, kadang itu gambaran parangai apak e katiko bujang nah,” jawek Tek Minar nan mambuek Muncak jo Mantari tagalak.

Dalam galak-galak manyabuk parangai nak sakola, Mak Pono tibo, diateh Hondanyo tagyuk asoi bamacam warna dan sadonyo panuah.

“Njak dimaa mak ?” tanyo Muncak basimanih manyapo Mak Pono.

“Kalian pagunjiangan den yo, tasadak den tadi sadang dijalan, talingo angek-angek lo, lah badatak hati den, iko Muncak jo Mantari nan sadang mampagunjiangan den mah.” baru masuak lapau Mak Pono lah manyarengeh.

“Agiah lah mamak kito gah aia angek Tek, nak aman rakuangan liau,” sambuk Muncak.

“Aia angek baa lo den ka minum, mancari musuah san Muncak mah,” kalua sangik Mak Pono.

Tanpa diminta, Mak Pono mancaritoan perjalanannyo sajak pagi pai ka pasa mancari pakakeh sakola untuak cucu nan bisuak lai mulai sakola setelah libur duo pakan.

“Baa kok Mak Pono ban nan turun tangan mambalian, biasonyo mamak kan paliang maleh urusan nan takah itu,” tanyo Mantari.

“Jan takah itu tanyo Mantari, sayang ka cucu ko balain jo sayang ka anak mah, amuah balabiah malah sayang ka cucu dari pado ka anak, raso an lah bisuak,” Tek Minar malatak an minum Mak Pono.

“Etek sok-sok mambela Mak Pono lo, tadi etak nan paliang banyak manggunjiangan liau,” kalua parangai tukang adu Muncak.

“Samo san kalian nyeh, indak nan ka dipiliah surang alah jeh,” sarengeh Mak Pono.

Mancaliak Mak Pono lah mulai angek, Muncak batanyo baa kok kini Mak Pono lah rajin maurus sakola cucu. Mulai dari manjapuk anta tiok hari, rapek komite sampai ma ambiak rapor nan diundang Ayah, tapi nan datang Angku Pono.

“Baa lai Ncak, apaknyo tapi manambang belok ka Jawa, kini sewa lai sadang rami, jadi puta kapalo taruh san, samantaro amaknyo baranak kaciak lo, dek den lai dak ado padok makonyo den nan maurus,” jawek Mak Pono.

“Tapi wak dak yakin itu alasan Mak Pono nan sabananyo du, wak lah dapek carito dari Tek Ani, kan acok Mak Pono kanai sangik dek Tek Ani tiok pulang sakola,” Tek Minar manyolo dari balakang.

“Bagai-bagai san kau mah Minar, kau aru san lah samba du lu, cah lai tangah hari banyak urang ka makan a,” angek Mak Pono mandanga kato-kato Tek Minar.

mancaliak Mak Pono angek, Tek Minar galak badarai nan mambuek Muncak jo Mantari makin penasaran dan mamintak Tek Minar mancaritoan info nan didapeknyo.

“Ndeh andeh kalian gah lai, ado-ado san nan ka mambuek angok den sasak mah,” Makin kareh sangik Mak Pono.

“Pek lah Tek, kecek an lah a, angek lo info ko dari kasus Ridwan Kamil bacari lai mah,” Muncak maumbuak Tek Minar.

“Kalah berita viral di tipi dek info Tek Minar kini mah,” Mantari ndak kalah penasaran.

Lah pueh galak dan maraso manang Tek Minar mancaritoan, kalau Tek Ani mangecek an, kapalo sakola se de tampek cucunyo kini adolah mantan Mak Pono sangkek nambai.

“Haiyayai, den sangko iyo dek sayang ka cucu rajin pai sakola, kironyo pai mancaliak mantan,” bakuai Muncak dek galak, nan Mak Pono mukonyo sirah.

Baca juga :

• Ota Lapau, Tu Harus Den Lapor ka Kang Dedi
• Gantuang Pariuak Dek Hemat Anggaran
• Ota Lapau, Mareh Ang Ka Den
• Takah Jando Patah Hati
• Nan Diawak Ado lo Nyeh
• Den Paii jo Pitih Den
• Sarawa Tenggih Sabalah nan Tarompa Lah Balang Pulo
• Tadayo Godaan Mantan
• Pulang Basamo Baliak Surang-Surang
• Manggok dek Tibo Tak Disambuk