Ota Lapau, Awak Tibo Nyo Acuah San Nyeh

tukang ota : Fendi Moentjak

Mak Pono lah tibo di pintu lapau Tek Minar, di dalam lah duduak Mantari jo Muncak sadang basjadi maota ntah apo nan dibahas. Di meja dakek pintu ka dapua Botak sadang serius main hape, sasakali nyo manampa meja kadang manampa kaniang.

Mak Pono mandaham tando masuak, tapi indak juo ado nan manyahuik apo lai manyapo, tamasuak Tek Minar nan sadang manggoreng bakwan. Antah indak tadanga dek dasia minyak atau memang talampau serius takuk bakwan hanguh sahinggo ndak nampak Mak Pono masuak. Indak ado nan ma acuahan gaek buruak sarengeh ko tibo.

“Batoh biah aniang san mah, sambuk bagai lah deyen tibo,” hariak Mak Pono duduak di meja sabarang Muncak jo Mantari.

“Baa kami manyambuk, Mak Pono tibo cok ayam masuak san, baco gai lah salam, ko indak,” jawek Muncak.

Sasak angok Mak Pono mandanga jawek Muncak, sudah mahelo angok dicubonyo manjawek. “Lupo kalian jo pituah, kok lah mandaham mamak di janjang, sugiro bukakan pintu, bagageh kokohkan aia, tanyo baliau lah makan atau balum, sudah batanang baru buka rundiangan,”.

Takekeh Mantari mandaga jawaban Mak Pono. “Kami bukan lupo mak, tapi ajaran tu lah berkembang manjadi etika dan tata krama modern tanpa malupokan adab sebagai muslim. Apo adab muslim itu, tibo mambaco salam, manyapo jo sopan santun. Kalau cuma mandaham, antah urang mandaham dek batuak, atau kok dilapau gah, kode domino atau koa lah coki mandaham juo,”

“Minar buek an lah deyen kopi sakarek, lah batea nak urang ko nampak e mah,” dek kalah malawan Muncak jo Mantari, Mak Pono mahariak Tek Minar nan punyo lapau.

Mancaliak Mak Pono lah gak tanang dek lah dapek kopi, dapek lo rokok, Muncak mambuka carito, balambek-lambek.

“Baa kok naiek sen amper paneh Mak Pono tadi deh, gara-gara indak disambuk masuak lapau, nan taralah kan lai cok itu jeh mah,” Muncak batanyo balunak-lunak.

“Iyo !!!! tandi deyen ka kantua wali, tak ado pak wali disinan katonyo pai rapek paksin ka kantua camat. Jan kan ditanyo apo urusan, apo nan ka dibantu, mancaliak san indak surang-surang, mujua ado surang nan manjawek tanyo deyen. Tibo siko cok itu pulo,” walau alun tinggi tapi Mak Pono mulai emosi.

Mantari galak masam mandanga carito mak Pono, dikatokannyo samo bana nan Mak Pono rasokan tu jo berita nan sadang viral kini nah. Etek du marabo-rabo lo karano inyo tibo indak disambuk dek pak benur.

“Kalau Mak Pono bakatai-katai indak disambuk pak Wali tibo di lapau Tek Minar acuah pulo,” Muncak sato lo manyolo nan disambuang dek Mantari dan Botak galak badarai.

“Jan sato lo galak Botak, urus san lah kakek merah tu lu, kok habih pokok mintak sadakah karajo di hape tu lai,” Botak pulo nan kanai sarengeh dek Mak Pono.

Etek tu mako tarabo, inyo tibo pak benur acuah san, alasan nyo ado urusan malayani rakyat nan jauah lebih penting. Nan Etek ko bakareh pulo sabagai pejabat inyo pun harus disambuk, dihormati dilayani urusannyo.

“O itu, yo lai tau deyen nah, tadi wakatu dikantua wali, deyen manumpang wifi perai sempat baco beritanyo. Tapi itu ado unsur politik nyo nah kamanakan, jan di samo an jo mamak ko, kan lai mandanga juo kamanakan pameo politik itu kejam, pukua satu bakawan, pukua satu lewaik limo lah bamusuahan” Mak Pono masih membela diri.

“Apo lo ka bedanyo jo Mak Pono, urang tau kalau mak Pono tu lawan politik dek pak wali, tantu anak buah pak wali lah mangikuk ka komandannyo pulo, tibo lo mamak sinan kan wajar san perlakuan ka mak Pono samo jo nan nhyo tarimo dek etek du,” Muncak indak namuah kalah nan disambuk galak Mantari jo Botak.

“Kok di lapau Tek Minar gah baa lo sababnyo mako indak ado penyambutan ka Mak Pono da Muncak,” Botak nan tasi sibuk main hape sato lo maota.

“Kok tarabo Mak Pono ka Botak bako awak ndak sato do ha…,” Muncak galak takekeh.

“Samo nyo Tak, ado juo unsur politisnyo, mungkin bon alah taba, atau ado etongan nan alun lansai, makonyo Tek Minar cak icak indak tau san Mak Pono tibo,” Mantari nan manjawek tanyo Botak.

“Haiyayai, sudah lah wak tibo nyo acuah san, kini awak lo nan di paulahan, kamanakan durako surang-surang,” Mak Pono manyarengeh sambia kalua lapau.

Ota Lapau lainnya :

• Takuk Kanai Suntik, Abih Kiramaik Mak Pono dek Buk Bidan
• Mangaa Digoreng Juo Abuh San Lah
• Kalah Sarengeh Mak Pono dek Sangik Etek tu
• Pak Pati nak Ba Bini Ciek Lai
• Gadang Gaji Etek Kiroo Yeah
• Tangga Sarawa Dek Ulah Kakek Merah
• Abih Main Dek Ulah Surek
• Politik Panjek Pinang
• Katiyak Samo Tasapik, Baunnyo Babeda
• Lah Marasai Imun dek PSBB jo PPKM
• Ota Lapau, Pancarian Padiah Kawan Manjauah