Ota Lapau, Den Paii jo Pitih Den

Tukang Tulih : Fendi Moentjak

Walau masih suasana rayo, lapau Tek Minar lah rami pagi ko. Salain pelanggan tetap banyak juo urang rantau nan duduak mangopi. Banyak carito nan tabuka sambia banostalgia, maulang kaji nan kadang kalua galak badarai.

“Mak Pono maa nyo Ncak, lah tenggih hari alun tibo, biaso sudah suabuh lah duduk siko,” tanyo Sabirin, urang rantau nan sadang pulang kampuang.

“Iyo ndak, taragak lo wak mandanga sarengeh gaek tu, kamaa ko lah baliau, di balai pun tak ado tadi malam mancaliak randai, kalamari urang badendang liau dak lo ado, padohal itu hobi liau bana nah,” Saipul nan lamo marantau ka Banduang sato pulo manyolo.

“Sajak sudah rayo, baru sakali liau singgah siko, sudah tu lah ilang san, ntah kamaa ko lah gaek tu, indak ado mangecek batingga pasan, padohal fans baliau dari rantau sibuk manayo nak basuo,” jawek Muncak. lapau lapau lapau

Sajak sudah maota mambahas efisiensi anggaran tempo hari, nan manyamoan sarawa Muncak tenggih sabalah, Mak Pono indak mancogok lai ka lapau Tek Minar.

Biasonyo paliang kurang duo kali sahari gaek ko singgah ka lapau, pagi jo patang walau cuma nan diminum aia angek ngilu kuku dek karano banyak pantangan. Salain ndak buliah banyak minum nan manih, mangopi dilarang pulo dek asam lambuang acok bangkik. Sasakali lai sato juo teh talua gulo anau palapeh taragak.

“Den raso Mak Pono ko pai ka Japang lo mah, pai liburan takah pak pati nan sadang viral di tipi du,” Mantari manyolo sambia manyalai rokok.

“ka Japang kamaa lo kecek Mantari gah, jan kan Padang, Solok san indak tatampuah dek liau, kunun pulo pai ka Japang. Salain sia nan ka mambao, izin dari ibu negara Mak Pono jan disangko murah lai, labiah rumik dari mauurus paspot dan labiah sulik dari mambuek visa nah,” jawek Sabirin indak picayo.

Mandanga jawek Sabirin, Mantari manyampaian kalau Mak Pono ko acok mambuek kejutan. Dulu indak ado urang nan manyangko liau ka jadi calon Wali Nagari, beliau mantap maju mencalonkan diri, namun sayang gagal katiko tes mangaji sahinggo kurang syarat ciek.

“Iyo lo mah ndak, tapi kok pai japang ndak mungkin deh, apo urusan Mak Pono ka sinan,” jadi pikiran dek Sabirin .

“Antah kok pai manmbang belok ka Jawa liau liak ndak, kini sewa rami urang baliak ka rantau, maa tau gaek ko tapanggia lo jadi sopir cadangan,” Saipul sato pulo bapikia.

“Ndak mungkin deh du, maa juo talok dek gaek tu mambaok oto sajauh itu, sadangkan mambao oto k Padang pulang baliak, tigo hari gaek ko mandamam, kapalo sakik, badan latiah, nan batih lah tagang san, bagai nan taraso, alaun lai baranti tiok cacah dek sasak kajamban,” Muncak mambantah pandapek mantari.

“Lah kanai kicuah surang-surang, Mak Pono lah pai libur, kalin abih hari badebat juo,” Tek Minar sato lo manyorong sambia malatak an Teh Talua nan diminta Sabirin.

Dalam urang di lapau heboh kahilangan Mak Pono tanpa berita, mancogok gaek ko jo gaya babeda dari nan taralah. Tak ado topi tarabuh, abuak basega licin. Uban nan biaso manyarumbuh bantuak lalang masiak kini alah bacolok jadi hitam.

Mancaliak ka baju barubah pulo. Nan biaso babaju kaus pakai krah langkok jo saku-saku palatak rokok, kini batuka jo kemeja planel langan baguluang gaya anak mudo. Sarawa dasar semi wol nan biaso dipakai kini batuka jo levis. Ciek nan lai dak barubah, tarompa Indian warna coklat nan kileknyo bantuak kanai minyak manih.

“Mampagunjiangkan den kalian yo, sajak tadi talingo den gata mandanguang-danguang tando ado nan manyabuk den,” kareh suaro Mak Pono baru masuak lapau.

Bagageh sadonyo basalam jo Mak Pono, ado pulo nan mangecek an salamek hari rayo, walau kue rayo lah habih sajak sapakan nan lalu. Nan Tek Minar bagageh pulo malatak an aia angek ngilu kuku, indak tarago diminta cok taralah.

Walau sadonyo babaso maajak Mak Pono maota, nan gaek ko bantuaknyo sadang tasumbek. Indak rancak angin kalua rumah nampaknyo. Sudah basalam, Mak Pono duduak di suduk tampek biaso. Baragam tanyo hanyo dijawek singkek.

“Ka maa Mak Pono salamo hilang, sudah makan lamang tapai siko hari Salasa sudah rayo, Mak Pono lah ilang tanpa kaba san, di Balai urang ado acara indak lo ado nampak,” Muncak manyapo balambek-lambek.

“Den pai ka Japang,” Mak Pono manjawek singkek.

“Ndak takok dek den Muncak, Mak Pono pai libur ka Japang,” Mantari galak takekeh.

“Yo tangka Mak Pono yeah, di ambek an pai libur ka lua nagari, dilarang balanjo di lua nagari, pakai produk lokal, kok pai tu mangecek, indak lucuh san pai bak kato hati awak,” Muncak indak namuah kalah.

“Taragak den lah, den pai jo pitih den,” jawek Mak Pono singkek sambia tagak kalua lapau.

Baca Juga :

• Sarawa Tenggih Sabalah nan Tarompa Lah Balang Pulo
• Tadayo Godaan Mantan
• Pulang Basamo Baliak Surang-Surang
• Manggok dek Tibo Tak Disambuk
• Kanai Kicuah Langkueh Disangko Dagiang
• Takah Rang Sumando Hilang Malam
• Tim Pakar dan Tim Pakak
• Cik Ayam Bubar Tapi Baunnyo Tak Hilang
• Tenggen Dek Ulah Cik Ayam
• Mati Tak Makan Dek Indak Ado Ayang