Ota Lapau, Urang Mancaliak Bulan Inyo Mancaliak Kawan

tukang Tulih : Fendi Montjak

Tek Minar sibuk malayani urang nan balanjo, babeda jo hari biaso dek hari ka puaso Tek Minar melayani pesanan untuak pai manjalang. Mulai dari Lamang Tapai, Randang sampai Samba Baragam sadonyo ditarimo Tek Minar.

Tapi malanglah bagi pelanggan tetap nan tiok hari duduk di lapau Tek Minar, menu harian indak takarajoan. Bahkan tadi Muncak tibo tapaso buek kopi surang, Mantari tagak teh es juo mambukak kulkas surang.

“Mujua san Mak Pono lai ndak kamari mah Ncak, kok tibo liau, cok a lah muncuangnyo tu,” ota Mantari sambia mamacah batu es.

“Bayangan se lah RX King marepet, cok itu suaro gaek du nah,” jawek Muncak nan disambuk galak badarai Mantari.

“Mangaa den kalian sabuk, lah ka puaso hari lai mah, kurang-kurangi lah mampakecek an urang tu, bako tabiaso sampai Ramadhan, hilang pahalo puaso kalian,” Mak Pono manampa meja nan mambuek Muncak jo Mantari takajuk.

Bagageh Muncak malaporkan kondisi lapau Tek Minar, nak jan Mak Pono tambah angek dek alah dipagunjiangan tadi. Disampaikan dek Muncak, dek banyak dapek order juadah untuak manjalang, sampai indak talakik mambuek galeh cok biaso.

Baca Juga :

• Isak Mande, Himbau Mak Adang Pulang
• Ratok Rukayah, Rindu Tergadai di Bilik Rantau
• Ratok Rukayah, Lebaran Ini Ia Tak Pulang
• Kupiah Usang, Cita Terbengkalai Karena Cinta
• Marawa Tagak Dirantau, Tangis Pilu Tek Siti di Bulan April
• “Om” Bukan Mamak, Air Mata Zurhaya dan Fatima

“Kalah lontong gulai cancang dek randang kini mak, tak ado bubua kacang padi katan, baralah dek lamang tapai, aie angek ngilu kuku paporit Mak Pono lai ko lah ado, iko kami minum buek surang-surang tadi mah,” Muncak malapor ka Mak Pono.

“Nar !!!!,” Mak Pono mahimbau Tek Minar nan langsuang disonsong jo aia angek ngilu kuku sagaleh tangkai.

“Ndeh mak, awak dak ado buek kacang padi katan kini deh, indak talakik dek banyak mambuek pasanan urang ka pai manjalang,” Tek Minar mambana nak jan kanai sangik dek Mak Pono.

“Nan pantang urang saisuak san, dulu nan dibao pai manjalang mintuo du buatan surang, indak babali atau bakandak an do, kini nan dibao sagalo dibali, dari lamang, randang, samba sampai ka kue, stek lai amuah nasi dalam sia du babali pulo nah,” masam jawek Mak Pono.

“Ka dia lo nyo mak, itu lo rasaki awak di bulan baiak ko nah, nan paralu urang-urang tu lai pai manjalang mintuo tando ka masuak puaso, mintuonyo tacaliak nan awak dapek rasaki lo,” Tek Minar membela diri.

“Dek kauu rasaki, dek kami nan pelanggan tetap ko malang,” sangik Mak Pono nan dijawek galak dek Muncak jo Mantari.

Dijalehan lah dek Mak Pono, urang saisuak manyuruh manjalang dan mambao di hari baiak bulan baiak ko supayo ado silaturahmi antaro mintuo jo minantu. Dengan mambawo juadah, Mintuo bisa tau kemampuan memasak minantunyo, kok kurang lamak diagiah saran bia nak tambah sanang anaknyo sinan. Baitu pulo sabaliaknyo, kok lamak bisa pulo jadi referensi dek Mintuo.

Sadang badebat tentang juadah manjalang babali jo dibuek, tibo Botak jo penampilan rapi langkok helem tagantuang duo buah di hondanyo.

“Dari maa Tak ?” tanyo Mantari.

“Baliak balimau Da,” Botak langsuang maambiak minuman dingin di kulkas.

“Duo helem mah, jo sia pai balimau tadi ? jo Pitok ?” salidik Muncak.

“Indak lah, rugilah wak nyo, kok pai balimau ka Singkarak jo Pitok juo, mubazir se awak gagah, kalau pai Balimau indak baok cewek,” Botak manjalehan sambia manuangkan Fanta ka galeh nan barisi susu.

“Hoi !! lai tantu arati balimau dek ang, urang sibuk manyucikan diri jo hati ka masuak puaso, indak bakaja mambuek doso juo do, kok bantuak batu lapeh dari katapel gagek ang masuk narako beko ndak,” Mak Pono manyaregeh mandanga jawek Botak.

Takajuk Botak kanai hariak dek Mak Pono, tapi inyo ndak amuah kalah.

“Mujua san Mak Pono indak jadi Wali Nagari mah, kok sempat jadi wali cok iko panyarengeh lai ka sakik jantuang warga sadonyo mah,” Botak manjwek kecek  Mak Pono.

“Batoh mah Tak, balawan san Mak Pono, padohal dulu Botak du Tim Sukses Mak Pono sangkek calon Wali Nagari,” mandanga kecek Muncak, Botak galak takakah.

Dek situasi mulai angek, Mantari ma aliah carito. Kebetulan di tipi berita tentang rencana Sidang Istbat Kementerian Agama dan titik pengamatan Hilal. Berita lainnyo manyampaikan kalau Muhammadiyah memutuskan 1 Ramadhan 1447 H jatuhnya pada hari Rabu 18 Februari 2026.

“Mak Pono bilo rencana ka puaso, Rabu atau tunggu keputusan Pemerintah ?” tanyo Mantari balambek-lambek.

“Rabu, den pakek Muhamadiyah,” singkek padek jawek Mak Pono.

“Kalau Botak bilo ? kan alah baliak balimau tadi mah,” Mantari mananyo Botak.

“Awak caliak kawan lu, bilo nyo mulai puaso, kok nyo alun mulai bako digodanyo puaso awak,” Botak manjawek basiragu. lapau lapau lapau apau

“Oi Lompong anguh, urang puaso tu mancaliak bulan manunggu hilal, indak mancaliak kawan do, sasek kaji ang mah,” kalua juo sarengeh Mak Pono dek ulah Botak ko.

Baca Juga :

• Sadakah Moribu Minta lo Kayo jo Parejo
• Ota Lapau, Ka Tuhan Minta Kayo ka Walinagari Minta Miskin
• Demi FB Pro, Bacaliak an Takuk ka Bini
• Bacarai Juo Nan Malakok Taruh Du
• Ota Lapau, Cik Ayam Bubar Tapi Baunnyo Tak Hilang
• Tenggen Dek Ulah Cik Ayam
• Mati Tak Makan Dek Indak Ado Ayang
• Mak Pono Candu Pai Sakola, Kironyooo………
• Ota Lapau, Tu Harus Den Lapor ka Kang Dedi