Ota Lapau, Cik Ayam Bubar Baunnyo Tak Hilang

tukang ota : Fendi Moentjak

Mak Pono duduak surang di lapau Tek Minar karano tak ado kawan maota. Sambia manggatok rakik kacang ditipi, muncul berita fashion show citayam dibubarkan aparat.

“Apo nan batonton du mak, serius bana sampai tak tahu rokok lah tapuntuang, cah lai jari du nan tabaka lai nah, ” Sapo Mantari baru masuak.

“Tu ha, cik ayam nan disabuk Muncak kalamari lah dibubarkan polisi, jawek Mak Pono singkek.

Mantari sato lo mangomentari kalau dihape banyak lo beredar, artis dadakan nan viral, salamo ado cik ayam lah banyak cok artis kahilangan pangguang, ado juo nan mancari tampek baru untuak tetap eksis jo kegiatan itu.

“Talambek info Mak Pono mah, ko ado lo labiah angek ha, cik ayam baru tapanca,” Muncak nan baru masuak lapau langsuang malatak an hape dimuko Mak Pono jo Mantari.

Mak Pono langsuang manyemba hape tu, dek bagageh hampia sajo taserak kopi ka hape Muncak.

“Ndak elok nampak rang padusi, bagageh Mak Pono nak mancaliak,” garutok Mantari nan kalah capek dek Mak Pono marabuk hape.

“Jan gambar urang padusi nan batih tasimbah du nan dicaliak mak, bacolah komentar MUInyo,” Muncak sato lo bakomentar mancaliak Mak Pono indak mangarijok mancaliak hape.

Tek Minar nan sadang manjarangan aia di dapua sato tagalak mandanga komentar Muncak taradok Mak Pono. “Alun juo habih cik ayam du lai,” sorak Tek Minar.

Muncak mancaritoan, citayam nan di Jakarta lah baranti karano dilarang berbagai pihak tarutamo Polisi jo Dinas Perhubungan karano maganggu kelancaran lalu lintas, tapi kini hampai di tiok daerah ado nan maniru acara sarupo itu.

“Manggaritih den mancaliak, lah kamari tabang jo kaniyak hinggok baun cik ayam ko, dari nan pejabat, sampai induak-induak jo amai-amai sato lo malenggok-lenggok di jalan jo dandanan norak,” kalua suaro kareh Mak Pono.

“Batua nah Mak, caliak ko ha, nan terbaru nan dakek awak bana, etek camat malenggok-lenggok di trotoar, katonyo mampromosian kerajinan daerah untuak dikenal urang banyak melalui media sosial. Tapi mambuek heboh sampai MUI mangalua an pandapek tapi etek ko ndak tarimo, jadi lah nyo babaleh komentar di media sosial,” kato Muncak.

Sajak acara citayam ko viral di media sosial sarato jadi berita angek di tipi, lah banyak nan maniru acara sarupo. Di jam gadang juo pernah nan mambuek acara sarupo, kamudian heboh dek karano itu bukan budaya Minang.

Kamudian dituka dengan pakaian Minang, tetap juo banyak indak tarimo karano dianggap melecehkan pakaian dan budaya Minang dibaok baolok-olok.

“Kini makin manjadi-jadi, indak dimuko jam gadang sajo, di Padang lah bakareh arang DPRD jo Pamarintah managahan jan dibuek lo acara itu, di tampek lain muncul nyo,” makin tenggi suaro Mak Pono.

“Caliak ko mak,” Mantari mancaliak an hapenyo ka Mak Mak Pono.

Manari-manari jari manggeser layar hape nan babagi berita isinya tantang etek Camat nan viral gara-gara maniru citayam. Etek ko mambuek status medi sosial, kalau inyo camat nan dicopot dari jabatan gara-gara mambuek konten fashion sarupo citayam.

“Calik lah dek Mak Pono, sabanyak nan galak, sabanyak nan mancimeeh, nan manyumpah mancaliak berita jo caritonyo. Ado nan nan mambela ado nan mandukuang,” Muncak mangomentari barita tu.

“Kan batua kecek den, lah pado tenggen gara-gara cik ayam, nan elok di ingek an masih mangarengkang juo, indak dek malenggok-lenggok cok itu urang ka tertarik jo rancak kain nan nyo pakai. Iko urang banyak mancaliak media sosial ko bukan dek rancak kain, tapi dek lenggok jo batih nan tasingkok tu ha,” Mak Pono makin angek mancaliak video nan di adok an Mantari

“Hai ya lah, ka jadi lah nagari ko lai go, Cik Ayam nan bubar tapi baunnyo tak hilang,” Mak Pono tasanda dek tabao emosi mambahas cik ayam.

Jan Lupo, Baco Ota lapau nan lainnyo :

• Tenggen Dek Ulah Cik Ayam
• Mati Tak Makan Dek Indak Ado Ayang
• Mak Pono Juga Butuh BPJS
• Awak Tibo Nyo Acuah San Nyeh
• Takuk Kanai Suntik, Abih Kiramaik Mak Pono dek Buk Bidan
• Mangaa Digoreng Juo Abuh San Lah
• Kalah Sarengeh Mak Pono dek Sangik Etek tu
• Pak Pati nak Ba Bini Ciek Lai
• Gadang Gaji Etek Kiroo Yeah
• Tangga Sarawa Dek Ulah Kakek Merah
• Abih Main Dek Ulah Surek
• Politik Panjek Pinang
• Katiyak Samo Tasapik, Baunnyo Babeda
• Lah Marasai Imun dek PSBB jo PPKM
• Ota Lapau, Pancarian Padiah Kawan Manjauah